ចិនប្រកួតម្ដាយមុខក្មេងស្ទើរចែកមិនដាច់អ្នកណាម្ដាយអ្នកណាកូន?

ប្រទេសចិនបានរៀបចំការប្រកួត “Hot Mum” តាមរយៈគេហទំព័រ Weibo ឬដែលគេនិយមហៅថា Twitter ប្រទេសចិន។ ការប្រកួតនេះមានអ្នកម្ដាយដែលមានរូបសម្រស់ស្អាតក្មេងជាងវ័យជាច្រើននាក់បានផ្ញើរូបថតឈរថតជាមួយកូនស្រីដែលធ្វើឲ្យពិបាកបែងចែកថាម្នាក់ណាជាម្ដាយហើយម្នាក់ណាជាកូនស្រីណាស់។

ការប្រកួតតាមរយៈអ្នកម្ដាយដែលបានផ្ញើរូបថតគូជាមួយកូនស្រីបានសាងការភ្ញាក់ផ្អើលដល់មនុស្សគ្រប់ៗគ្នាដែលបានឃើញ។ អ្នកម្ដាយនីមួយៗមិនត្រឹមតែមានមុខមាត់ស្អាតទេ តែថែមទាំងមានស្បែកមុខក្មេងជាងវ័យមិនខុសគ្នាពីកូនស្រីដែលថតរូបជាមួយទេ។ អ្នកម្ដាយទាំងអស់បើមិនប្រាប់ថាជាម្ដាយ និងកូនច្បាស់ជាច្រឡំថាជាបងប្អូនស្រីមិនខាន។

រូបភាពដែលផ្ញើមកប្រកួតទាំងអម្បាលមានមានទាំងថតក្នុងហាងអាហារទីកន្លែងកម្សាន្តផ្សេងៗ និងក្នុងស្ទីតយ៉ូជាដើម។ អ្នកម្ដាយខ្លះជាអ្នកម្ដាយដែលមានមុខមាត់ក្មេងជាងវ័យពិតប្រាកដមែន ខណៈដែលអ្នកម្ដាយខ្លះទៀតបានប្រើប្រាស់គ្រឿងសំអាងដើម្បីបន្ថែមសម្រស់ និងបិទបាំងស្នាមជ្រីវជ្រួញដោយសារវ័យ។

បើទោះជាមានការប្រកួតប្រជែងក្ដី ប៉ុន្តែរង្វាន់សម្រាប់អ្នកឈ្នះតំណែង “Hot Mum” មិនត្រូវបានគេបង្ហើបឲ្យដឹងទេ។ ជួនកាលអាចបានត្រឹមតែទទួលតំណែង “Hot Mum” ក៏អាចចាត់ទុកថាជារង្វាន់ដ៏ល្អគ្រប់គ្រាន់សម្រាប់ពួកគាត់ក៏ថាបាន។ ជួយមើលតិចមើល៍ថា អ្នកម្ដាយទីប៉ុន្មានក្មេង ហើយស្អាតជាងគេ?