ចេញពីខារ៉ាអូខេ បើករថយន្តបុករបងវិទ្យាស្ថានខ្ទាត ទៅបោកបង្គោលភ្លើង ផ្លោងទៅបុកអ្នកថ្មើរជើង របួសធ្ងន់ម្នាក់ ស្រាលម្នាក់
ភ្នំពេញ៖ នារីម្នាក់របួសធ្ងន់ និងបុរសម្នាក់របួសស្រាល ខណៈពេលកំពុងបណ្តើរគ្នាតាមផ្លូវ ស្រាប់តែរថយន្តឡិចស៊ីស GS300 ទើបនឹងចេញពីខារ៉ាអូខេ បើកលឿនដូចហោះ ទៅបុករះរបងវិទ្យាស្ថានមួយ ហើយវេគូទរថយន្តទៅបោកនឹងបង្គោលភ្លើង ធ្វើឲ្យរថយន្តផ្លោងទៅបុកអ្នកថ្មើរជើង២នាក់ កំពុងដឹកដៃគ្នារត់ឆ្លងផ្លូវ ។
គ្រោះថ្នាក់នេះកើតឡើងនៅវេលាម៉ោង១២ និង២០នាទីរំលងអធ្រាត្រឈានចូលថ្ងៃទី៦ ខែមករា មុខវិទ្យាស្ថានប្រតិបត្តិការអន្តរជាតិកម្ពុជា តាមផ្លូវលេខ១៨២ សង្កាត់ទឹកល្អក់ទី២ ខណ្ឌទួលគោក ។
បុរសម្នាក់រងរបួសស្រាលបានឲ្យដឹងថា មុនពេលកើតហេតុរូបគេនិងមិត្តភក្កិស្រីម្នាក់កំពុងតែដើរតាមផ្លូវនៅខាងឆ្វេងដៃស្រាប់តែឃើញរថយន្តឡិចស៊ីស GS300 ពណ៌ស ពាក់ស្លាកលេខ ភ្នំពេញ 2W 00006 បើកបរក្នុងស្ថានភាពស្រវឹងជិះរេពេញផ្លូវហើយបើកបរលឿនដូចហោះ ឃើញបែបនេះរូបគេទាំង២នាក់ បានដឹកដៃគ្នារត់ឆ្លងផ្លូវ ដើម្បីគេចពីរថយន្ត ប៉ុន្តែរថយន្តបើកលឿនពេក គ្រាន់តែដឹកដៃគ្នារត់មិនទាន់ផុតផង ស្រាប់តែរថយន្តរេចង្កូតទៅខាងឆ្វេងដៃ ទៅបុករះរបងវិទ្យាស្ថានប្រតិបត្តិការអន្តរជាតិកម្ពុជា រួចទៅបុកទ្វាររបងធ្វើឲ្យវេគូទរថយន្តបោកនឹងបង្គោលភ្លើង ហើយផ្លោងទៅបុកនារីម្នាក់ រងរបួសធ្ងន់ និងបុរសម្នាក់ រងរបួសស្រាល ។
អ្នករត់ម៉ូតូឌុបបានឲ្យដឹងថា រថយន្តបង្កទើបនឹងបើកចេញពីខារ៉ាអូខេនគរសំរឹទ្ធ ដោយមានអ្នកជិះក្នុងរថយន្ត ៤នាក់ ស្រីម្នាក់ ប្រុស៣នាក់ ស្រវឹងជោកជាំ បើករថយន្តពីលិចទៅកើត មកដល់ចំណុចខាងលើ រេចង្កូតទៅបុករះរបងវិទ្យាស្ថានប្រតិបត្តិការអន្តរជាតិកម្ពុជាហើយវេទៅបោកនឹងបង្គោលភ្លើង ផ្លោងទៅបុកមនុស្សពីរនាក់ ដែលកំពុងតែដឹកដៃគ្នារត់ឆ្លងផ្លូវមិនទាន់ផុតផង បណ្តាលឲ្យរងរបួសធ្ងន់ម្នាក់ ស្រាលម្នាក់ ចំណែករថយន្តខូចខាតទាំងស្រុង ។
ក្រោយពេលកើតហេតុ អ្នករងរបួសត្រូវបានដឹកម៉ូតូ យកទៅព្យាបាលនៅមន្ទីរពេទ្យព្រះកុសុមៈ ចំណែកអ្នកជិះក្នុងរថយន្ត នាំគ្នារត់គេចខ្លួន បន្សល់ទុករថយន្តដែលខូចខាតទាំងស្រុង ត្រូវសមត្ថកិច្ចយកទៅរក្សាទុក នៅការិយាល័យនគរបាលចរាចរណ៍ផ្លូវគោក ៕
ប្រភពពី៖ www.khmer-note.com
0 comments:
Post a Comment