ខ្សែប្រយុទ្ធ Mario Balotelli ទាត់បាល់ពិន័យ ១១ម៉ែត្រអត់ចូលជាលើកដំបូងក្នុងអាជីពរបស់ខ្លួនក្នុងការប្រកួតក្របខ័ណ្ឌ Serie A ដែលក្រុម AC Milan ចាញ់ Napoli ១-២ នៅទឹកដីខ្លួនឯងយប់មិញ។
ខណៈកីឡាករ Miguel Britos (នាទីទី៦) និង Gonzalo Higuaín (នាទីទី៥៤) តែតនិងស៊ុតបញ្ចូលទីម្នាក់មួយគ្រាប់ឱ្យភ្ញៀវ Napoli នាំមុខ២-០មុនទៅហើយនោះ ក្រុមម្ចាស់ផ្ទះ AC Milan មានឱកាសកាត់បន្ថយការនាំមុខក្នុងនាទីទី ៦០ដោយទទួលបានបាល់ពិន័យ ១១ម៉ែត្រ។ Balotelli គឺជាអ្នករ៉ាប់រងស៊ុតប៉េណាល់ទី ក្រោមទំនុកចិត្តខ្ពស់បំផុតពីគ្រូបង្វឹកក៏ដូចជាមិត្តរួមក្រុម ព្រោះខ្សែប្រយុទ្ធជួរមុខនៃក្រុមជម្រើសជាតិអ៊ីតាលីវ័យ ២៣ឆ្នាំរូបនេះ ទាត់ ២១លើកកន្លងមក ចូលទាំង២១លើក ដោយគ្មានអ្នកចាំទីណាសង្គ្រោះបាល់ពិន័យ ១១ម៉ែត្ររបស់គេបានឡើយក្នុងការប្រកួតផ្លូវការទាំងនោះ។
ប៉ុន្តែកំណត់ត្រាទាត់បាល់ពិន័យ១១ម៉ែត្រចូលរហូតរបស់អតីតសមាជិកក្លិប Inter Milan និង Man City រូបនេះត្រូវបានបញ្ចប់ដោយអ្នកចាំទីដៃទី៣អេស្ប៉ាញ Pepe Reina ដែលលោក Rafael Benitez ទើបខ្ចីពី Liverpool មកជួយ Napoli ក្នុងរដូវកាលនេះ។
យ៉ាងណាក្ដី នៅនាទីទី៩០+១ អតីតយុវជនក្លិប Lumezzane ទាត់បញ្ចូលទីគ្រាប់លួងចិត្តឱ្យ AC Milan បានមួយគ្រាប់ពីដំបូលទូក មុនពេលទទួលកាតលឿងជាលើកទី២នៅក្រោយការប្រកួតដោយសារជះកំហឹងដាក់អាជ្ញាកណ្ដាល។
ដោយឡែក ក្រុមរួមក្រុងរបស់ AC គឺ Inter Milan បានលត់ម្ចាស់ផ្ទះដែលជាក្រុមចំណូលថ្មី Sassuolo ដល់ទៅ៧-០ ទាត់បញ្ចូលទីដោយ ខ្សែប្រយុទ្ធ Rodrigo Palacio, ខ្សែបម្រើ Saphir Taïder, Ricky Álvarez, Diego Milito (២គ្រាប់), Esteban Cambiasso និងការធ្វើឱ្យចូលទីខ្លួនឯងមួយគ្រាប់របស់ខ្សែការពារក្រុម Sassuolo។
Carlos Tevez និង Fernando Llorente រកបានម្នាក់មួយគ្រាប់ឱ្យម្ចាស់ផ្ទះ Juventus វាយបកយកឈ្នះ Hellas Verona ២-១ ខណៈ Roma ស៊ី Lazio ២-០ ហក់ឡើងទៅឈរកំពូលតារាង មាន១២ពិន្ទុស្មើ Napoli តែលើសគ្រាប់បាល់ចំណេញមួយគ្រាប់។
តារាងចំណាត់ថ្នាក់ប្រចាំសប្ដាហ៍ទី៤
អ្នកទាត់បញ្ចូលទីបានច្រើនជាងគេក្នុង៤ប្រកួតមកនេះ
0 comments:
Post a Comment