អ្នកប្រហែលជាមិនទាន់មានអាការៈឈឺខ្នងនៅឡើយទេ ដូច្នេះតើអ្នកចង់ធ្វើយ៉ាងណាកុំអោយវាកើតមាននៅពេលអនាគតដែរទេ? ខាងក្រោមនេះគឺជាវិធីសាស្ត្រមួយចំនួនដែលអាចជួយការពារកុំអោយមានការឈឺចាប់កើតឡើងបាន។
អង្គុយអោយបានត្រឹមត្រូវ
វេជ្ជបណ្ឌិត ជេសហ្វ្រេ ហ្គោលស្ទៀន (Jeffrey Goldstein, MD) នាយកខាងផ្នែកសេវាកម្មជំងឺឆ្អឹងខ្នង នៅមជ្ឈមណ្ឌលវេជ្ជសាស្ត្រ New York University Langone Medical Center និយាយថា អ្នកមិនត្រូវស្រមើស្រមៃអង្គុយលើកៅអីក្នុងការិយាល័យទៅតាមការស្រមើស្រមៃដែលមិនត្រឹមត្រូវឡើយ ប៉ុន្តែអ្នកគួរតែជ្រើសរើសកៅអីណាមួយដែលផ្តល់នូវការទ្រទ្រង់ល្អ ជាពិសេសកៅអីណាដែលផ្តល់តម្រេកខ្នងជាអក្សរអេស (S) និងមិនត្រូវរើសយកកៅអីណារាងជាងអក្សរស៊ីឡើយ (C)។ ជារៀងរាល់កន្លះម៉ោងចូរងើបឈរ និងដើរចេញរយៈពេលពីរបីវិនាទីសិនដើម្បីកុំអោយមានសម្ពាធនៅខ្នងខ្លាំងពេក។
ពាក់ស្បែកជើងដែលទន់ៗ
វេជ្ជបណ្ឌិត រ៉ាច រ៉ាវ (Raj Rao, MD) អនុប្រធាននាយកដ្ឋានផ្នែកវះកាត់ឆ្អឹងនៅមហាវិទ្យាល័យវេជ្ជសាស្ត្រ Wisconsin និយាយថា “បើសិនជាស្បែកជើងរបស់អ្នកមានពូកទ្រាប់តិចតួច ជើងរបស់អ្នកនឹងត្រូវប៉ះទង្គិចនឹងរបស់រឹងគ្រប់ពេល បន្ទាប់មកវានឹងប៉ះពាល់ដល់ឆ្អឹង និងសាច់ដុំក្នុងតំបន់ចង្កេះទៀត”។
កុំជក់បារី
វេជ្ជបណ្ឌិត រ៉ាវ (Dr. Rao) និយាយថា កាលពីឆ្នាំ ២០១០ ការសិក្សាឡើងវិញទៅលើកិច្ចការស្រាវជ្រាវចំនួន ៤០ បានរកឃើញថា អ្នកជក់បារីមានអាការៈឈឺចង្កេះច្រើនជាងអ្នកដែលមិនជក់បារី។នេះដោយសារតែការជក់បារីទៅកាត់បន្ថយលំហូរឈាមចូលទៅក្នុងឆ្អឹងកងខ្នង។
រៀនរបៀបលើកឥវ៉ាន
អ្នកគួរតែដឹងអំពីរបៀបលើកឥវ៉ាន ឬរបស់របរដែលធ្ងន់ៗតាមរយៈការប្រើជើង មិនមែនខ្នងឡើយ។ ចុះរបស់ស្រាលៗវិញគួរលើកដោយរបៀបម៉េចទៅ? ចំពោះចម្លើយគឺថា ចូរត្រេតខ្លួនទៅរករបស់នោះ, បត់ជង្គង់ម្ខាងបន្តិច និងឈានជើងម្ខាងទៀតនៅខាងក្រោយវិញដើម្បីអាចចាប់របស់នោះបាន។
ប្តូរខ្នើយកើយដែលតូចបន្តិច
វេជ្ជបណ្ឌិត ជេស៊ីកា សេលឡក់ (Jessica Shellock, MD) វេជ្ជបណ្ឌិតវះកាត់ឆ្អឹងខ្នងនៅឯវិទ្យាស្ថាន Texas Back និយាយថា “ការដេកលើខ្នើយពីរឬបីជាន់ជាប់គ្នាអាចធ្វើរឹងសាច់ដុំនៅកបាន”៕
0 comments:
Post a Comment