ខ្ចីម៉ូតូមិត្តភក្តិយកទៅលក់ ហើយប្រើល្បិចថាជួបគ្រោះថ្នាក់ចរាចរណ៍រត់ចោលម៉ូតូ
រាជធានីភ្នំពេញ ៖ ជនសង្ស័យជាជនជាតិវៀតណាមម្នាក់ ត្រូវបានជនរងគ្រោះចាប់ប្រគល់ឲ្យសមត្ថកិច្ចកាលពីវេលាម៉ោង៤ និង៤០នាទីរសៀល ថ្ងៃទី២១ ខែកញ្ញា ឆ្នាំ២០១៣ ស្ថិតនៅភូមិជើងឯក សង្កាត់ជើង ឯក ខណ្ឌដង្កោ បន្ទាប់ពីជនសង្ស័យរូបនេះបានប្រើល្បិចខ្ចីម៉ូតូរបស់ជនរងគ្រោះដែលជាមិត្តភក្តិយកទៅលក់។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនខាងលើនេះមានឈ្មោះ ង្វៀង ហ្វឹងហូវ ជាជនជាតិវៀតណាម ភេទប្រុស អាយុ២៤ឆ្នាំ ស្នាក់នៅភូមិផ្សារក្រោម ស្រុករលាប្អៀរ ខេត្តកំពង់ឆ្នាំង។ ចំណែកជនរងគ្រោះមានឈ្មោះ ឈឹម ចន្ថា ភេទប្រុស អាយុ២៨ឆ្នាំ ជាអ្នកម៉ៅទិញផ្លែស្វាយ មានទីលំនៅក្នុងស្រុកស្អាង ខេត្តកណ្តាល។
ប្រភពដដែលបានឲ្យដឹងថា មុនពេលកើតហេតុជនសង្ស័យបានខ្ចីម៉ូតូជនរងគ្រោះម៉ាកស្មាស់ ពណ៌ខ្មៅ ពាក់ស្លាកលេខ ភ្នំពេញ1AN-3716 ដោយប្រាប់ថាខ្ចីមានការមួយភ្លែត។ បន្ទាប់ពីខ្ចីបានហើយ ជនសង្ស័យបានយកម៉ូតូរបស់ជនរងគ្រោះទៅលក់នៅកន្លែងគួកជេម៉ូតូនៅម្តុំផ្សារអូប្ញស្សី ហើយក្រោយពេលលក់បានសម្រេចបានជិះម៉ូតូឌុបត្រឡប់ទៅវិញប្រាប់ ម្ចាស់ម៉ូតូថា ខ្លួនជិះម៉ូតូបុករថយន្តឡិចស៊ីស១គ្រឿង ហើយក៏រត់ចោលម៉ូតូតែម្តងទៅ។ ខណៈនោះជនរងគ្រោះមិនជឿក៏បានឃាត់ខ្លួនបុរសជនជាតិវៀតណាមរូបនេះ ប្រគល់ឱ្យនគរបាលប៉ុស្តិ៍រដ្ឋបាលជើងឯកធ្វើការសាកសួរ និងកសាងសំណុំរឿងចាត់ការតាមច្បាប់។
បច្ចុប្បន្នជនសង្ស័យ ត្រូវបានសមត្ថកិច្ចឃុំខ្លួនជាបណ្តោះអាសន្ន ដើម្បីធ្វើការសាកសួរ និងកសាងសំណុំរឿងបញ្ជូនខ្លួនជនសង្ស័យទៅកាន់តុលាការចាត់ការទៅតាមនីតិវិធីច្បាប់៕
0 comments:
Post a Comment