កូរ៉េខាងជើងចាប់ផ្ដើមដំឡើងសំឡេងធ្ងន់ៗដាក់អាមេរិក និងកូរ៉េខាងត្បូងទៀតហើយនៅថ្ងៃនេះដោយព្រមានថា កងយោធារបស់ខ្លួននឹងវាយប្រហារកម្ទេចនាវាផ្ទុកយន្តហោះអាមេរិក និងសម្ព័ន្ធមិត្តរបស់ខ្លួន។ ការព្រមាននេះធ្វើឡើងបន្ទាប់ពីអាមេរិក កូរ៉េខាងត្បូង និងជប៉ុនបានធ្វើសមយុទ្ធយោធារួមមួយនៅលើដែនសមុទ្រឧបទ្វីបកូរ៉េអស់រយៈពេល២ថ្ងៃកន្លងទៅ។
នាវាផ្ទុយយន្តហោះអាមេរិកដែលកូរ៉េខាងជើងព្រមានវាយកម្ទេច
ដោយមានវត្តមាននាវាផ្ទុកយន្តហោះ នាវាបាញ់មីស៊ីល ឧទ្ធម្ភាគចក្រ និងយន្តហោះចម្បាំងជាច្រើនគ្រឿងការធ្វើសមយុទ្ធយោធាខាងលើបានធ្វើឲ្យរដ្ឋកុម្មុយនិស្តមួយនេះក្ដៅក្រហាយដោយចោទថា អាមេរិកហាក់កំពុងលែងល្បែងសង្គ្រាមនុយក្លេអ៊ែរជាមួយសម្ព័ន្ធមិត្តរបស់ខ្លួននៅលើឧបទ្វីបកូរ៉េ។
យោងតាមប្រសាសន៍របស់ប្រមុខគណៈកម្មការបង្រួបបង្រួមសន្តិភាពទីក្រុងព្យុងយ៉ាងបានឲ្យដឹងដែរថា ខ្លួនបានព្រមានអាមេរិករួចហើយថា សោកនាដកម្មដ៏ធ្ងន់ធ្ងរនឹងអាចផ្ទុះឡើងជាសង្គ្រាមឆាបឆេះឡើងនៅពេលខាងមុខ ហើយថាកងកម្លាំងយោធាកូរ៉េខាងជើងទាំងអស់បានប្រុងជើងកាងរួចរាល់ហើយដែរ ដើម្បីត្រៀមវាយប្រហារកម្ទេចយោធារបស់សត្រូវដែលដឹកនាំដោយអាមេរិក។
ក៏ប៉ុន្តែ បើយោងតាមមន្ត្រីអ្នកនាំពាក្យរបស់អាមេរិកនិងកូរ៉េខាងត្បូងវិញបានប្រកាសថា ការធ្វើសមយុទ្ធយោធានេះធ្វើឡើងក្នុងគោលដៅដើម្បីការស្រាវជ្រាវ និងហ្វឹកហាត់សម្រាប់ជំរុញសមត្ថភាពកងទ័ពលើសកម្មភាពមនុស្សធម៌តែប៉ុណ្ណោះ។
ទោះបីជាយ៉ាងណាក៏ដោយ អ្នកវិភាគបាននិយាយថា ការព្រមានរបស់កូរ៉េខាងជើងគឺគ្រាន់តែចង់ទាក់ទាញចំណាប់អារម្មណ៍ទីក្រុងវ៉ាស៊ីនតោននិងទីក្រុងសេអ៊ូលឲ្យងាកមកចូលតុចរចាលើកម្មវិធីនុយក្លេអ៊ែររបស់ខ្លួនវិញតែប៉ុណ្ណោះ បន្ទាប់ពីអាមេរិកនិងកូរ៉េខាងត្បូងបានខ្វែងគំនិតគ្នាជាមួយនឹងខ្លួនលើកម្មវិធីនុយក្លេអ៊ែរដ៏ចម្រូងចម្រាសនេះ៕
0 comments:
Post a Comment