អេនឌីឈប់ថតសិចស៊ីព្រោះរាសីធ្លាក់ចុះ
ភ្នំពេញៈ ក្រោយពីមានវាសនាប៉ះប្រាណដ៏ស្រលូនៗរបស់តារាស្រីជិត ៥០ នាក់មកហើយ នោះ តារាសម្តែង និងជាតារាចម្រៀង ដែលទស្សនិកជនស្គាល់តាមរយៈការថតរូបបែបសិចស៊ីបញ្ចេញរូបក្តៅសាច់ ជាមួយតារាស្រីៗ លោក អេនឌី បែរជាប្រកាសដកខ្លួនពីការថតរូបនេះទៀតហើយ ដោយលោកនិយាយថា៖«ព្រោះតែកាយវិការនោះហើយដែលបានរុញច្រាន ការងារសិល្បៈសម្តែងរបស់ខ្ញុំឲ្យស្ងប់ស្ងាត់ជាងមុន»។
ជាង១០ ឆ្នាំក្នុងប្រវត្តិការងារសិល្បៈរបស់លោក អេនឌី មិនសូវជាទទួលបានប្រជាប្រិយភាពនោះទេ ក្រៅពីលេចធ្លោក្នុងកាយវិការថតរូបសិចស៊ីជាមួយស្រីស្អាត ដែលមានឈ្មោះក្នុងវិថីសិល្បៈនោះ។
ជារឿយៗ គេតែងតែសង្កេតឃើញលោក អេនឌី បញ្ចោញរូបថតបែបសិល្បៈសិចស៊ី ជាមួយសិល្បការិនី រួមអាជីពជាច្រើនទាំងតារាចម្រៀង តារាសម្តែង ពិធីការិនី ដោយក្នុងរូបភាពទាំងអស់នោះ ភាគច្រើនតារាស្រីៗបញ្ចេញដើមទ្រូងកៀកកើយនែបនិត្យគ្នា ធ្វើឲ្យអ្នកទស្សនាហើយ អត់ទ្រាំស្រក់ទឹកមាត់មិនបាន ហើយក៏មានមតិរិះគន់ជាច្រើនផងដែរ ។
រូបថតស្រើបស្រាលសិចស៊ីបែបក្តៅសាច់របស់សិល្បការិនីខ្មែរ ដែលស្ថិតក្នុងរង្វង់ដៃរបស់លោក អេនឌី ដែលទទួលការចាប់អារម្មណ៍ និងរិះគន់ច្រើនដែរនោះ មានដូចជា នាង វ៉ាង ស្រីណូ កុល ដាវី កែវ នីសា គង់ ច័ន្ទស្រីមុំ សុខ សោម៉ាវត្តី ហ៊ិន ច័ន្ទនីរ័ត្ន យុគ ចិន្តា ជាដើម។
នៅ ឆ្នាំ២០១២ លោក អេន ឌី បានថតឱបរឹតតារាស្រីវ័យក្មេងៗ ខ្ចីល្ហក់ក្នុងសិល្បៈ គឺនាង តេង លក្ខិណា និងពេជ្រ សូលិកា ធ្វើឲ្យប្រុសៗជាច្រើន ច្រណែនលោក។ ឆ្នាំ២០១៣នេះ ក្រៅពីបង្ហាញរូបកៀកកើយសិចស៊ី ជាមួយតារាដ៏ខ្ពស់ស្រឡះ រាងស្វែល នាងទឹម រដ្ឋា ជាអ្នកបង្ហាញម៉ូដ និងសម្តែងដ៏ល្បីឈ្មោះ លោក អេនឌី ក៏បានបញ្ជាក់ឲ្យដឹងថា៖«សម្រាប់នាង ទឹម រដ្ឋា នាងជាស្រីស្អាតទី៤៩ហើយដែលលោកបានថតរូបសិចស៊ីស្រើបស្រាលជាមួយ»។ឭ
តារាសម្តែងចូលចិត្ត បង្ហាញគល់សុដន់ ដ៏ទ្រលុកទ្រលន់ និងគល់ភ្លៅសខ្ចី កុល ដាវី បានអះអាងថា អេនឌី ជាដៃគូប្រុសប្រកបដោយភាពទាក់ទាញបំផុតក្នុងចំណោមដៃគូជាច្រើន របស់នាងក្នុងការងារសិល្បៈ។ នាងកុល ដាវីនិយាយដោយមិនលាក់លៀមថា៖ «ខ្ញុំក៏ចង់មានរូបថត បែបសិចស៊ីខ្លះបន្ថែមទៀតជាមួយលោក អេនឌីដែរ»។
នាង កុល ដាវី បានពន្យល់ថា៖ «ខ្ញុំដឹងថារូបភាពខ្ញុំថតជាមួយលោក អេនឌី នោះ ក៏មានអ្នករិះគន់ដែរ ប៉ុន្តែក៏មានអ្នកចាប់អារម្មណ៍ច្រើនផងដែរ ពីស្ទីលថតរូបបែបនេះ ព្រោះនេះវាជាស្ទីលរបស់សិល្បៈ ត្រូវតែប្លែកទើបទទួលបានការចាប់អារម្មណ៍»។
នាង ទឹម រដ្ឋា ដៃគូថតរូបទី៤៩ ជាមួយលោក អេន ឌី បានឲ្យដឹងថា៖«ពិតណាស់រូបថតដែលខ្ញុំថតបែបសិចស៊ីជាមួយលោក អេនឌី នោះទទួលបានការចាប់អារម្មណ៍ច្រើន ប៉ុន្តែក៏មានការរិះគន់ផងដែរ»។
នាងបន្តថា៖«ខ្លួនខ្ញុំផ្ទាល់មានរូបភាពខ្លះខ្ញុំក៏ខ្លាចខ្លួនឯង ដែរ ខ្ញុំក៏មិនចង់ឲ្យរូបភាពនោះសាយភាយដែរ ព្រោះមើលទៅវាសិចស៊ីពេកសម្រាប់នារីខ្មែរ»។
ទោះបីជាមានសំណាង បានប៉ះប្រាណស្រីស្អាតប្រមាណ៥០នាក់ក្តី តែអេនឌី ទើបតែដឹងខ្លួន ហើយនិយាយថា៖«ដោយសារខ្ញុំធ្លាប់ថតរូបជាមួយស្រីៗ ដែលគេឃើញហាក់ដូចជាអាក្រាតកាយ ហើយចាប់ពីពេលមានព័ត៌មានចុះផ្សាយពីតារាប្រុសស៊ិចស៊ីមក ធ្វើឲ្យទីផ្សារការងារសិល្បៈសម្តែង និងចម្រៀងហាក់ដូចជាមានការធ្លាក់ចុះ»។
លោកបន្តថា៖ «កន្លងមកខ្ញុំបានស្ងប់ស្ងាត់ពីសិល្បៈ ដូច្នេះខ្ញុំនឹងបង្វែរទិសដៅទៅប្រកបអាជីវកម្ម និងថតដាក់សៀវភៅទស្សនាវដ្ដីវិញ មិនចង់ថតស៊ិចស៊ីដូចពីមុនទេ»។
យ៉ាងណាក៏ ដោយ កាលពីថ្ងៃទី១៥ ខែធ្នូនេះ លោក អេនឌី មុនឡើងយន្តហោះដឹកដៃនាង សូ ដានីតា ចេញទៅសម្តែងនៅប្រទេសអូស្ត្រាលី លោកបាននិយាយថា៖ «ខ្ញុំប្រហែលជាដកខ្លួនពីកាយវិការនោះហើយ ពេលខ្ញុំត្រឡប់ពីសម្តែងនៅអូស្ត្រាលីវិញនោះ»៕
ប្រភពពី៖ www.khmer-note.com
0 comments:
Post a Comment