សិស្សសាលា២ក្រុមប្រដាប់ដោយកាំបិត និងកាំភ្លើង ដេញបាញ់កាប់ចាក់គ្នា ផ្អើលប្រជាពលរដ្ឋនៅផ្លូវជាតិលេខ៤
រាជធានីភ្នំពេញ ៖ មានហេតុការណ៍ភ្ញាក់ផ្អើលមួយបានកើតឡើងកាលពីវេលាម៉ោង១០និង១០នាទីព្រឹកថ្ងៃទី០១ ខែតុលា ឆ្នាំ២០១៣ ស្ថិតនៅតាមបណ្តោយផ្លូវជាតិលេខ៤ ជិតសាលាក្តីខ្មែរក្រហមស្ថិតក្នុង សង្កាត់កាកាប ខណ្ឌពោធិ៍សែនជ័យ ដោយសារតែមានពួកក្មេងស្ទាវ២ក្រុម បានជិះម៉ូតូដេញបាញ់គ្នាតាមផ្លូវ បណ្តាលឲ្យយុវជន៣នាក់ រងរបួសធ្ងន់។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះទី១មានឈ្មោះ ទិត្យ ប៊ុនធី អាយុ១៨ឆ្នាំ រៀនថ្នាក់ទី១១ រស់នៅសង្កាត់ព្រែកឯង ខណ្ឌមានជ័យ ទី២ឈ្មោះ សុខ ផល្លា អាយុ១៨ឆ្នាំ និងទី៣ឈ្មោះ ជា ចំរ៉ុង អាយុប្រហែល២០ឆ្នាំ។
បើតាមការឲ្យដឹងពីយុវជនម្នាក់ដែលជាបក្ខពួករបស់ជនរងគ្រោះបានរៀបរាប់ថា មុនពេលកើតហេតុ ភាគីជនរងគ្រោះដែលមានគ្នាជាង១០ម៉ូតូ បានចេញដំណើរទៅលេងតំបន់អំពែភ្នំ ខេត្តកំពង់ស្ពឺ លុះទៅដល់មុខវិទ្យាល័យជម្ពូវ័ន្ត ក៏បានជួបជាមួយក្រុមក្មេងស្ទាវនៅទីនោះ ស្រាប់តែមានជម្លោះ រហូតដល់គប់ដុំថ្ម ដាក់គ្នា។
ភ្លាមៗនោះ ក្រុមក្មេងស្ទាវ ដែលប្រដាប់ដោយកាំបិត និងកាំភ្លើង បានជិះម៉ូតូតាមបាញ់ បណ្តាលឲ្យរងរបួសធ្ងន់ចំនួន៣នាក់តែម្តង។ បន្ទាប់ពីកើតហេតុកម្លាំងសមត្ថកិច្ច បានចុះទៅអន្តរាគមន៍ ដោយឃាត់ខ្លួនយុវជនប្រមាណ១០នាក់ តែមិនទាន់ប្រាកដថា ជាក្រុមជនបង្កនៅឡើយនោះទេ ដោយរង់ចាំការសាកសួរបន្តទៀត។ ចំណែកជនរងគ្រោះត្រូវបានគេបញ្ជូនយកទៅធ្វើការសង្គ្រោះបន្ទាន់នៅមន្ទីរពេទ្យ៕
0 comments:
Post a Comment