ក្រុមបាល់ទាត់ជម្រើសជាតិ U23 កម្ពុជា នឹងត្រូវជួបប្រកួតជាមួយ ទីម័រខាងកើត ដែលជាប្រកួតទី៣ក្នុងពូល B របស់ខ្លួន នៅម៉ោង៧:១៥នាទីយប់នេះ នាកីឡដ្ឋាន YTC Stadium ទីក្រុងរ៉ង់ហ្គូន ខណៈនេះក៏ជាប្រកួតទី៣របស់ទីម័រខាងកើតដែរ ហើយ២ប្រកួតកន្លងមកនេះ ក្រុមទាំងពីរចាញ់២ដងដូចគ្នា។
ជម្រើសជាតិ កម្ពុជា ថ្វីត្បិតចាប់ផ្ដើមមិនសូវបានល្អ ដោយបរាជ័យក្រោមថ្វីជើងម្ចាស់ផ្ទះ ៣-០ ប៉ុន្តែក្នុងជំនួបទល់នឹង ឥណ្ឌូណេស៊ី U23 កម្ពុជា ត្រូវបានអ្នកគាំទ្រក្នុងស្រុក សរសើរមិនដាច់ពីមាត់ថាលេងបានល្អជាងលើកមុនៗ ខណៈកាលឆ្នាំ២០១១ធ្លាប់ត្រូវ ឥណ្ឌូណេស៊ី លត់ដល់ទៅ ៦-០។ ទោះជាយ៉ាងណា គេមើលឃើញថាចង្វាក់លេងពីផ្នែកក្រោមទៅផ្នែកកណ្ដាល បង្ហាញភាពប្រសើរឡើង ដោយឡែកតំបន់ប្រយុទ្ធហាក់មិនសូវមុតស្រួច ជាហេតុធ្វើឲ្យបាត់បង់ឱកាស បំប៉ោងសំណាញ់គូប្រកួត។
កីឡាករកម្ពុជា (ខៀវ) និងកីឡាករឥណ្ឌូណេស៊ី (ក្រហម)ពេលប៉ះគ្នានៅស៊ីហ្គេមទី២៧
ម៉្យាងវិញទៀត កីឡាករ កម្ពុជា ត្រូវបានសង្កេតឃើញថា ថមថយកម្លាំងច្រើននៅ១០ទៅ១៥នាទីចុងក្រោយនៃការប្រកួត ដែលជាកត្ដាធ្វើឲ្យរបូតគ្រាប់បាល់យ៉ាងងាយ។ ប្រសិនបើ ក្រុមរបស់លោក Lee Tae Hoon អាចរក្សាកម្លាំងបានពេញ៩០នាទី និងរក្សាទម្រង់លេងបានល្អដូចកាលប្រកួតជាមួយ ឥណ្ឌូណេស៊ី នោះ U23 កម្ពុជា សង្ឃឹមច្រើនថាអាចជួប៣ពិន្ទុដំបូងរបស់ខ្លួន ក្នុងព្រឹត្តិការណ៍ស៊ីហ្គេមលើកនេះ។
៥ប្រកួតចុងក្រោយរបស់ U23 កម្ពុជា
Friendly: កម្ពុជា ១-១ Thanh Pho Ho Chi Minh FC (ក្លិបវៀតណាម)
Friendly: កម្ពុជា ១-០ សិង្ហបុរី
Friendly: កម្ពុជា ០-១ សិង្ហបុរី
SEA Games: កម្ពុជា ០-៣ មីយ៉ាន់ម៉ា
SEA Games: កម្ពុជា ០-១ ឥណ្ឌូណេស៊ី
ក្រុមទីម័រខាងកើត មានសមាជិកភាគច្រើនជាកូនកាត់អាមេរិកឡាទីន ក្នុងនោះមាន៦នាក់លេងឲ្យក្លិបនៅបរទេសដូចជា ថៃ ឥណ្ឌូណេស៊ី ម៉ាកាវ និងប្រេស៊ីល។ ទោះជាយ៉ាងណា កីឡាករលេងឲ្យក្លិបក្នុងស្រុកពាក់លេខ២៣ José Carlos ក៏ជាខ្សែប្រយុទ្ធមុតស្រួចមិនអាចមើលរំលងបានដែរ ត្បិតក្នុងការបង្ហាញខ្លួនឲ្យជម្រើសជាតិ៤លើកចុងក្រោយ កីឡាករវ័យ១៩ឆ្នាំរូបនេះស៊ុតបញ្ចូលទីបាន៤គ្រាប់។ ម៉្យាងនោះវិញ ទីម័រ សម្បូរទៅដោយកីឡាករមានកាយសម្បទាអំណោយផលគឺ មានមាឌធំ បើនិយាយពីកម្ពស់វិញ ជាមធ្យម១.៧៧ម៉ែត្រ។
កីឡាករ ទីម័រ(អាវក្រហម) និងកីឡាករថៃ (ខៀវ)ប្រកួតស៊ីហ្គេមទី២៧
៥ប្រកួតចុងក្រោយរបស់ U23 ទីម័រខាងកើត
Friendly: ទីម័រខាងកើត ០-០ ឥណ្ឌូណេស៊ី
Friendly: ទីម័រខាងកើត ២-០ ហ្វីលីពីន
Friendly: ទីម័រខាងកើត ០-១ PSS Sleman (ក្លិបឥណ្ឌូណេស៊ី)
SEA Games: ទីម័រខាងកើត ១-៣ ថៃ
SEA Games: ទីម័រខាងកើត ១-៣ មីយ៉ាន់ម៉ា
ប្រវត្តិជួបគ្នាកាលស៊ីហ្គេមលើកទី២៥ នៅប្រទេសឡាវ
U23 កម្ពុជា ៤-១ ទីម័រខាងកើត U23
ចុះជំនួបលើកនេះ ប្រិយមិត្តទស្សន៍ទាយថា ក្រុមមួយណាទទួលបាន៣ពិន្ទុ?
អត្ថបទ៖ រស់ កាណាល់
0 comments:
Post a Comment