អាយខុន ពន្លះសង់ចិន បណ្តាលឲ្យមនុស្ស៤នាក់រងរបួសធ្ងន់ ស្រាល
រាជធានីភ្នំពេញ ៖ មានហេតុការណ៍គ្រោះថ្នាក់ចរាចរណ៍មួយបានកើតឡើង កាលពីវេលាម៉ោង៩និង៣០នាទីយប់ ថ្ងៃទី៣០ ខែកញ្ញា ឆ្នាំ២០១៣ ដែលបង្កឡើងដោយម៉ូតូ២គ្រឿង បានបើកបុកគ្នាពេញទំហឹងនៅ តាមបណ្ដោយផ្លូវព្រះនរោត្ដម សង្កាត់បឹងកេងកងទី១ ខណ្ឌចំការមន បណ្តាលឲ្យមនុស្ស៤នាក់រងរបួសធ្ងន់ស្រាល។
បើតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជន២នាក់ជិះម៉ូតូ១គ្រឿង ម៉ាកអាយខុន ពណ៌សលាយខៀវ ពាក់ស្លាក លេខភ្នំពេញ 1AB-0164 ធ្វើដំណើរតាមបណ្តោយផ្លូវព្រះនរោត្ដម ក្នុងទិសដៅពីត្បូងទៅជើងក្នុងល្បឿនលឿនដូចរន្ទះ ។ ខណៈពេលជិះមកដល់ចំណុចកែងផ្លូវលេខ២៧៨ ក៏បានជិះបត់ឆ្វេងឆ្លងកាត់ផ្លូវ ស្រាប់តែជ្រុលទៅបុកម៉ូតូមួយគ្រឿងទៀតម៉ាកសង់ចិន ស៊េរី៩៨ ភព.១ ពណ៌ខ្មៅ ពាក់ស្លាកលេខ ត៩៦៥៧ បណ្តាលដួលគលើគ្នា ចំណែកអ្នកទាំង៤បានរងរបួសធ្ងន់ស្រាល។
បន្ទាប់ពីកើតហេតុ កម្លាំងសមត្ថកិច្ចជំនាញបានចុះទៅធ្វើការវាស់វែង និងបានទំនាក់ទំនងហៅរថយន្តសាម៊ុយមកដឹកយកអ្នករបួសទៅធ្វើការសង្គ្រោះនៅមន្ទីរពេទ្យ។ ចំណែកម៉ូតូទាំង២គ្រឿង ត្រូវបានសមត្ថកិច្ចយកទៅរក្សាទុកបណ្តោះអាសន្នដើម្បីរង់ចាំធ្វើការដោះស្រាយនៅពេលក្រោយ៕
ប្រភពពី៖ www.watphnom-news.com
0 comments:
Post a Comment