គិតត្រឹមពេលនេះក្រុមកីឡាចំបាប់កម្ពុជា ដែលជាអ្នកដណ្ដើមបានមេដាយច្រើនជាងគេប្រចាំស៊ីហ្គេមឆ្នាំ២០១៣ នៅប្រទេសមីយ៉ាន់ម៉ា បានត្រឡប់មកដល់មាតុភូមិវិញហើយ កាលពីម៉ោង ៩ យប់ ថ្ងៃទី ១៥ ធ្នូ ម្សិលមិញ អមដោយមេដាយ ចំនួន ១០ គ្រឿង ក្រោយកម្មវិធីប្រកួតរបស់កីឡាមួយនេះចប់រួចរាល់តាំងពីថ្ងៃទី ១៣ ធ្នូ មកម៉្លះ។
នៅព្រឹកនេះយើងខ្ញុំបានជួបសម្ភាសន៍ជាមួយលោក ធិន វិចិត្រ អគ្គលេខាធិការសហព័ន្ធកីឡាចំបាប់ ដើម្បីដេញដោលរឿងហេតុដែលកើតឡើងក្នុងយុទ្ធនាការជោគជ័យមួយនេះ៖
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា (បន្ទាប់អ្នកកាន់ទង់ជាតិ)
Sabay៖ តើកត្តាអ្វីជំរុញឱ្យចំបាប់ ទទួលបានលទ្ធផលជាផ្លែផ្កាបែបនេះ?
ធិន វិចិត្រ៖ ដោយសារយើងបានត្រៀមខ្លួនរួចរាល់ និង ស្គាល់ពីគូប្រកួតបានច្បាស់ តាមរយៈការប្រកួត Per-Sea game កាលពីប៉ុន្មានខែមុន បូកបន្ថែមទាំងកីឡាករ កីឡាការិនីមានឆន្ទៈ។
Sabay៖ អំឡុងពេលប្រកួតល្បីថាមានរឿងប្រទាំងប្រទើស មួយចំនួន តើបញ្ហាអ្វីឱ្យប្រាកដ?
ធិន វិចិត្រ៖ តាមពិតយើងមានបញ្ហាបច្ចេកទេសមួយ ដោយសារដំបូងឡើយទាំងម្ចាស់ផ្ទះ និង គណៈកម្មាធិការរៀបចំការប្រកួតអនុញ្ញាតឱ្យយើងអាចដាក់កីឡាករប្រកួតបានចំនួន ៦ នាក់លើប្រភេទវិញ្ញាសានីមួយៗ ព្រោះគេយល់ថាកម្រិតរបស់ចំបាប់យើងសមត្ថភាពនៅមានកម្រិត ខណៈលក្ខន្តិកនៃការប្រកួតអាចដាក់កីឡាករប្រកួតបានតែ ៤ នាក់ប៉ុណ្ណោះ។
ប៉ុន្តែដោយសារថ្ងៃប្រកួតដំបូងយើងឈ្នះមេដាយប្រាក់ ២ ហើយថ្ងៃបន្ទាប់យើងឈ្នះមេដាយមាស ២ និង ប្រាក់ បន្ថែមទៀត ជាហេតុធ្វើឱ្យគេស្រងាកចិត្ត ទើបតវ៉ាមិនឱ្យកីឡាករយើង ៣នាក់មិនបានប្រកួត។
ក្រុមចំបាប់កម្ពុជាថតរូបជុំគ្នានៅថ្ងៃប្រកួតចុងក្រោយ(រូបថត៖សហព័ន្ធចំបាប់)
Sabay៖ ចុះកីឡាករ កីឡាការិនីណាខ្លះមិនបានប្រកួត?
ធិន វិចិត្រ៖ យើងបញ្ជូនកីឡាករ កីឡាការិនីទៅប្រកួតចំនួន ១៤ នាក់ ហើយ មានកីឡា ៣ នាក់មិនបានប្រកួតរួមមាន កីឡាករ ងួន មករា វិញ្ញាសាចំបាប់សេរី ទម្ងន់ ៥៥ គីឡូក្រាម កីឡាករ នុត សុផល ប្រកួតចំបាប់ក្រិចកូរ៉ូម៉ាំង(លេងត្រឹមចង្កេះឡើងលើ)ទម្ងន់៥៥ គ.ក្រ និង កីឡាករ ម៉ុល រស្មី ប្រភេទទម្ងន់ ៦០ គីឡូក្រាម។
Sabay៖ តើកីឡាករ កីឡាការិនីរបស់លោកណាខ្លះដណ្ដើមបានមេដាយ?
ធិន វិចិត្រ៖ យើងដណ្ដើមបានមេដាយរហូតដល់ ១០ គ្រឿង ក្នុងនោះមាស ៤ ប្រាក់ ២ និង សំរឹទ្ធ៤។
បញ្ជីកីឡាករចំបាប់ដែលឈ្នះមេដាយ | ||
ឈ្មោះកីឡាករ | មេដាយ | ទម្ងន់ |
កីឡាករ ឌន សៅ | មាស | ១២០ គីឡូក្រាម |
កីឡាករ កៅ ឆេងហុង | មាស | ៨៤ គីឡូក្រាម |
កីឡាការិនី នី សំណាង | មាស | ៦៣ គីឡូក្រាម |
កីឡាការិនី ចូវ សុធារ៉ា | មាស | ៤៤ គីឡូក្រាម |
កីឡាករ ជា ស្រីមាស | ប្រាក់ | ៦៧ គីឡូក្រាម |
កីឡាករ ឌន សៅ | ប្រាក់ | ១២០ គីឡូក្រាម |
កីឡាការិនី ជ័យ ចាន់រស្មី | សំរឹទ្ធ | ៥១ គីឡូក្រាម |
កីឡាករ កាង ដែនពិសិដ្ឋ | សំរឹទ្ធ | ៦០ គីឡូក្រាម |
កីឡាករ ងួន គឹមហេង | សំរឹទ្ធ | ៩៦ គីឡូក្រាម |
កីឡាករ ស៊ូ ចូសូ (ខ្មែរ-អាមេរិក) | សំរឹទ្ធ | ៦៦ គីឡូក្រាម |
Sabay៖ គិតត្រឹមពេលនេះចំបាប់ឈ្នះមេដាយច្រើនជាងគេបណ្ដោះអាសន្ន តើលោកមានចំណាប់អារម្មណ៍បែបណា?
ធិន វិចិត្រ៖ នេះជាលើកទី១ ហើយដែលចំបាប់របស់យើងទទួលបានជោគជ័យយ៉ាងត្រចះត្រចង់បែបនេះ ពោលគឺជាប់ចំណាត់ថ្នាក់លេខ ២ បន្ទាប់ពីប្រទេសវៀតណាម ជាប់លេខ ១ ជាអ្នកដណ្ដើមចំណាត់ថ្នាក់លេខ ១ នៅកីឡាចំបាប់ ដោយដណ្ដើមបានមេដាយមាស ១០គ្រឿង។ យើងសង្ឃឹមថាកីឡារបស់កម្ពុជាដែលមិនទាន់ប្រកួត នឹងខិតខំដណ្ដើមបានមេដាយមាសជាបន្តបន្ទាប់ដើម្បីឱ្យគ្រប់តាមការគម្រោងគឺ មេដាយមាស ២ ខ្ទង់ សម្រាប់ស៊ីហ្គេមឆ្នាំ២០១៣នេះ។
អត្ថបទពាក់ព័ន្ធ៖ ស៊ីហ្គេម៖ ចំបាប់រកបានមេដាយមាសទី៤ ឱ្យកម្ពុជា
Sabay៖ ជាចុងក្រោយ តើលោកមានពាក្យពេជន៍អ្វីបន្ថែមទេ ជុំវិញជោគជ័យរបស់ក្រុមក្នុងយុទ្ធនាការស៊ីហ្គេម?
ធិន វិចិត្រ៖ ខ្ញុំសូមអរគុណដល់គណៈកម្មាធិការជាតិអូឡាំពិកកម្ពុជា (NOCC) និង ក្រសួងអប់រំយុវជននិងកីឡា ដែលយកចិត្តទុកដាក់ដល់ក្រុមចំបាប់យើងខ្ញុំ ដោយឱ្យចេញដំណើរទៅស៊ីហ្គេមមុនការប្រកួតមួយសប្ដាហ៍ ដើម្បីឱ្យសាំនឹងបរិយាកាស ទីលានប្រកួត ចំណីអាហារ៕
អត្ថបទ៖ ម៉ឺន រស្មី
0 comments:
Post a Comment