គិតត្រឹមថ្ងៃនេះគឺបិណ្ឌ៤នៃពិធីបុណ្យភ្ជុំបិណ្ឌ ហើយប្រជាជនខ្មែរទូទាំងប្រទេសជាបណ្ដើរៗបានធ្វើចង្ហាន់ បង្អែម និងនាំយកធូបទៀនរួមនឹងផ្កាជាដើមឆ្ពោះទៅវត្តអារាមនានា ដើម្បីបញ្ជូនកុសលទៅកាន់បុព្វការីជនដែលចែកឋាន។ ទន្ទឹមនឹងនេះអ្នកប្រដាល់ល្បី វ៉ន វីវ៉ា ថាគាត់បានធ្វើចង្ហាន់ទៅវត្តបាន២វត្តហើយ និងមានគម្រោងទៅច្រើនវត្តទៀត។
អ្នកប្រដាល់មានស្រុកកំណើតនៅខេត្តកំពង់ចាម ថា២វត្តដែលគាត់បានធ្វើចង្ហាន់ទៅប្រគេនព្រះសង្ឃគឺវត្តប្រាសាទ និងវត្ត ឧណ្ណាលោម។ បន្ថែមលើនេះគាត់បានក្រោកបោះបាយបិណ្ឌបាន២វត្តដែរ ដែលគាត់ថាទាំងនេះប្រពៃណីល្អដែលកូនខ្មែរគួរឲ្យប្រតិបត្តិ។ “យើងជាកូនខ្មែរ ត្រូវគោរពប្រពៃណីរបស់យើង។ ”ភ្ជុំបិណ្ឌរាល់តែឆ្នាំ ខ្ញុំទៅវត្តមិនដែលខានទេដើម្បីសន្សំកុសល និងឧទ្ទិសមគ្គផលដល់អ្នកម្ដាយមានគុណរបស់ខ្ញុំដែលចែកឋានទៅ។ ខ្ញុំនឹងទៅវត្តឯស្រុកនៅកំពង់ចាមដែរ តែអត់ច្បាស់ថាបិណ្ឌប៉ុន្មានឲ្យប្រាកដនៅឡើយ”។ អ្នកប្រដាល់យកបានមេដាយសំរឹទ្ធពីស៊ីហ្គេម ២០១១ បន្ថែមបែបនេះ។
អត្ថបទពាក់ព័ន្ធសូមអាន៖ វ៉ន វីវ៉ា បើកក្លិបប្រដាល់ តែមិនបោះចោលសង្វៀន
វ៉ន វីវ៉ា បោះបាយបិណ្ឌនៅវត្តឧណ្ណាលោម កាលថ្ងៃដំបូងនៃភ្ជុំបិណ្ឌ
វ៉ន វីវ៉ា អ្នកប្រដាល់ម្នាក់ក្នុងចំណោម៦នាក់ដែលកំពុងត្រៀមខ្លួនឆ្ពោះទៅស៊ីហ្គេមនៅមីយ៉ាន់ម៉ាចុងឆ្នាំនេះ បន្តទៀតថារៀងរាល់ឆ្នាំគាត់តែងធ្វើចង្ហាន់ទៅវត្តមិនក្រោម៧វត្តឡើយ។ ម្ចាស់ខ្សែក្រវាត់ ISK ពិភពលោកបានបន្តពីការធ្វើបុណ្យទានទៀតថា៖ ”ឆ្នាំមុនៗខ្ញុំទៅវត្តនៅតាមខេត្តរបស់មិត្តភ័ក្ដិឆ្ងាយៗដូចជាបាត់ដំបងក៏មាន។ ការធ្វើបុណ្យទានវាអាស្រ័យលើចិត្តជ្រះថ្លា។ និយាយឲ្យតែយើងធ្វើទាំងចិត្តបរិសុទ្ធវានឹងបានកុសលតបវិញ”។
គិតមកដល់ពេលនេះគឺប្រមាណមួយឆ្នាំជាងហើយដែល វ៉ន វីវ៉ា បានបើក្លិបបង្ហាត់ប្រដាល់ឈ្មោះថា ក្លិបប្រដាល់កូនខ្មែរអ្នកតស៊ូ ដែលមានទីតាំងនៅសង្កាត់ទួលសង្កែ បន្ថែមលើការងារឡើងរេញដ៏កម្ររបស់គាត់។ កីឡាករកម្ពស់១៨០សង់ទីម៉ែត្រមានប្រភពចេញពីក្លិបប្រដាល់ខេត្តកំពង់ចាម មុនពេលដែលគាត់ផ្ទេរទៅកាន់ក្លិបព្រះខ័នរាជនៅឆ្នាំ២០០៤៕
អត្ថបទ៖ ប៉ែន សុផាន់ណា
0 comments:
Post a Comment