ប្រធានសហព័ន្ធកីឡាបាល់ទាត់អន្តរជាតិ (FIFA) លោក Sepp Blatter បញ្ជាក់នៅថ្ងៃព្រហស្បតិ៍ម្សិលមិញថា អាជ្ញាកណ្ដាលនឹងត្រូវបានអនុញ្ញាតឱ្យប្រើស្រ្ពៃយ៍លុបបាន(vanishing spray)ដើម្បីកំណត់ទីតាំងទាត់បាល់ហ៊្វ្រីឃីកក្នុងព្រឹត្តិការណ៍ FIFA World Cup ឆ្នាំ២០១៤នៅប្រេស៊ីល។
អត្ថបទ៖ អាហ្សង់ទីនមានកីឡាករកំពូលៗច្រើន តើអាចលើកពាន World Cup បានអត់?
ការប្រើស្រ្ពៃយ៍នោះគឺដើម្បីបង្កភាពងាយស្រួលដល់អាជ្ញាកណ្ដាលក្នុងការគូសខ្សែបន្ទាត់នៅលើដីឱ្យកីឡាករដាក់បាល់ឱ្យចំកន្លែងពិន័យនិងសម្រាប់របងការពាររបស់គូបដិបក្ខឈរឱ្យចំកន្លែងកំណត់ កុំឱ្យលួចលោទៅមុខកៀកនឹងទីតាំងបាល់ដូចមុនៗ។ ស្រ្ពៃយ៍ដែលនឹងរលុបបាត់ទៅវិញក្នុងរយៈពេល១នាទីបន្ទាប់ពីការបាញ់ចេញ កំពុងត្រូវបានគេប្រើប្រាស់សាកល្បងក្នុងព្រឹត្តិការណ៍ប្រជុំក្លិបជើងឯកប្រចាំទ្វីប FIFA Club World Cup 2013 នៅប្រទេសម៉ារ៉ុក។
លោក Blatter និយាយប្រាប់អ្នកសារព័ត៌មានក្នុងទីក្រុង Marrakech ប្រទេសម៉ារ៉ុក មុនជំនួបផ្ដាច់ព្រ័ត្ររវាងជើងឯកទ្វីបអឺរ៉ុប Bayern Munich និងក្រុមជើងឯករបស់ម្ចាស់ផ្ទះ Raja Casablanca យ៉ាងដូច្នេះ៖ “ក្រុមទាំងអស់ ព្រមទាំងកីឡាករ អាជ្ញាកណ្ដាល និងប្រតិភូ ពេញចិត្តការប្រើស្រ្ពៃយ៍នេះ។ អ្នកតំណាងមកពីក្រុម Bayern ម្នាក់ប្រាប់ខ្ញុំថាឥឡូវនេះរនាំងការពារអាចស្ថិតនៅចម្ងាយ៩ម៉ែត្រពីទីតាំងទាត់បាល់ហ៊្វ្រីឃីកហើយ មិនមែន៥ឬ៦ម៉ែត្រដូចពីមុនទេ ដូច្នេះយើងនឹងប្រើវានៅ World Cup ក្នុងប្រទេសប្រេស៊ីល”។
អត្ថបទ៖ ហេតុផល៥យ៉ាងដែលអ្នកមិនត្រូវមើលរំលង World Cup 2014
តាមពិតទៅ ស្រ្ពៃយ៍លុបបាននេះត្រូវ FIFA ធ្វើតេស្តសាកល្បងតាំងពីព្រឹត្តិការណ៍ U-20 World Cup ក្នុងប្រទេសទួរគី និង U-17 World Cup នៅអារ៉ាប់រួមម្ល៉េះ ខណៈការប្រកួតលីកក្នុងប្រទេសអាហ្សង់ទីនក៏ប្រើវាដែរ៕
តើប្រិយមិត្តយល់យ៉ាងម៉េចដែរចំពោះការប្រើស្រ្ពៃយ៍នេះ?
0 comments:
Post a Comment