សមាជិកខ្លះនៃក្រុមកីឡាករបាល់បោះជម្រើសកម្ពុជាដែលកំពុងបំពេញកាតព្វកិច្ចនៅប្រទេសមីយ៉ាន់ម៉ាក្នុងព្រឹត្តិការណ៍កីឡាស៊ីហ្គេមលើកទី២៧នឹងមិនមកលេងឲ្យក្រុមជម្រើសជាតិកម្ពុជាទៀតទេសម្រាប់ព្រឹត្តិការណ៍ស៊ីហ្គេមលើកក្រោយ។ ដំណឹងនេះកើតឡើងនៅព្រឹកនេះ ខណៈវេលាម៉ោង២:៣០នាទីរសៀលនេះ ក្រុមកម្ពុជានឹងប្រកួតចុងក្រោយជាមួយឥណ្ឌូណេស៊ី។
កីឡាករបាល់បោះខ្មែរ-កាណាដា Ratana Sak នៅប្រទេសមីយ៉ាន់ម៉ាកាលពីព្រឹកមិញបានសរសេរលើទំព័រFacebook របស់ខ្លួនថា ៖«ថ្ងៃនេះយើងទាំងអស់គ្នានឹងលេងប្រកួតចុងក្រោយនឹងក្រុមឥណ្ឌូណេស៊ី វាជាការប្រកួតដ៏តឹងតែងសម្រាប់ការប្រកួត៦លើកក្នុងរយៈពេលត្រឹមតែ៨ថ្ងៃ។ សម្រាប់មនុស្សមួយចំនួនការប្រកួតនេះគ្មានន័យអ្វីទេសម្រាប់ពួកគេ តែសម្រាប់ពួកយើង និងបាល់បោះកម្ពុជា នេះជាមហាកិត្តិយស ហើយជ័យជម្នះមួយនេះធំធេងបំផុតសម្រាប់ពួកយើង។ សម្រាប់មិត្តរួមក្រុមរបស់ខ្ញុំខ្លះ ការប្រកួតនេះប្រហែលជាការប្រកួតចុងក្រោយរបស់ពួកគេហើយ! មោទនភាពជាខ្មែរ»។
យោងតាមការបង្ហាញរបស់កីឡាករខ្មែរនៅប្រទេសកាណាដារូបនេះយើងខ្ញុំបានសាកសួរទៅ Ratana ឲ្យបញ្ជាក់បន្ថែមទៀត។ Ratana បានប្រាប់ថា កីឡាករខ្លះបន្ទាប់ពីចប់ព្រឹត្តិការណ៍ស៊ីហ្គេមឆ្នាំនេះ ពួកគាត់លែងមកលេងនៅស៊ីហ្គេមលើកក្រោយទៀតហើយ។
Ratana បាននិយាយថា ៖«តាមខ្ញុំដឹងកីឡាករ Stephan និង Sophea នឹងមិនមកលេងនៅស៊ីហ្គេមលើកក្រោយទៀតទេ»។ ទោះជាយ៉ាងណាSabay មិនអាចទាក់ទងដល់សាមីខ្លួនទាំងពីរនាក់ដើម្បីបញ្ជាក់ករណីនេះទេ ខណៈការប្រកួតចុងក្រោយជិតមកដល់ហើយនោះ។ កីឡាករ Sophea Tait ជាកូនកាត់ខ្មែរ-អូស្ត្រាលីកំពុងរស់នៅទីក្រុងស៊ីដនី និងកំពុងលេងក្នុងក្រុមមហាវិទ្យាល័យមួយ។ ចំណែកកីឡាករStefan Doll-Therro Sao នៅប្រទេសអូទ្រីស។ ប៉ុន្តែមុនទៅស៊ីហ្គេម Sophea បានប្រាប់Sabay ថា គាត់ពេញចិត្តមកលេងឲ្យកម្ពុជាលើកក្រោយទៀត។
ដោយឡែក Ratana Sak បានប្រាប់ថា រូបគេនៅតែមានចិត្តចង់មកលេងឲ្យក្រុមបាល់បោះជម្រើសជាតិកម្ពុជាបន្តទៀតប្រសិនបើក្រុមកម្ពុជារៀបចំបានល្អ។ ទោះជាយ៉ាងណាកីឡាកររូបនេះបានលើកឡើងថា រយៈពេលឆ្នាំបន្តបន្ទាប់ទៀតក្រុមបាល់បោះកម្ពុជានឹងកាន់តែល្អប្រសើរ ហើយក្មេងជំនាន់ក្រោយមានសមត្ថភាពនឹងកាន់តែធ្វើឲ្យក្រុមបាល់បោះកម្ពុជារីកចម្រើន។
ឆ្លងកាត់ការប្រកួតប៉ុន្មានលើកនៅស៊ីហ្គេម កីឡាករនៅទីក្រុងម៉ង់តេរេអាល់រូបនេះបានប្រាប់ពីចំណុចខ្លាំង និងចំណុចខ្សោយរបស់ក្រុមកម្ពុជា។ លោកថា កីឡាករមានទេពកោសល្យច្រើន និងវាយបកលើដៃគូប្រកួតមានប្រសិទ្ធភាព ប៉ុន្តែក្រុមកម្ពុជាចាញ់មាឌ និងកម្ពស់គេដែលជាហេតុធ្វើឲ្យគេរារាំងកីឡាករកម្ពុជាមិនឲ្យធ្វើអ្វីបានសម្រេច។
នៅវេលាម៉ោង២:៣០រសៀលនេះក្រុមបាល់បោះកម្ពុជានឹងប្រកួតចុងក្រោយជាមួយក្រុមបាល់បោះឥណ្ឌូណេស៊ី មុននឹងធ្វើដំណើរមកកាត់មាតុប្រទេស៕
អត្ថបទពាក់ព័ន្ធ៖
កីឡាករកូនខ្មែរនៅក្រៅប្រទេសពីររូបនិយាយអ្វីក្រុមបាល់បោះជម្រើសជាតិត្រៀមស៊ីហ្គេម?
តារាបាល់បោះកម្ពុជា Dominic Dar ជា Top Scorer នៅស៊ីហ្គេម
កូនខ្មែរ-កាណាដា Ratana ប្រាប់ថា ថ្ងៃនេះជាថ្ងៃធំបំផុតក្នុងអាជីពបាល់បោះរបស់ខ្លួន
អត្ថបទ៖ ជាន ចាន់រ៉ា
0 comments:
Post a Comment