សម្រាប់ថ្ងៃនេះ ក្នុងចំណោម៩ប្រភេទកីឡា ដែល កម្ពុជា កំពុងប្រកួត កីឡាតេក្វាន់ដូរកបានមេដាយសំរឹទ្ធ ក្នុងវិញ្ញាសាសម្ដែងទោលនារី រីឯកីឡាផ្សេងទៀតកំពុងប្រកួតយ៉ាងស្វិតស្វាញ។
កីឡាការិនីវ័យក្មេងរូបស្រស់ ឈឿង លីណា រកបានមេដាយសំរឹទ្ធ១មួយគ្រឿង ក្នុងប្រភេទកីឡាតេក្វាន់ដូ វិញ្ញាសាសម្ដែងទោល តែចាញ់ក្នុងវិញ្ញាសាសម្ដែងជាគូ។ កីឡាករ ផល សុវណ្ណាត ទទួលបានពិន្ទុទាបជាងគេក្នុងវិញ្ញាសាសម្ដែងទោល ខណៈកីឡាករ ជាង ចិត្រា ចាញ់កីឡាករ ថៃ ដោយពិន្ទុ ១៨-១ នៅវគ្គដំបូង។
កីឡាការិនីកម្ពុជា លីណា ឈ្នះមេដាយសំរឹទ្ធ
ចំណែកកីឡាប៉េតង់វិញ្ញាសា Mixed Triple (ប្រុស១ស្រី២) ដែលកំពុងប្រកួតក្នុងវគ្គជម្រុះជាមួយ៧ប្រទេសផ្សេងទៀត ប្រកួតបាន២លើកហើយ។ បើកឆាកដំបូងចាញ់ វៀតណាម ១៣-១ តែយកឈ្នះលើ ឥណ្ឌូណេស៊ី វិញ ដោយពិន្ទុ ១៣-០។ រីឯវិញ្ញាសា Mixed Triple (ប្រុស២ស្រី១) ឯណោះ កម្ពុជា ប្រកួតបាន២លើកឈ្នះទាំង២ ក្នុងនោះលត់ម្ចាស់ផ្ទះ ១៣-០ និងស៊ី ថៃ ១៣-២។
កីឡាករជិះសេះកម្ពុជា ស៊ីម ណារិទ្ធ ជាប់លេខ៧
រីឯកីឡាទូកប្រពៃណីផ្នែកបុរស កម្ពុជា ទទួលបានចំណាត់ថ្នាក់លេខ៤ នៅវគ្គផ្ដាច់ព្រ័ត្រ ដោយប្រើថិរៈ វេលា ៤នាទី៣៤.៦៥៩វិនាទី ចំណែកកីឡាជិះសេះវិញ្ញាសាលោតផ្លោះរបារ កីឡាករ ស៊ីម ណារិទ្ធ ឈរលំដាប់ទី៧ ស្របពេលកីឡាករ ស ពុធមិនា ឈរលេខ៩ ក្នុងចំណោមអ្នកប្រកួតប្រជែង១៤នាក់ នៅវគ្គផ្ដាច់ព្រ័ត្រ។
គួរឲ្យសោកស្ដាយ កីឡាករ ឌុន សម្ជស្ស បានប្រកួតចាញ់ម្ចាស់ផ្ទះ មីយ៉ាន់ម៉ា និងឡាវ ហើយកីឡាការិនី សុវណ្ណ រចនា ក៏ចាញ់ ឥណ្ឌូណេស៊ី ដែរ ដូចនេះអ្នកទាំងពីរមិនអាចឈានទៅ វគ្គពាក់កណ្ដាលផ្ដាច់ព្រ័ត្របានទេ ក្នុងប្រភេទកីឡាសូរីនជីកេមប៉ូ វិញ្ញាសាប្រយុទ្ធ៕
អត្ថបទ៖ រស់ កាណាល់
0 comments:
Post a Comment