ជាដំណឹងល្អ សម្រាប់ប្រិយមិត្តនៅកម្ពុជា ដែលកំពុងទន្ទឹងរង់ចាំ iPhone 5S និង iPhone 5C។ ឥឡូវនេះ ម៉ូដែលចុងក្រោយរបស់ក្រុមហ៊ុន Apple ទាំងពីរស៊េរីនេះ មកដល់ប្រទេសកម្ពុជាល្ងាចនេះហើយ ខណៈតម្លៃអា 5S ខ្ទង់ជិត ២ពាន់ដុល្លារ ចំណែក 5C តម្លៃក្រោម ១០០០ដុល្លារ។
គិតត្រឹមម៉ោងនេះ មានតែហាងមួយគត់នៅកម្ពុជា ដែលប្រកាសថា មានលក់ល្ងាចនេះ គឺស្របពេលនឹងការចេញលក់នៅប្រទេសចំនួន ១១ ដំបូងគេក្នុងពិភពលោក។ ម្ចាស់ហាង Apple Media បានប្រាប់ Sabay អម្បាញ់មិញនេះថា ហាងលោកមានលក់ម៉ូដែលទាំងពីរនៅល្ងាចនេះហើយ។
បើតាមតម្លៃទូរសព្ទដែលហាង Apple Media ប្រកាសនេះ គឺ iPhone 5S មានតម្លៃមិនធម្មតាទេ ដែលក្នុងនោះប្រភេទទំហំ 16GB ថ្លៃ ១៧៥០ដុល្លារ, 32GB តម្លៃ ១៨៥០ដុល្លារ និង 64 GB តម្លៃ ១៩៥០ដុល្លារ។ ចំណែក iPhone 5C វិញ តម្លៃ ៧៥០ដុល្លារ ចំពោះប្រភេទទំហំ 16GB, ៨៥០ដុល្លារទំហំ 32GB និង៩៥០ដុល្លារចំពោះប្រភេទទំហំ 64GB។
ម្ចាស់ហាងដដែលរូបនេះ បានបញ្ជាក់ទៀតថា តម្លៃនេះជាតម្លៃជាក់លាក់ ដែលបានដាក់លក់នៅលើគេហទំព័ររបស់លោកផ្ទាល់។ លោកបានបញ្ជាក់បន្ថែមទៀតថា រហូតមកដល់ពេលនេះ មានអតិថិជនជាច្រើនបានកុម្ម៉ង់ទិញទាំង iPhone 5S និង iPhone 5C។
ថ្ងៃទី២០ កញ្ញានេះ iPhone ទាំងពីរស៊េរីមានលក់នៅ អាមេរិក កាណាដា ចិន បារាំង អាល្លឺម៉ង់ ជប៉ុន សិង្ហបុរី និងអង់គ្លេស ខណៈដែលអូស្ត្រាលីជាប្រទេសដែលមានលក់មុនគេ។ តាមការប្រកាសពីក្រុមហ៊ុន Apple នាពេលកន្លងមក iPhone 5S លក់នៅប្រទេសអង់គ្លេសតម្លៃ ៨៦០ដុល្លារ (16GB) ៩៩០ដុល្លារ (32GB) និងទំហំ 64GB តម្លៃ ១១២០ដុល្លារអាមេរិក ខណៈដែល iPhone 5C តម្លៃចន្លោះពី៧០០ ទៅ ៨០០ដុល្លារ៕
តម្លៃប៉ុណ្ណឹង យ៉ាងម៉ែចដែរប្រិយមិត្ត? ចង់ទិញមួយណា?
0 comments:
Post a Comment