ថ្នាក់ដឹកនាំគណៈកម្មាធិការជាតិអូឡាំពិកកម្ពុជា (NOCC)បានឲ្យដឹងថា ពុំមានការដង្ហែក្បួនដើម្បីអបអរសាទរដល់ក្រុមកីឡាករកម្ពុជាដែលទទួលបានជោគជ័យមកពីស៊ីហ្គេមឡើយ បើទោះជាមានការលើកឡើងជាច្រើនតាមបណ្ដាញសង្គម Facebook ឲ្យមានការដង្ហែក្បួន។
បន្ទាប់ពីព្រឹត្តិការណ៍កីឡាធំប្រចាំពីរឆ្នាំម្តងក្នុងតំបន់អាស៊ីអាគ្នេយ៍ឬស៊ីហ្គេមលើកទី២៧បានបញ្ចប់ទៅនៅប្រទេសមីយ៉ាន់ម៉ា អ្នកប្រើបណ្តាញសង្គមទំនាក់ទំនង Facebook បានស្នើ ឲ្យមានការដង្ហែក្បួនដើម្បីអបអរសាទរដល់ក្រុមកីឡាករកម្ពុជាដែលបានវិលត្រឡប់មកមាតុប្រទេសជាមួយនឹងភាពជោគជ័យ។
ក្នុងនោះឯកឧត្តម កឹម គុណវឌ្ឍន៍ អគ្គនាយកទូរទស្សន៍ជាតិកម្ពុជា(ទទក)បានសរសេរលើទំព័រ Facebook របស់លោកថា ៖«ជាដំណើរឯកជនតូចមួយរបស់ខ្ញុំ ជូនដល់ក្រសួងអប់រំ ក្រសួងកិច្ចការនារី សាលារាជធានីភ្នំពេញ និង សិស្ស និស្សិត ខ្មែរ គួរតែមានពិធីទទួល និងដង្ហែយ៉ាងមហោឡារិកមួយ សម្រាប់ការវិលត្រឡប់ពី SEA Game របស់កីឡាការិនី កីឡាករខ្មែរ ដែលទទួលបានមេដាយ មាស មេដាយ ប្រាក់ និងមេដាយសំរឹទ្ធ ។ ខ្ញុំស្រក់ទឹកភ្នែកពេលឃើញភាពយន្តឯកសារ សម្តេចឪ ថតជាមួយកីឡាករឆ្នើមរបស់កម្ពុជា ក្នុងសម័យទសវត្សរ៍ឆ្នាំ ៦០ នៅក្នុង GANEFO ចុះសម័យសម្តេចតេជោ ដែលកុលបុត្រខ្មែរ ដណ្ដើមបានមហាកិត្តិយសនេះ ម្ដេចក៏យើងធ្វើមិនបាន! ។ សុំទោស បើជាសំណើមិនសមស្រប»។
គណៈប្រតិភូកីឡាកម្ពុជាចូលរួមស៊ីហ្គេមលើកទី២៧
ការលើកឡើងរបស់ឯកឧត្ដមខាងលើត្រូវបានអ្នកប្រើFacebook ជាច្រើនបានយល់ព្រម និងលើកឡើងថាជាគំនិតដ៏ល្អដែលគួរតែធ្វើក្នុងនាមជាប្រជាជនកម្ពុជាបើមិនបានជួយអ្វីដល់កីឡាក៏បង្កើតជាសកម្មភាពជួយលើកទឹកចិត្តដល់កីឡាករដែរ។
ទោះជាយ៉ាងរហូតដល់ពេលនេះពុំមានការរៀបចំពិធីដង្ហែក្បួនឡើយ ខណៈក្រុមកីឡាកម្ពុជាបានមកដល់រាជធានីភ្នំពេញតាំងពីដើមសប្តាហ៍នេះម្ល៉េះ។
ដើម្បីឆ្លើយតបនឹងសំណើខាងលើឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់ថា ពុំមានពិធីហែក្បួនដើម្បីអបអរសាទរដល់កីឡាករកម្ពុជាឡើយ ដោយសារពេលវេលាមិនអំណាចផល។
ឯកឧត្ដមមានប្រសាសន៍ថា ៖«យើងក៏ចង់ធ្វើដែរ តែដោយសារពេលវេលា យើងអត់អាចធ្វើបាន។ តាមទម្លាប់កីឡា ការហែក្បួន យើងត្រូវធ្វើនៅពេលក្រុមកីឡាករមកដល់ទឹកដីប្រទេសយើងដំបូង ប៉ុន្តែក្រុមកីឡាករយើងឆ្នាំនេះមកដល់កម្ពុជាពេលយប់ ដូច្នេះយើងពិបាកក៏អត់ធ្វើតែម្តង»។
ទោះជាយ៉ាងណាឯកឧត្ដមបន្ថែមថា ថ្វីបើពុំមានការហែក្បួន ប៉ុន្តែក៏មានពិធីជប់លៀងអបអរសាទរមួយចំនួនដល់កីឡាករកម្ពុជាក្នុងនោះមានពិធីជប់លៀងពីណាហ្គាវើល ពីស្រាបៀរអង្គរ ជាពិសេសពិធីទទួលប្រាក់រង្វាន់ពីសម្ដេចនាយករដ្ឋមន្ត្រី ហ៊ុន សែន។
កាលព្រឹត្តិការណ៍ស៊ីហ្គេមលើកទី២៥នៅប្រទេសឡាវឆ្នាំ២០០៩ ក្រុមកីឡាកម្ពុជាត្រូវបានរៀបចំពិធីដង្ហែក្បួនតាំងពីជាយដែនឡាវចូលមកកម្ពុជារហូតដល់រាជធានីភ្នំពេញ។ ពេលនោះមានអ្នកស្រុកអ្នកភូមិនៅតាមដងផ្លូវជាច្រើនបានទទួលស្វាគមន៍ និងអបអរសាទរដល់ប្រតិភូដង្ហែក្បួនកីឡាកម្ពុជា៕
អត្ថបទ៖ ជាន ចាន់រ៉ា
0 comments:
Post a Comment