ប្រជាពលរដ្ឋខ្មែរជាង៣០នាក់ស្លាប់ដោយសារទឹកជំនន់ និងចោទអាជ្ញាធរថារើសអើង
មកទល់ថ្ងៃទី៣០ ខែកញ្ញា ទឹកជំនន់នៅទូទាំងប្រទេសសម្លាប់មនុស្សជាង ៣០នាក់ និងបង្ខំពលរដ្ឋរាប់ពាន់គ្រួសារផ្សេងទៀតឲ្យជម្លៀសចេញពី ផ្ទះសំបែង។ នេះជាការ បញ្ជាក់ឲដឹង របស់គណៈកម្មាធិការជាតិគ្រប់គ្រងគ្រោះមហន្តរាយ។ ចំណែក អាជ្ញាធរបានរងការចោទថារើសអើងលើអ្នករងគ្រោះដោយទឹកជំនន់នេះ។
ទឹកជំនន់ទន្លេមេគង្គលើនៅខេត្តក្រចេះ ស្ទឹងត្រែង កំពង់ចាម ចាប់ផ្ដើមស្រកក៏ពិតមែន ប៉ុន្តែតាមការព្យាករកម្ពស់ទឹកអាចនឹងហក់ឡើងវិញ បើសិនជាមានភ្លៀងធ្លាក់ខ្លាំង។ នេះជាការ បញ្ជាក់ឲ្យដឹងរបស់មន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ តាមរយះវិទ្យុ អាស៊ីសេរី។
មន្ត្រីគណៈកម្មាធិការជាតិគ្រប់គ្រងគ្រោះមហន្តរាយអំពាវនាវឲ្យ ប្រជាពលរដ្ឋប្រុងប្រយ័ត្នពីគ្រោះថ្នាក់ដែលបណ្តាលមកពីការ ធ្វេសប្រហែសពេលមានទឹកជន់ឡើង។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបង្ហាញថា ខេត្តចំនួន ១២ រងផលប៉ះពាល់ដោយសារគ្រោះទឹកជំនន់ ដែលបង្កឲ្យពលរដ្ឋជាង ៧ម៉ឺនគ្រួសារជួបការលំបាក។ ខេត្តដែលរងគ្រោះដោយសារទឹកជំនន់មានខេត្តព្រះវិហារ បន្ទាយមានជ័យ សៀមរាប ឧត្តរមានជ័យ កំពង់ចាម ក្រចេះ ស្ទឹងត្រែង ព្រៃវែង កណ្តាល ព្រះសីហនុ រតនគិរី និងរាជធានីភ្នំពេញ។
អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ ទេសរដ្ឋមន្ត្រី ញឹម វណ្ណដា មានប្រសាសន៍ថា លោកមិនមានពេលគ្រប់គ្រាន់លម្អិតពីរឿងនេះបានទេ ព្រោះលោកទើបតែសុំការអនុញ្ញាតពីលោកនាយករដ្ឋមន្ត្រី ហ៊ុន សែន ដើម្បីនិយាយជាមួយអ្នកកាសែតបាន។ លោកបន្តដោយខ្លីថា ទឹកអាចនឹងឡើង ដូចនេះពលរដ្ឋគួរប្រុងប្រយ័ត្ន៖ «ទឹក វាស្រកហើយ អត់មានបញ្ហាអីទេ គ្រាន់វាបុកនៅខេត្តកណ្ដាល រាជធានីភ្នំពេញ និងខេត្តព្រៃវែង យើងកំពុងមានវិធានការដើម្បីដោះស្រាយបញ្ហាហ្នឹងណា»។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបញ្ជាក់ថា មកដល់ល្ងាចថ្ងៃទី២៩ កញ្ញា មានមនុស្សស្លាប់ដោយសារទឹកជន់ឡើងចំនួន ២៨នាក់ ក្នុងនោះខេត្តកំពង់ចាម មានមនុស្សស្លាប់ច្រើនជាងគេ គឺ ១៦នាក់ និងខេត្តរតនគិរី ៤នាក់ ព្រមទាំងខេត្តមួយចំនួនទៀត។ ប៉ុន្តែនៅខេត្តព្រៃវែង នៅព្រឹកថ្ងៃទី៣០ ខែកញ្ញា ក្រុមប្រជាពលរដ្ឋបានប្រាប់វិទ្យុអាស៊ីសេរី ថា ពួកគាត់បានជួយសង្គ្រោះបុរសជនបរទេសម្នាក់ ដែលបានអណ្ដែតទៅទើរលើមែកឈើដោយសារបើកឡានឆ្លងកាត់ទំនប់ស្នេហ៍ ក្នុងឃុំធាយ ស្រុកបាភ្នំ ខេត្តព្រៃវែង។
ក្រុមពលរដ្ឋក៏បានជួយស្រង់សាកសពជនបរទេសចំនួន ៤នាក់ ក្នុងនោះមានកុមារ ២នាក់ និងស្ត្រី ២នាក់ ដែលបានស្លាប់ដោយសារលង់ទឹកទំនប់។ បុរសជនបរទេសនោះ គេមិនទាន់ស្គាល់អត្តសញ្ញាណឡើយ ដោយសារគាត់មិនចេះនិយាយទាំងភាសាបារាំង និងអង់គ្លេស។ ក្រុមពលរដ្ឋឲ្យដឹងថា រថយន្តបើកចូលទឹក គឺមកពីអ្នកបើកមិនដឹងថា ទឹកនៅលើផ្លូវជាតិពីកំពង់ស្នេហ៍ ទៅបាភ្នំ មានជម្រៅជ្រៅ និងហូរខ្លាំង ហើយអាជ្ញាធរមូលដ្ឋានក៏មិនបានដាក់សញ្ញាហាមឃាត់។ ប៉ុន្តែក្រុមអាជ្ញាធរប្រាប់ថា បញ្ហានេះមកពីទឹកឡើងលឿនខ្លាំងពេក។
ទន្ទឹមនឹងនេះ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបញ្ជាក់ថា សាលារៀនដែលរងផលប៉ះពាល់មានចំនួនជិត ៤០០ខ្នង វត្តអារាមចំនួនជិត ៣០០វត្ត និងមន្ទីរពេទ្យចំនួន ១៧ ត្រូវបានផ្អាកដំណើរការ។ សន្ទូងដែលបានប៉ះពាល់មានចំនួនជិត ៩ម៉ឺនហិកតារ ហើយទឹកជំនន់អូសបន្លាយ សន្ទូងទាំងនោះនឹងខូចខាត។ ទឹកឡើងក៏ប៉ះពាល់ដំណាំផ្សេងៗចំនួនជាង ៣ពាន់ហិកតារ។ ទឹកជំនន់កាលពីឆ្នាំ២០១២ បានសម្លាប់មនុស្ស ១៤នាក់។ កាលពីឆ្នាំ២០១១ ទឹកឡើងក៏បានសម្លាប់មនុស្សអស់ចំនួន ២៥០នាក់ដែរ នឹងបណ្ដាលឲ្យខាតបង់ថវិកាជាតិអស់រាប់លានដុល្លារ។
ប៉ុន្តែកាលពីពេលថ្មីៗនេះ ប្រជាពលរដ្ឋបានលើកឡើង តាមរយះវិទ្យុ អាសីសេរី ថា អាជ្ញាធរដែលចុះស្រង់ឈ្មោះអ្នករងគ្រោះដោយសារទឹកជំនន់ បែរជាមានការរើសអើងចំពោះពួកគាត់ ដោយមេភូមិលើកឡើងថា ពួកគាត់បោះឆ្នោតឱ្យគណបក្សសង្គ្រោះជាតិ ត្រូវឱ្យខាងគណបក្សសង្គ្រោះជាតិ ទៅជួយ។ ប៉ុន្តែបញ្ហានេះត្រូវបានមេភូមិព្រែករំដេងកើត បដិសេធថា លោកមិនបានរើសអើងនោះទេ។ ចំណែក ប្រជាពលរដ្ឋនៅឃុំពង្រ ស្រុកកោះសូទិន ខេត្តកំពង់ចាម ចោទប្រកាន់ក៏បានចោទប្រកាន់មេភូមិដែរថា បានប្រកាន់បក្សពួក ហើយនិយាយស្ដីសម្ដីធ្ងន់ធ្ងរមកកាន់ពួកគាត់ នៅពេលដែលមេភូមិដើរស្រង់ឈ្មោះ ប្រជាពលរដ្ឋដែលរងគ្រោះដោយទឹកជំនន់។
ជាអាទិ ប្រជាពលរដ្ឋនៅភូមិព្រែករំដេងកើត ឃុំពង្រ ស្រុកកោះសូទិន ខេត្តកំពង់ចាម អ្នកស្រី ប៉េង នីន បានមានប្រសាសន៍ ប្រាប់ ថា នៅថ្ងៃទី២៧ កញ្ញា ប្រធានភូមិបានដើរស្រង់ឈ្មោះប្រជាពលរដ្ឋដែលបានរងគ្រោះដោយទឹក ជំនន់មកដល់មុខផ្ទះអ្នកស្រី អ្នកស្រីក៏បានស្រែកសួរថា ជួយកត់ឈ្មោះពួកគាត់ផង ពីព្រោះពួកគាត់ក៏ជាអ្នករងគ្រោះដោយសារទឹកជំនន់ដែរ ប៉ុន្តែមេភូមិបែរជាមានការរើសអើងចំពោះពួកគាត់ ហើយក៏បានប្រើពាក្យសម្ដីមិនសមរម្យទៅកាន់គាត់ទៀតផង។
ប្រភពពី៖ www.healthcambodia.com
0 comments:
Post a Comment