ភ្លេចៗខ្លួនការប្រកួតជម្រុះ FIFA World Cup 2014 បានចាប់ផ្ដើមបន្តទៀតហើយ ខណៈកាន់តែជិតរកឃើញក្រុមទាំងអស់ទៅប្រេស៊ីលទៅហើយនោះ។ តើក្រុមណាខ្លះទៀតនឹងកក់កៅអីស្វ័យប្រវត្តិ ហើយក្រុមណាខ្លះទៀតនឹងដឹងខ្លួនធ្លាក់ស្វ័យប្រវត្តិ ក្រោយការប្រកួតយប់នេះ?
តំបន់អឺរ៉ុប
សម្រាប់ តំបន់អឺរ៉ុប ដែលមានកៅអី១៣នោះ បានរកឃើញជាផ្លូវការ២ហើយ គឺ អ៊ីតាលី និងហុល្លង់ ខណៈក្រុមខ្លះទៀតក៏នឹងអាចកក់កៅអីបន្ថែមទៀតដែរនៅយប់នេះ។
ពូល A ៖ ក្រុមលេខ១ បែលហ្សិក ប៉ះក្រុមលេខ២ ក្រូអាត ម៉ោង១១យប់ ខណៈក្រុមធ្លាក់ស្វ័យប្រវត្តិទាំង២គឺ វែល និងម៉ាសេដូនៀ ជួបគ្នាម៉ោង១:៤៥នាទីរំលងអាធ្រាត្រ។ បែលហ្សិក នឹងជាប់ស្វ័យប្រវត្តិបើឈ្នះ ឬស្មើក្រូអាតយប់នេះ។ មើលតារាងពិន្ទុពូល A ដូចខាងក្រោម៖
ពូល B ៖ ក្រុមលេខ៥ អាមិននៀ (Armenia) ប៉ះក្រុមលេខ២ ប៊ុលហ្គារី ម៉ោង១០យប់, ក្រុមបាតតារាង ម៉ាល់តា ជួបក្រុមលេខ៤ សាធារណរដ្ឋឆេក ម៉ោង១២:៣០អាធ្រាត្រ ខណៈក្រុមលេខ៣ ដាណឺម៉ាក តទល់ក្រុមជាប់ស្រាប់ អ៊ីតាលី ម៉ោង១:១៥នាទីរំលងអាធ្រាត្រ។ ពូលនេះ ក្រុម៤នៅមានសិទ្ធិប្រជែងយកកៅអីលេខ២ដើម្បីទៅប្រកួត Play-off ក្រោយអ៊ីតាលីក្ដោបយកលេខ១ហើយនោះ។ ក្រុម៤ដែលនៅមានសិទ្ធិដណ្ដើមគ្នាយកលេខ២នោះ រួមមាន ប៊ុលហ្គារី, ដាណឺម៉ាក, សាធារណរដ្ឋឆេក និង អាមិននៀ ចំណែកម៉ាល់តាធ្លាក់ស្វ័យប្រវត្តិហើយ។ តើក្រុមណានឹងបន្តធ្លាក់ស្វ័យប្រវត្តិទៀតក្រោយប្រកួតយប់នេះ? តារាងពិន្ទុពូល B មានដូចខាងក្រោម៖
ពូល C ៖ ក្រុម០ពិន្ទុ Faroe Islands ជួប កាហ្សាក់ស្ថាន ម៉ោង១២កណ្ដាលអាធ្រាត្រ រីឯក្រុមជិតជាប់ អាល្លឺម៉ង់ ប៉ះ អៀរឡង់ ម៉ោង១:៤៥រំលងអាធ្រាត្រ ខណៈម៉ោងដូចគ្នានេះ ក្រុមលេខ២ ស៊ុយអែត ជួបក្រុមលេខ៣អូទ្រីស។ អាល្លឺម៉ង់ នឹងជាប់ស្វ័យប្រវត្តិប្រសិនបើឈ្នះយប់នេះ ខណៈស៊ុយអែតក៏នៅមានសិទ្ធិដណ្ដើមលេខ១ពីអាល្លឺម៉ង់នោះដែរ។ អូទ្រីស និងអៀរឡង់ នៅមានឱកាសប្រជែងយកលេខ២ក្នុងពូល ប៉ុន្តែអៀរឡង់ដូចជាសង្ឃឹមតិចណាស់។ មើលតារាងពិន្ទុពូល C ដូចខាងក្រោម៖
ពូល D ៖ ៣គូពូល D យប់នេះសុទ្ធតែប្រកួតម៉ោង១:៣០រំលងអាធ្រាត្រដំណាលគ្នា ពោលគឺ អង់ដូរ៉ា ប៉ះ រ៉ូម៉ានី, អេស្តូនី ជួប ទួរគី រីឯ ហុល្លង់ តតាំង ហុងគ្រី។ ហុល្លង់ក្ដាប់យកលេខ១ហើយ ដូច្នេះ ហុងគ្រី, ទួរគី និង រ៉ូម៉ានី ត្រូវប្រជែងយកលេខ២ ខណៈ អេស្តូនី និង អង់ដូរ៉ា ធ្លាក់ហើយ។ ចង់ដឹងច្បាស់ មើលតារាងពិន្ទុខាងក្រោម៖
ពូល E ៖ អាល់បានី ជួប ស្វីស ម៉ោង១កន្លះរំលងអាធ្រាត្រ ខណៈ១៥នាទីបន្ទាប់ អ៊ីស្លង់ (Iceland) ប៉ះ ស៊ីប្រ៊ូស (Cyprus) និង ស្លូវើនៀ ជួប ន័រវែស។ ពូលនេះហាក់តឹងតែងជាងគេត្បិតមិនទាន់មានក្រុមណាពិន្ទុដាច់លើសគេនោះទេ ខណៈក្រុមធ្លាក់ស្វ័យប្រវត្តិគឺមានតែ ស៊ីប្រ៊ូស មួយប៉ុណ្ណោះ។ ស្វីស, អ៊ីស្លង់ និង ស្លូវើនៀ នៅមានសិទ្ធិប្រជែងយកលេខ១ ខណៈ ន័រវែស និង អាល់បានី អស់ឱកាសយកលេខ១ តែនៅមានសិទ្ធិប្រជែងយកលេខ២។ តារាងពិន្ទុពូល E មានដូចខាងក្រោម៖
Ronaldo (កណ្ដាល) កំពុងហ្វឹកហាត់ត្រៀមទាត់ឲ្យព័រទុយហ្គាល់យប់នេះ
ពូល F ៖ អាហ្សេបៃហ្សង់ ជួប អៀរឡង់ខាងជើង ម៉ោង១១យប់, លុចហ្សំបួរ ប៉ះរុស្សី ម៉ោង១កន្លះ និងព័រទុយហ្គាល់ ជួប អ៊ីស្រាអែល ម៉ោង២:៤៥រំលងអាធ្រាត្រ។ ក្នុងពូលនេះ រុស្សី ព័រទុយហ្គាល់ និងអ៊ីស្រាអែល សុទ្ធតែនៅមានសិទ្ធិប្រជែងកៅអីលេខ១ ខណៈអៀរឡង់ខាងជើង, លុចហ្សំបួរ និងអាហ្សេបៃហ្សង់ ធ្លាក់អស់ហើយ។ មើលពិន្ទុដូចខាងក្រោម៖
ពូល G ៖ លីទុយអានី ជួប ឡាតវី ម៉ោង១០កន្លះយប់, បូស្នី-ហឺហ្ស៊េហ្គោវីណា ប៉ះ លិចធិនស្តែន ម៉ោង១ ខណៈក្រិក ជួបតទល់ ស្លូវ៉ាគី ម៉ោង១:៤៥រំលងអាធ្រាត្រ។ ៤ក្រុមពូលនេះបានធ្លាក់ស្វ័យប្រវត្តិអស់ហើយ គឺ ស្លូវ៉ាគី, លីទុយអានី, ឡាតវី និង លិចធិនស្តែន ដូច្នេះសល់តែបូស្នី និងក្រិក ប៉ុណ្ណោះដែលត្រូវប្រជែងយកលេខ១។ តើ២ក្រុមនេះ មួយណាលេខ១ មួយណាលេខ២? មើលពិន្ទុខាងក្រោម៖
ពូល H ៖ ម៉ុលដូវ៉ា ជួបក្រុម០ពិន្ទុ សាន់ម៉ារីណូ ម៉ោង១១យប់, អ៊ុយក្រែន តតាំង ប៉ូឡូញ ម៉ោង១ ខណៈ អង់គ្លេស ស្វាគមន៍ ម៉ុងតេណេក្រូ ម៉ោង២រំលងអាធ្រាត្រ។ អង់គ្លេស អ៊ុយក្រែន ម៉ុងតេណេក្រូ និងប៉ូឡូញ សុទ្ធិតែមានឱកាសប្រជែងយកលេខ១ ផ្ទុយពី ម៉ុលដូវ៉ា និងសាន់ម៉ារីណូ ដែលធ្លាក់ស្វ័យប្រវត្តិហើយ។ មើលតារាងពិន្ទុខាងក្រោម៖
កីឡាករក្រុមអង់គ្លេសកំពុងហ្វឹកហាត់ត្រៀមប្រកួតយប់នេះ
ពូល I ៖ ដោយសារពូលនេះ មានតែ៥ក្រុម ដូច្នេះយប់នេះ គឺមានតែ១គូទេ គឺក្រុមកំពូលតារាង អេស្ប៉ាញ ជួបក្រុមបាតតារាង បេឡារូស ម៉ោង៣ទៀបភ្លឺ។ មានតែអេស្ប៉ាញ និងបារាំងប៉ុណ្ណោះ ដែលនៅមានសិទ្ធិប្រជែងយកកំពូលតារាង រីឯ ហ្វាំងឡង់ ហ្សកហ្ស៊ី និងបេឡារូស ចប់ហើយ។ តារាងពិន្ទុពូល I មានដូចខាងក្រោម៖
បញ្ជាក់៖ ក្រុមលេខ១ក្នុងពូលទាំង៩ នឹងជាប់ជាស្វ័យប្រវត្តិ ខណៈក្រុមលេខ២ល្អបំផុតចំនួន៨ ត្រូវចាប់គូទាត់ play-off យក៤ក្រុមឡើងទៅ។ ដោយសារក្នុងចំណោម៩ពូល មានពូល១មានក្រុមតិចជាងគេ ដូច្នេះការប្រកួតទល់នឹងក្រុមបាតតារាងសម្រាប់ពូល៨ដែលមាន៦ក្រុមគឺមិនត្រូវបានគិតនោះទេ។ ក្រុមលេខ២ល្អបំផុត ត្រូវគិតលើ ពិន្ទុ បន្ទាប់មកគឺគ្រាប់បាល់សំណល់ និងចុងក្រោយគឺចំនួនគ្រាប់បាល់ស៊ុតចូលគេ។
តំបន់អាមេរិកខាងត្បូង (CONMEBOL)
ក្នុងតំបន់នេះ ទទួលកៅអីទៅប្រេស៊ីលចំនួន៤កន្លះ ពោលគឺក្រុមកំពូលទាំង៤ នឹងជាប់ជាស្វ័យប្រវត្តិ ខណៈក្រុមលេខ៥ ត្រូវប្រកួត play-off ដណ្ដើមកៅអីជាមួយក្រុមលេខ៥ ក្នុងវគ្គជម្រុះតំបន់អាស៊ី (ហ្សកដានី)។ នៅយប់នេះ មាន៤ដែលត្រូវប្រកួត គឺ៖
វេណេហ្ស៊ុយអេឡា vs ប៉ារ៉ាហ្គាយ (៣:៣០ទៀបភ្លឺ)
កូឡុំប៊ី vs ឈីលី (៤:០០ទៀបភ្លឺ)
អេក្វាឌ័រ vs អ៊ុយរុយហ្គាយ (៤:០០ទៀបភ្លឺ)
អាហ្សង់ទីន vs ប៉េរូ (៦ព្រឹក)
អាហ្សង់ទីន បានកក់កៅអីទៅប្រេស៊ីល ជាស្វ័យប្រវត្តិហើយ។ កូឡុំប៊ី ឈីលី អេក្វាឌ័រ និងអ៊ុយរុយហ្គាយ ជាក្រុមនៅមានសិទ្ធិប្រជែងយកកៅអីសល់ចំនួន៣ទៀត ខណៈវេណេហ្ស៊ុយអេឡា នៅមានសង្ឃឹមដណ្ដើមកៅអី play-off (លេខ៥)។ ចំណែក ប៉េរូ, បូលីវី និងប៉ារ៉ាហ្គាយ ធ្លាក់អស់ហើយ។ មើលតារាងពិន្ទុ ដូចខាងក្រោមនេះ៖
កីឡាករក្រុមអាហ្សង់ទីនកំពុងហ្វឹកហាត់
តំបន់ CONCACAF (អាមេរិកកណ្ដាល អាមេរិកខាងជើង និងការីប៊ីន)
តំបន់នេះទទួលកៅអីទៅ World Cup 2014 ចំនួន ៣កន្លះ ពោលគឺក្រុមកំពូល៣ជាប់ទៅប្រេស៊ីលស្វ័យប្រវត្តិ ខណៈក្រុមលេខ៤ ត្រូវប្រកួត play-off ២ជើងទល់នឹងក្រុមជើងឯកអូសេអានី គឺនូវែលហ្សេឡង់ (New Zealand)។ ក្រុម២បានជាប់ស្វ័យប្រវត្តិហើយ គឺសហរដ្ឋអាមេរិក និងកូស្តារីកា ដូច្នេះសល់តែកៅអី១កន្លះទៀតប៉ុណ្ណោះសម្រាប់ក្រុម៤ផ្សេងទៀតក្នុងជុំចុងក្រោយនៃវគ្គជម្រុះតំបន់នេះ។ ប៉ុន្តែ ចាម៉ៃកា ដែលនៅបាតតារាងបានធ្លាក់ស្វ័យប្រវត្តិហើយ ខណៈ ហុងឌុយរ៉ាស់ ប៉ាណាម៉ា និងម៉ិកស៊ីកូ នៅមានឱកាសប្រជែងយកកៅអីដែលនៅសល់។ តារាងពិន្ទុក្នុងតំបន់នេះ មានដូចខាងក្រោម៖
តំបន់អាហ្វ្រិក
តំបន់នេះទទួលកៅអីទៅប្រេស៊ីលចំនួន ៥ ដូច្នេះក្រុមទាំង១០ ដែលនៅសល់ក្នុងជុំចុងក្រោយ ត្រូវប្រកួតគ្នា២ជើងដើម្បីរកអ្នកឈ្នះទាំង៥ជាប់ទៅតែម្ដង។ គូទាំង៥បានចាប់រួចរាល់ហើយ ដែលមានដូចខាងក្រោម៖
កូឌីវ័រ vs សេណេហ្គាល់
អេត្យូពី vs នីហ្សេរីយ៉ា
ទុយណេស៊ី vs កាមេរ៉ូន
ហ្គាណា vs អេហ្សីប
ប៊ូគីណាហ្វាសូ vs អាល់ហ្សេរី
ការប្រកួតជើងទី១ គឺធ្វើឡើងនៅយប់ថ្ងៃសៅរ៍ស្អែក យប់ថ្ងៃអាទិត្យ និងយប់ថ្ងៃអង្គារ ខណៈជើងទី២ ធ្វើឡើងនៅពាក់កណ្ដាលខែវិច្ឆិកាក្រោយ។ តើក្រុម៥ណា នឹងត្រូវហោះទៅលេងនៅប្រេស៊ីល ឆ្នាំ២០១៤?
ហ្គាណា កំពុងហ្វឹកហាត់ត្រៀមប្រកួត
ប្រិយមិត្តសាកទាយលមើល៍ ថាតើក្រុមណាខ្លះ នឹងទៅបង្រ្គប់កៅអីទាំង៣២ នៅ World Cup ឆ្នាំក្រោយ។ គិតមុនការប្រកួតយប់នេះ កៅអីចំនួន១០ ត្រូវបានកក់អស់ហើយ ដូច្នេះសល់តែ២២ទៀតប៉ុណ្ណោះដែលនៅសល់។ ប្រទេសទាំង១០នោះរួមមាន៖ ប្រេស៊ីល (ម្ចាស់ផ្ទះ), ជប៉ុន (អាស៊ី), អូស្រ្ដាលី (អាស៊ី), អ៊ីរ៉ង់ (អាស៊ី), កូរ៉េខាងត្បូង (អាស៊ី), ហុល្លង់ (អឺរ៉ុប), អ៊ីតាលី (អឺរ៉ុប), អាមេរិក (CONCACAF), កូស្ដារីកា (CONCACAF) និងអាហ្សង់ទីន (អាមេរិកខាងត្បូង)៕
អត្ថបទផ្សេងទៀតទាក់ទងនឹង FIFA World Cup សូមចុចត្រង់នេះ៕
0 comments:
Post a Comment