Real Madrid នៅតែលេខ៣ក្នុងតារាង តែ CR7 ឡើងលេខ១ Top Scorer

ក្រុមស្ដេចស Real Madrid បានទទួល៣ពិន្ទុបន្ថែម ក្រោយឈ្នះ Rayo Vallecano ៣-២ យប់មិញនេះ ប៉ុន្តែមិនគ្រប់គ្រាន់ឲ្យក្រុមនេះលោតផុតពីលេខ៣នោះទេ។ យ៉ាងណាក្ដី ការស៊ី២គ្រាប់ម្នាក់ឯងរបស់ Cristiano Ronaldo បានធ្វើឲ្យបេក្ខភាពដណ្ដើមពានរង្វាន់ Ballon d’Or ២០១៣ រូបនេះ ឡើងឈរលើគេក្នុងតារាងអ្នកស៊ុតបញ្ចូលទី (Top Scorer) ពោលគឺរកបាន១៣គ្រាប់ លើស Diego Costa របស់ Atletico Madrid ១គ្រាប់។

Ronaldo អបអរក្រោយស៊ុតបញ្ចូលទី

មិនខុសពីសប្ដាហ៍មុននោះទេ ខ្សែប្រយុទ្ធសញ្ជាតិបារាំង Karim Benzema និងកីឡាករតម្លៃខ្លួនថ្លៃបំផុតក្នុងលោក Gareth Bale ក៏លេចធ្លោក្នុងការប្រកួតនេះដូច Ronaldo ដែរ។ Benzema បានស៊ុតបញ្ចូលទី១គ្រាប់ ខណៈ Bale មិនបានស៊ុតបញ្ចូលទីទេ ប៉ុន្តែបានបញ្ជូនឲ្យ Benzema ស៊ុត១គ្រាប់ និងបញ្ជូនឲ្យ Ronaldo ស៊ុត១គ្រាប់។

យ៉ាងណាក្ដី ក្រុមបាតតារាង Rayo Vallecano ក៏បានធ្វើឲ្យក្រុមលោក Carlo Ancelotti ភ័យបុកពោះបន្តិចដែរ ក្រោយសងវិញពីរគ្រាប់ជាប់គ្នា ដោយការស៊ុតបាល់ពិន័យ១១ម៉ែត្ររបស់ Jonathan Viera ទាំង២គ្រាប់។

តារាងចំណាត់ថ្នាក់ La Liga៖