ក្លិបភ្នំពេញក្រោនបង្កើនធនធានគ្រូបង្វឹកបាល់ទាត់កម្រិត D ដើម្បីជួយអភិវឌ្ឍបាល់ទាត់ថ្នាលនៅកម្ពុជាបានចំនួន៣៩នាក់បន្ថែមទៀតកាលពីម្សិលមិញ បន្ទាប់ពីបើកវគ្គសិក្សាតាំងពីថ្ងៃទី០៩ ខែកញ្ញាមក។
ក្រោមការអនុញ្ញាតនិងលើកទឹកចិត្តពីសហព័ន្ធកីឡាបាល់ទាត់កម្ពុជា (FFC) ក្រុមជើងឯកលីកកំពូលកម្ពុជា៤សម័យ បានផ្ដួចផ្ដើមបើកវគ្គបណ្ដុះបណ្ដាលគ្រូបង្វឹកថ្នាលដែលមានរយៈពេល១០ថ្ងៃនៅទីលានបាល់ទាត់ RSN Stadium ដែលមានគ្រូបង្វឹករបស់ក្រោន លោក Sam Schweingruber ជាគ្រូឧទ្ទេស។
អត្ថបទ៖ U23 ម៉ាឡេស៊ី កៅឆាយពានមួយមុនស៊ីហ្គេម មកដល់
ក្រោយសិក្សាទ្រឹស្ដីក្នុងថ្នាក់និងអនុវត្តផ្ទាល់លើទីលានដោយជោគជ័យអស់ជាងមួយសប្ដាហ៍រួចមក សិក្ខាកាមទាំង៣៩នាក់ ដែលមានកីឡាកររបស់ភ្នំពេញក្រោន២០នាក់និងបុគ្គលិកនៃស្ថាប័ននានា ទទួលបានវិញ្ញាបនបត្របញ្ជាក់ការសិក្សាម្នាក់មួយក្នុងថ្ងៃសុក្រម្សិលមិញ ក្រោមការប្រគល់ផ្ទាល់ពីលោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា។ ក្នុងនោះខ្សែប្រយុទ្ធ គួច សុកុម្ភៈ ទទួលបានចំណាត់ថ្នាក់លេខ១ប្រចាំវគ្គ ដោយទទួលបានពិន្ទុច្រើនជាងគេ។
អត្ថបទ៖ ភ្នំពេញក្រោនឈូសដីពង្រីកស្តាតផ្ទាល់ខ្លួនត្រៀមរដូវកាលថ្មី
ក្នុងឱកាសបិទវគ្គម្សិលមិញ គ្រូបង្វឹកសញ្ជាតិស្វីស Sam ដែលជាគ្រូឧទ្ទេសរបស់ FIFA ផងនោះ ឱ្យដឹងពីគោលបំណងរបស់លោកអំពីការបង្កើតវគ្គ D នេះឡើងថាបច្ចុប្បន្នកម្ពុជាបានធ្លាក់ដល់ចំណាត់ថ្នាក់ទី១៩៩របស់ FIFA ក្នុងចំណោមក្រុមជម្រើសជាតិទាំង២០៩ ដែលជាចំណាត់ថ្នាក់គួរឱ្យស្រក់ទឹកភ្នែកសម្រាប់ប្រជាជនកម្ពុជា។ ដូច្នេះកម្ពុជាត្រូវបង្កើនថ្នាលយុវជនបាល់ទាត់ត្រឹមត្រូវឱ្យបានកាន់តែច្រើនជាងបច្ចុប្បន្ននេះដើម្បីស្ដារមុខមាត់បាល់ទាត់កម្ពុជាឡើងវិញ ហើយគ្រូបង្វឹកកម្រិត D នេះឯងជាអ្នកដើរតួសំខាន់ក្នុងការបង្វឹកក្មេងៗអាយុចន្លោះពី៦ដល់១២ឆ្នាំឱ្យយល់ពីមូលដ្ឋានគ្រឹះបាល់ទាត់ត្រឹមត្រូវនិងមានទម្លាប់ត្រឹមត្រូវតាំងពីតូចទៅ។ មួយវិញទៀត ក៏គឺដើម្បីឱ្យកីឡាករអាជីពរបស់ភ្នំពេញក្រោនមានមូលដ្ឋានផ្នែកបង្វឹកឱ្យហើយដើម្បីត្រៀមខ្លួនធ្វើជាគ្រូបង្វឹកពិតប្រាកដនៅក្រោយពេលកីឡាករទាំងនោះឈប់លេងបាល់ទាត់ សម្រាប់ជាអាជីពថ្មីដើម្បីចិញ្ចឹមជីវិត។
ព័ត៌មានទាក់ទងនឹងកីឡាបាល់ទាត់ជាតិច្រើនទៀតសូមចុចត្រង់នេះ…
ជាមួយគ្នានេះដែរ លោក គល់ សុផាណា ថ្លែងថាសហព័ន្ធកីឡាបាល់ទាត់កម្ពុជាពេញចិត្តចំពោះការរួមចំណែករបស់ក្លិបភ្នំពេញក្រោនក្នុងការជួយអភិវឌ្ឍបាល់ទាត់កម្ពុជា ហើយសហព័ន្ធរីករាយនឹងសហការ ក៏ដូចជាគាំទ្រផ្នែកបច្ចេកទេសផ្សេងៗក្នុងការបន្តអនុវត្តសកម្មភាពបែបនេះ មិនថាតែភ្នំពែញក្រោនទេ ក្លិបណាក៏ដោយក៏សហព័ន្ធគាំទ្រដែរ។ អគ្គលេខាធិការរូបនេះសង្កត់ធ្ងន់ថាសហព័ន្ធមិនសប្បាយចិត្តសោះឡើយចំពោះចំណាត់ថ្នាក់របស់កម្ពុជានៅ FIFA បច្ចុប្បន្ននេះ ប៉ុន្តែសហព័ន្ធតែម្នាក់ឯងមិនអាចធ្វើឱ្យបាល់ទាត់កម្ពុជាដើរទៅមុខបានឆាប់រហ័សឡើយ គឺត្រូវការការរួមចំណែកពីគ្រប់ក្លិបទាំងអស់ ទាំងអាជីព ទាំងមិនអាជីព ព្រមទាំងសហគមន៍នានាផងដែរ។
អត្ថបទ៖ ចំណេញអ្វីខ្លះ បើមាន Home/Away នៅលីកកម្ពុជាឆ្នាំ២០១៤?
ជាទូទៅការសិក្សាកម្រិត D នេះធ្វើឡើងតែ៥ថ្ងៃប៉ុណ្ណោះដោយត្រូវរៀនទាំងព្រឹកទាំងរសៀល ប៉ុន្តែលោក Sam បានរៀបចំវគ្គនេះរហូតដល់១០ថ្ងៃ ដោយមួយថ្ងៃរៀនតែ៣ម៉ោងប៉ុណ្ណោះ ដើម្បីទុកពេលឱ្យសិក្ខាកាមមួយចំនួនដែលជាប់រវល់ការងារផ្ទាល់ខ្លួនឱ្យមានពេលសម្រាប់ធ្វើការងារទាំងនោះ៕
អត្ថបទ៖ យ៉ុង ម៉ុងហាក់
រូបថត៖ ppcfcfacebook
0 comments:
Post a Comment