កន្លងមក ប្រិយមិត្តស្នេហាកីឡាប្រដាល់តែងដឹងឮជារឿយៗ ពីការការប្រកួតខុសប្រក្រតីរបស់កីឡាករប្រដាល់ក្បាច់គុនខ្មែរមួយចំនួន ខណៈការដាក់ពិន័យបញ្ឈរជើងមិនឲ្យឡើងរេញរបស់គណៈកម្មការវិន័យនៃសហព័ន្ធកីឡាប្រដាល់កម្ពុជាពុំមានប្រសិទ្ធភាពមួយរយភាគរយឡើយ ប៉ុន្តែខាងអ្នកជំនាញថា ច្បាប់ពិន័យរបស់សហព័ន្ធគ្រប់គ្រាន់ហើយសម្រាប់ចាត់វិធានការភាពមិនប្រក្រតីនេះ។
ពាក់ព័ន្ធនឹងករណីខាងលើនេះ លោក នាង ស៊ីវុត្ថា អ្នកគ្រប់គ្រងកម្មវិធីប្រដាល់របស់ទូរទស្សន៍បាយ័ន បានលើកឡើងពីបញ្ហាខាងលើដូច្នេះថា បញ្ហាប្រកួតមិនប្រក្រតីកើតឡើងស្ទើរតែគ្រប់សង្វៀនទាំងអស់ ប៉ុន្តែឥលូវមានតិចតួចបំផុត។ កន្លងមកខាងសង្វៀនបាយ័នធ្លាប់បានជម្រាបដល់ គណៈកម្មការអាជ្ញាកណ្ដាល ប្រធានអង្គចៅក្រម ក៏ដូចជាសហព័ន្ធផ្ទាល់ ឲ្យជួយពង្រឹងលើបញ្ហានេះទៅគ្រប់កីឡាករតាមក្លឹបនីមួយៗ។ បើកីឡាករស្រឡាញ់កិត្តិយស គេមិនធ្វើរឿងបែបនេះទេ តែបើមួយចំនួនដែលគិតខ្លីនោះ អាចនឹងយល់ព្រមលក់ឧត្តមគតិឲ្យពួកឈ្មួញភ្នាល់ប្រដាល់មិនខាន។
សូមចុចអាន៖ អ្នកប្រដាល់ឡើងសង្វៀនគ្រាន់តែប្រឡែងគ្នា?
លោកបាននិយាយថា ៖«តាមខ្ញុំសង្កេតមើល អ្នកលេងលក់ប្រកួតហ្នឹង មានប្រហែល២៥ភាគរយ។
“តែបើនិយាយម្យ៉ាងទៀត ដូចដឹងស្រាប់ហើយ កត្តាជីវភាពជំរុញឲ្យកីឡាករភាគច្រើនចាប់អាជីពប្រដាល់ នេះដោយសារគ្នារៀនបានទាប គ្មានចំណេះជំនាញ ឬការងារធ្វើច្បាស់លាស់។ ខ្ញុំគិតថា ជីវភាព ជាបញ្ហាចម្បងធ្វើឲ្យមានការលក់ការប្រកួត»។
ទោះយ៉ាងណាប្រធានកីឡារូបនេះបន្ថែមថា ខាងសង្វៀនរបស់លោកមិនផ្ដល់តម្លៃខ្លួនឡើយសម្រាប់ការប្រកួតខុសពីប្រក្រតី។ លោកថា ៖«យើងរាយការណ៍ដល់ក្លឹបរបស់គេ រួមទាំងសហព័ន្ធផងដែរ។ តែយើងមិនមែនដល់ថ្នាក់ខុសដៃយកដៃ ខុសជើងយកជើងនោះទេ បើឲ្យតែឃើញខុសបញ្ឈប់ៗអញ្ចឹង ច្បាស់ជាជួបកង្វះធនធានហើយ ព្រោះសព្វថ្ងៃកីឡាករតិចស្ទើរឆ្លើយតប មិនបានទៅតាមតម្រូវការរបស់ស្ថានីយនានាផងទេ»។
ប៉ុន្តែក៏មិនមែនមានន័យថា ធ្វើធូររលុងពេកដែរ ត្បិតបញ្ហានេះអាចប៉ះពាល់ដល់កិត្តិយសសហព័ន្ធ ពិសេសប្រទេសជាតិតែម្ដង។ ចុងក្រោយ លោកសំណូមពរឲ្យសហព័ន្ធ ដូចជាអ្នកពាក់ព័ន្ធទាំងអស់ មេត្តារិះរកវិធានការបន្ថែម ដើម្បីឈានទៅលុបបំបាត់ការលក់ការប្រកួតឲ្យអស់តែម្ដងប្រកបដោយប្រសិទ្ធភាព។
សូមចុចអាន៖ អ្នកប្រដាល់បរិញ្ញាបត្រ សុវណ្ណឌឿន ទំនងនឹងលាសង្វៀនដោយមិនងាកក្រោយ
ចំណែកលោក ម៉ា សេរី ប្រធានផ្នែកកីឡា CTN បញ្ជាក់ថា កាលពី៧ទៅ៨ឆ្នាំមុនសម្បូរច្រើនការប្រកួតខុសពីប្រកួត ប៉ុន្តែប៉ុន្មានឆ្នាំចុងក្រោយនេះពុំសូវកើតមានទេពេលខ្លះមួយខែមានមួយ ឬគ្មានតែម្ដង។ កីឡាករ១០០នាក់មានតែម្នាក់ប៉ុណ្ណោះដែលធ្វើរឿងអញ្ចឹង។ កីឡាករលក់ខ្លួន ឬប្រកួតមិនប្រក្រតីមានពីរបែបគឺការប្រកួតលក់ឲ្យឈ្មួញភ្នាល់តម្លៃ២៥០ដុល្លារទៅ៥០០ដុល្លារ ដើម្បីដោះទ័លជីវភាព និងម្យ៉ាងទៀតកីឡាករយកការលក់ជាមុខរបរតែម្ដង។
ទោះយ៉ាងណា ពេលរកឃើញភាពមិនប្រក្រតី ខាងសង្វៀនទុកភារកិច្ចនេះជូនក្រុមប្រឹក្សាវិន័យរបស់សហព័ន្ធ ចាត់ការតាមច្បាប់ដែលបានចែង។ ចំពោះកីឡាករដែលប្រព្រឹត្តក្រោយទទួលពិន័យរួចហើយ ត្បិតខាងសង្វៀនស្គាល់មុខគាត់ច្បាស់ ប៉ុន្តែបើខាងក្លឹប ឬគ្រូបង្វឹកធានាអះអាងថា គេកែខ្លួនហើយ ខាងសង្វៀនស៊ីធីអិននៅតែផ្ដល់ឱកាសឲ្យគេម្ដងទៀត។ ដូចដឹងស្រាប់ហើយជីវិតអ្នកប្រដាល់ខ្មែរយ៉ាងម៉េច បើខុសហើយឈប់ឲ្យគេឡើងរេញទៀតនោះ មុខជាដាច់បាយហើយ។
លោក ម៉ា សេរី បន្តទៀតថា ៖«សម្រាប់ច្បាប់ដាក់វិន័យលើកីឡាករត្រឹមប៉ុណ្ណេះ ខ្ញុំគិតថា គ្រប់គ្រាន់ហើយ តែខ្ញុំសុំអំពាវនាវដល់អ្នកលេងភ្នាល់ទាំងឡាយ សុំមេត្តាបញ្ឈប់ទៅ បើឈប់មិនបានសូមកុំទិញកីឡាករ លេងដោយយុត្តិធម៌ កុំបង្កើតវប្បធម៌ពុករលួយអី វាមិនរីកចម្រើនដល់ប្រទេសទេ។ ចំណែកកីឡាករក៏អញ្ចឹងដែរ ត្រូវគិតឲ្យវែងឆ្ងាយយកកិត្តិយសជាធំ កុំលក់ឧត្ដមគតិរបស់ខ្លួន ដើម្បីលុយកខ្វក់ទាំងនោះ ព្រោះវានាំឲ្យខាតបង់ទាំងអស់ ពិសេសមុខមាត់របស់យើង»។
សូមចុចអាន៖ កែវ រំចង់និងឡុង សុភីជួបគ្នាលើកទី៩
ងាកទៅប្រធានគណៈកម្មការអាជ្ញាកណ្ដាល លោក មាស សុខគ្រី លើកឡើងថា ច្បាប់របស់សហព័ន្ធមាន៤ដំណាក់កាល។ លោកថា ៖«លើកទី១ បញ្ឈរជើងពីការប្រកួត១ខែកន្លះ ក្នុងករណីមិនរាងចាល ត្រូវបញ្ឈរជើង៣ខែ បើនៅតែធ្វើបែបហ្នឹងទៀត បញ្ឈរជើង៦ខែ ហើយបើកែលែងឡើងគឺមានតែលុបឈ្មោះពីបញ្ជីសហព័ន្ធចោលតែម្ដង។ ច្បាប់ពិន័យរបស់សហព័ន្ធប៉ុណ្ណឹង វាគ្រប់គ្រាន់ណាស់ទៅហើយ ឲ្យតែយើងអនុវត្តន៍វាបានល្អដូចសព្វថ្ងៃទៅ បើចង់យកវាទៅដាក់ពន្ធនាគារ ក៏មិនត្រូវដែរ»។
ជាមួយគ្នានេះលោកសូមអង្វរដល់ដើមចមនៃបញ្ហា គឺអ្នកលេងល្បែងភ្នាល់ទាំងអស់ សូមមេត្តាបញ្ចប់ការទិញកីឡាករដែលធ្វើឲ្យកីឡាករខ្សោយបែរជាឈ្នះអ្នកខ្លាំង។ កីឡាករខ្លួនឯងក៏អញ្ចឹងដែរ កុំប្រព្រឹត្តពុករលួយ ត្រូវគិតដល់កិត្តិយសគ្រូ ក្លឹប សហព័ន្ធ ជាពិសេសមុខមាត់សាមីខ្លួន និងប្រពន្ធកូនតែម្ដង។
គេនៅចាំបានថា កីឡាករប្រដាល់វ័យក្មេង ហុន ឈុនហេង និងឈិត ង៉ុយ ត្រូវបានអាជ្ញាកណ្តាលបណ្ដេញចុះពីសង្វៀនពីរដងជាប់គ្នា។ លើកទីមួយពួកគេត្រូវបានបណ្ដេញចេញពីសង្វៀនបាយ័នកាលពីខែមុន ហើយពួកគេជួបគ្នាម្ដងទៀតនៅសង្វៀនប៉ុស្តិ៍លេខ៣ក៏ត្រូវបានបណ្ដេញដោយមិនប្រកាសលទ្ធផលម្ដងទៀត៕
0 comments:
Post a Comment