ការស្លៀកខ្លី ទៅបោះបាយបិណ្ឌ នៅព្រឹកព្រលឹមស្រាងៗ បានទទួលរងការរិះគន់ពីសំណាក់សាធារណៈមតិ ក៏ដូចជាអ្នកប្រើប្រាស់បណ្ដាញទំនាក់ទំនងសង្គម។ អ្នកទាំងនោះនិយាយថា ការស្លៀកពាក់ខ្លីបែបនេះបានធ្វើប៉ះពាល់យ៉ាងខ្លាំងដល់វប្បធម៌ប្រពៃណីខ្មែរ ពិសេសទីអារាម ដែលជាកន្លែងស្ងប់សុខ។
បូរ៉ា និស្សិតសាកលវិទ្យាល័យជាតិគ្រប់គ្រងបាននិយាយនឹងយើងខ្ញុំថា ការស្លៀកពាក់ខ្លី នៅទីកន្លែងផ្សេងដូចជាមិនទាន់ខុសអីទេ។ប៉ុន្តែនៅទីវត្តអារាម គួរគិតដែរ ព្រោះទីនោះគឺជាកន្លែងធ្វើបុណ្យទាន។បូរ៉ា ថា ៖ ”ខ្ញុំកោតសរសើរណាស់ ដែលពួកគាត់ចេះធ្វើបុណ្យទាន ដោយខំក្រោកតាំងពីព្រលឹមទៅបោះបាយបិណ្ឌ។ប៉ុន្តែអ្នកខ្លះស្លៀកពាក់មើលទៅដូចទើបចេញពីក្លឹបកម្សាន្តទៅវិញ”។
“ប្រហែលពួកគាត់គិតថា ទៅបោះបាយបិណ្ឌ ពេលយប់មិនសូវមានអ្នកឃើញទើបហ៊ានស្លៀកបែបហ្នឹង”។ ទាំងនេះគឺជាលើកឡើងរបស់ ចិន្តា និស្សិតសាកលវិទ្យាល័យភ្នំពេញ។ ចិន្តា និយាយថា ៖ ”អ្នកខ្លះស្លៀកពាក់កប់ៗក្រលៀន មើលទៅអត់សមសោះ។ តើទៅធ្វើបុណ្យឬទៅបង្ហាញរាង?”
យុវតីមិនតិចទេ ដែលនិយមស្លៀកខោខ្លីបញ្ចេញសាច់សខ្ចី ពិសេសអ្នករស់នៅរាជធានីភ្នំពេញ។ សំបូ និស្សិតឆ្នាំទី៣ នៅសាកលវិទ្យាល័យជាតិគ្រប់គ្រង ដែលបានទៅបោះបាយបិនណ្ឌនៅវត្តលង្កាកាលពីថ្ងៃចុងសប្ដាហ៍ បាន រៀបរាប់ថា ពិតជាមានខ្លះមែន។ ប៉ុន្តែច្រើននាក់ទៀតក៏បានស្លៀកសមរម្យដែរ។ សំបូ បានបន្ថែមថា ៖ ”ខ្ញុំគិតថា ទាំងអស់នេះប្រហែលជារឿងអចេតនាទេ ហើយប្រសិនបើមានការរិះគន់ ខ្ញុំគិតថា ពេលក្រោយទៀតនឹងលែងមានហើយ”។
“ស្លៀកខ្លីបែបនេះ ហើយធ្វើដំណើរនៅពេលយប់ទៀតពិតជាប្រឈមខ្លាំងណាស់ នឹងករណីរំលោភ”។ ទាំងនេះគឺជាការលើកឡើងរបស់ ចំណាន បុគ្គលិកនៅក្រុមហ៊ុនឯកជនមួយ ដែលសំណៅដល់យុវតី ដែលនិយមស្លៀកខ្លី ពេលក្រោកពីព្រលឹមស្រាងៗ ទៅបោះបាយបិណ្ឌ។ ចំណាន បន្ថែមថា ៖ ”អាចមានរឿងរ៉ាវអាក្រក់កើតឡើងពីរយ៉ាងចំពោះគាត់ ក្នុងពេលតែមួយនោះគឺការប្រឈម និងករណីរំលោភ ព្រមទាំងធ្វើឲ្យអ្នកដ៏ទៃរិះគន់ពីការស្លៀកពាក់មិនសមរម្យ។ ដូច្នេះសូមមេត្តាយុវវ័យទាំងអស់ស្លៀកពាក់ឲ្យបានសមរម្យកុំលេចលើលេចក្រោយទៀត”។
តើយុវជនយល់យ៉ាងណា?
0 comments:
Post a Comment