មានមតិជាច្រើនក្នុងបណ្ដាញសង្គមឬពីមាត់មួយទៅមាត់មួយថា ក្លិបថ្មីដែលទើបបង្កើតនាចុងឆ្នាំមុន TriAsia Phnom Penh FC គឺ ជាក្លិបអ្នកមាន និង ហ៊ានឲ្យប្រាក់ខែកីឡាករខ្ពស់ៗថ្វីបើមិនទាន់ឡើងមកដល់ ក្របខ័ណ្ឌកំពូលក៏ដោយ។ ដើម្បីឲ្យអស់ចម្ងល់យើងខ្ញុំសូមនាំបទសម្ភាសន៍ជាមួយប្រធានក្លិបនេះជូនមិត្តអ្នកអានដូចខាងក្រោម៖
Sabay៖ ប្រិយមិត្តបាល់ទាត់ជាច្រើននៅកម្ពុជាកម្រឃើញលោកទៅទស្សនា បាល់ទាត់លីកកំពូលនៅកម្ពុជាណាស់ ហេតុអ្វីបានលោកចាប់អារម្មណ៍បង្កើតក្លិបនេះឡើង?
Tomoyuki Yokoi ៖ វាមិនសំខាន់ទេថាខ្ញុំបានទៅមើលញឹកញាប់ប៉ុណ្ណានោះ ប៉ុន្តែ ខ្ញុំស្រលាញ់បាល់ទាត់។ ទោះយ៉ាងណា ខ្ញុំបានទៅទស្សនាបាល់ទាត់ខ្មែរបានប្រហែលពីរបីប្រកួតដែរមុន ឈានទៅដល់ការបង្កើតក្លិប។ ខ្ញុំយល់ឃើញថា កីឡាករខ្មែរ និង បាល់ទាត់ខ្មែរមានសក្ដានុពល។ នេះជាការរួមចំណែកដើម្បីជួយអភិវឌ្ឍន៍បាល់ទាត់បន្ថែម។
ក្រុម TriAsia PP FC (រូបថត៖ FB TriAsia PP FC)
Sabay៖ ចុះបើក្លិបរបស់លោកមិនអាចឡើងមកកាន់លីកកំពូលបន្ទាប់ពី ជម្រុះនៅពាក់កណ្ដាលខែតុលានោះ លោកគិតយ៉ាងម៉េចវិញ?
Tomoyuki Yokoi ៖ យើងអត់មានវិធីអ្វីក្រៅពី ការព្យាយាមម្ដងទៀតឡើយ។ យើងនឹងរៀបចំក្រុមឡើងវិញដើម្បីឲ្យបានល្អជាងនេះបើសិនមិនបានឡើងមកនៅឆ្នាំ២០១៤ ហើយ យើងនៅតែមានសង្ឃឹមឡើងមកលេង លីកកំពូលកម្ពុជាបាន។
Sabay៖ ចុះប្រសិនបើប្រកួតជម្រុះចប់នាពាក់កណ្ដាលខែ តុលាខាងមុខ តើក្លិបមានគម្រោងអ្វីបន្ថែមទៀត?
Tomoyuki Yokoi៖ គម្រោង គឺរៀបចំក្រុមឲ្យបានល្អប្រសើរឡើងដើម្បីឲ្យមានការប្រកួត ប្រជែងខ្ពស់។ ជាងនេះទៅទៀត បើយើងឡើងដល់លីក យើងមានគម្រោងសាងសង់ទីលានខ្លួនឯង នៅឆ្នាំ២០១៤ តែមិនទាន់ដឹងពីទីកន្លែងច្បាស់លាស់នៅឡើយទេនាពេលនេះ។ ខ្ញុំមិនទាន់ច្បាស់ថា ខែណាទេ ប៉ុន្តែអាចចាប់ផ្ដើមនៅខែណាមួយ ឬ ចុងឆ្នាំឆ្នាំ២០១៤។ ផ្ទុយទៅវិញ បើអត់ជាប់យើងអត់ទាន់មានគម្រោងបង្កើតទីលានខ្លួនឯងឡើយ។ ជាមួយគ្នានេះ ខ្ញុំមានគម្រោងបង្កើនថវិកាដើម្បីទ្រទ្រង់ក្លិប និង ស្វែងរកប្រាក់អ្នកឧបត្ថម្ភបន្ថែម។
Sabay៖ ឮថា Albirex Niigata របស់ សិង្ហបុរី ដែលមានមូលដ្ឋានដើមនៅ ប្រទេស ជប៉ុននោះគ្រោងមកបង្កើតសាខានៅស្រុកខ្មែរ តើលោកមានទំនាក់ទំនងជាមួយក្លិបនេះដែរ ឬ យ៉ាងណា?
Tomoyuki Yokoi៖ ខ្ញុំមានទំនាក់ទំនងតិចតួចប៉ុណ្ណោះ។ ខ្ញុំអត់មានពាក់ព័ន្ធនឹងក្រុមនេះទេ ហើយ ខ្ញុំគិតតែធ្វើម៉េចដើម្បីអភិវឌ្ឍក្លិបរបស់ខ្ញុំឲ្យដើរទៅមុខ។ ខ្ញុំមិនជ្រៀតជ្រែកការងាររបស់គេនោះទេ។
Sabay៖ ចុះល្បីថា ក្លិបរបស់លោកជាក្លិបអ្នកមាន ហើយ ហ៊ានឲ្យប្រាក់ខែកីឡាករច្រើន តើជាការពិតឬ?
Tomoyuki Yokoi៖ មិនមែនដូច្នេះទេ។ តាមពិត ខ្ញុំមានការលំបាកណាស់ក្នុងការរកអ្នកឧបត្ថម្ភជួយដល់ក្លិប។ បើសិនខ្ញុំមាន ខ្ញុំមិនបាច់ទៅស្វែងរកអ្នកឧបត្ថម្ភបន្ថែមនោះទេទាំងនៅកម្ពុជា និង ប្រទេសជប៉ុន។ ប៉ុន្តែ នេះជាការងារមួយដែលខ្ញុំពេញចិត្តដើម្បីទ្រទ្រង់ក្លិបរបស់ខ្ញុំ។ ក្លិបរបស់ខ្ញុំ នឹងកាន់តែធ្វើឲ្យមានការប្រកួតប្រជែងដ៏ស្រួចស្រាល់នាថ្ងៃអនាគតខាង មុខមិនខាននៅកម្ពុជា។
លោក Tomoyuki Yokoi កាល បង្កើត ក្លិប កាល ខែ ធ្នូ ២០១២
TriAsia Phnom Penh F.C គឺជាក្រុមជើងឯកក្នុងក្របខ័ណ្ឌ ”ក១” ឆ្នាំ២០១៣ នេះក្រោយយកឈ្នះ ក្រុមខេត្តតាកែវ ២-០ នៅវគ្គផ្ដាច់ព្រ័ត្រ។ ចាប់ពីថ្ងៃទី ១២ តុលាខាងមុខ ក្រុមនេះនឹងប្រកួតជម្រុះវិលជុំទល់នឹងក្រុម ព្រឹទ្ធសភា អាស៊ីអឺរ៉ុប និង តាកែវ នៅពហុកីឡដ្ឋានជាតិដើម្បីដណ្ដើមកៅអីឡើងទៅលេងក្របខ័ណ្ឌ មិត្តហ្វូនខេមបូឌានលីក រដូវកាលក្រោយ។ ក្រុមនេះត្រូវបានបង្កើតឡើងនៅខែ ធ្នូ ឆ្នាំ២០១២ ដែលមានក្រុមហ៊ុន TriAsiaGroup និង Soken Cambodia Co.LTD ជាអ្នកឧបត្ថម្ភធំ។
តើ TriAsia អាចឡើងមកកាន់លីកកំពូងឬយ៉ាងនារដូវកាលឆ្នាំ២០១៤ ខាងមុខ?
0 comments:
Post a Comment