ទឹកដោះគោមានប្រយោជន៍ដល់សុខភាព ៦យ៉ាង
ទឹកដោះគោគឺជាផ្នែកមួយយ៉ាងសំខាន់នៃរបបអាហាររបស់យើង។ យើងចាប់ផ្តើមផឹកទឹកដោះគោតាំងពីយើងនៅក្មេង ប៉ុន្តែរបបអាហារបែបនេះបែរជាថយចុះទៅវិញនៅពេលយើងធំឡើង។ មនុស្សមួយចំនួនមានការអៀនខ្មាសអំពីរឿងនេះដោយសារតែពួកគេខ្លាចថា វានឹងបន្ថែមជាតិខ្លាញ់កាន់តែច្រើនក្នុងរបបអាហារពួកគេ។ អ្នកខ្លះទៀតបែរជាអោយហេតុផលថា ពួកគេលែងត្រូវការផឹកទឹកដោះគោទៀតហើយ។ ការទទួលទានទឹកដោះគោមិនដែលប្រកាន់ថាមនុស្សក្មេងចាំញ៉ាំ និងមនុស្សចាស់ហាមញ៉ាំនោះទេ ព្រោះវាគឺជាប្រភពដ៏អស្ចារ្យមួយនៃវីតាមីន និងជីវជាតិជាច្រើន ព្រមទាំងមានប្រយោជន៍ចំពោះសុខភាពទៀតផងដូចជា៖
លូតលាស់ស្បែក
ម្ចាស់ស្ត្រីនៃប្រទេសអេហ្ស៊ីបពីសម័យបុរាណ ក្លេអូប៉ាត្រា (Cleopatra) បានប្រើទឹកដោះគោលាងសម្អាតខ្លួនដើម្បីរក្សាស្បែកអោយនៅទន់, រលោង និងលូតលាស់។ អ្នកក៏អាចធ្វើដូចគ្នាបានដែរ ឬអ្នកអាចផឹកទឹកដោះគោពីរបីកែវជារៀងរាល់ថ្ងៃដើម្បីទទួលបានអត្ថប្រយោជន៍របស់វា។ ទឹកដោះគោមានជីវជាតិជាច្រើនក្នុងការជួយរក្សាស្បែកអោយមើលទៅល្អបំផុត។ វាមានជាតិឡាក់ទិចអាស៊ីតដែលអាចដើរតួរជា Exfoliant និងអង់ស៊ីមដើម្បីជួយថែរក្សាស្បែកអោយនៅរលោង។ សារធាតុអាមីណូអាស៊ីតក្នុងទឹកដោះគោក៏ជួយថែរក្សាស្បែកអោយមានសំណើមផងដែរ។ ទឹកដោះគោមានសារធាតុអង់ទីអុកស៊ីដង់សម្រាប់ជួយការពារការខូចខាតដោយសារតែជាតិពុលពីបរិដ្ឋានជុំវិញខ្លួន។ ទោះបីជាយ៉ាងណាក៏ដោយ បើសិនជាអ្នកអាឡែហ្ស៊ីនឹងទឹកដោះគោ ឬផលិតផលធ្វើពីទឹកដោះគោ វាពិតជាធ្វើអោយស្បែកមានបញ្ហាកាន់តែខ្លាំងទៀត។
ធ្មេញ និងឆ្អឹងមានសុខភាពល្អ
ទឹកដោះគោគឺជាប្រភពនៃជាតិកាលស្យូមដ៏អស្ចារ្យមួយ ដែលមានសារៈសំខាន់ក្នុងការជួយថែរក្សាឆ្អឹងអោយនៅសុខភាពល្អ។ មិនមែនមានតែកូនតូចៗរបស់អ្នកត្រូវការញ៉ាំទឹកដោះគដើម្បីឆ្អឹងលូតលាស់នោះទេ ប៉ុន្តែមនុស្សធំក៏ត្រូវការទឹកដោះគោដើម្បីឆ្អឹងរឹងមាំ និងការពារខ្លួនពីជំងឺពុកឆ្អឹងដែរ។ ទឹកដោះគោក៏ជាប្រភពដ៏អស្ចារ្យសម្រាប់ធ្មេញដ៏រឹងមាំ និងជួយការពារពីជំងឺពុកឆ្អឹងទៀតផង។ ដើម្បីអាចមានការបឺតស្រូបជាតិកាលស្យូមបាន រាងកាយត្រូវតែមានវត្តមានរបស់វីតាមីន D។ បើសិនជារាងកាយអ្នកកង្វះវីតាមីន D ចូរទិញទឹកដោះគោណាដែលមានបន្ថែមវីតាមីន Dស្រាប់ដើម្បីរាងកាយអាចបឺតស្រូបជាតិកាលស្យូមបាន។
សាច់ដុំ
ទឹកដោះគោផ្ទុកទៅដោយជាតិប្រូតេអ៊ីនដើម្បីជួយសាងសង់សាច់ដុំឡើងវិញ។ ចូរផឹកទឹកដោះគោមួយកែវក្រោយពីហាត់ប្រាណរួចដើម្បីអោយរាងកាយវិលមករកសភាពដើមវិញស្រួល។
សម្រកទម្ងន់
ការសិក្សាជាច្រើនបានអោយដឹងថា ស្ត្រីដែលផឹកទឹកដោះគោមានជាតិខ្លាញ់ទាប ឬទឹកដោះគោស្រស់ឃើញថាអាចស្រកទម្ងន់បានច្រើនជាងស្ត្រីដែលមិនផឹកទឹកដោះគោ។ វាគឺជារបបអាហារដ៏អស្ចារ្យ ព្រមទាំងជាអាហារសម្រនប្រកបដោយសុខភាពល្អដែរ។ ចូរបន្ថែមទឹកដោះគោមួយកែវសម្រាប់ជាអាហារពេលយប់របស់អ្នក ឬផឹកទឹកដោះគោមួយកែវខណៈពេលកំពុងតែញ៉ាំផ្លែឈើមួយដុំ។
បន្ថយស្ត្រេស
ទឹកដោះគោគឺជាមធ្យោបាយដ៏ល្អបំផុតមួយក្នុងការបំបាត់ភាពតានតឹងនៅពេលថ្ងៃ។ ទឹកដោះគោក្តៅឧណ្ហៗមួយកែវជួយបន្ធូរសាច់ដុំ និងបំបាត់ភាពមួរម៉ៅរបស់សរសៃប្រសាទ។ ទឹកដោះគោក៏ត្រូវបានគេអះអាងដែរថា ជួយបន្ថយរោគសញ្ញានៃអាការៈឈឺចាប់មុនមករដូវ និងប៉ូវកម្លាំង។ ដូច្នេះថ្ងៃក្រោយបើសិនជាអ្នកមានអារម្មណ៍អស់កម្លាំង ចូរសាកល្បងផឹកទឹកដោះគោមួយកែវទៅ។
រាងកាយមានសុខភាពល្អ
ទឹកដោះគោមានសមាធាតុជាច្រើនក្នុងការបញ្ចុះសម្ពាធឈាម និងកាត់បន្ថយការប្រឈមនឹងជំងឺដាច់សរសៃឈាមខួរក្បាល។ វាជួយកាត់បន្ថយការផលិតកូឡេស្ទើរ៉ុលរបស់ថ្លើម និងជួយបន្សាបជាតិអាស៊ីតទៀតផង។ វីតាមីន A និង B ក្នុងទឹកដោះគោអាចជួយធ្វើអោយភ្នែកមើលឃើញច្បាស់ល្អ និងបន្ថយការប្រឈមនឹងជំងឺមហារីកជាច្រើនផងដែរ៕
0 comments:
Post a Comment