Cristiano Ronaldo បានស៊ុតបញ្ចូលទី៣គ្រាប់ម្នាក់ឯង ជួយឲ្យក្រុមជម្រើសជាតិព័រទុយហ្គាល់ជាប់ទៅលេងជុំផ្ដាច់ព្រ័ត្រ FIFA World Cup ៤លើកជាប់គ្នា ក្រោយយកឈ្នះស៊ុយអែត ៣-២ ក្នុងជើងទី២នៃវគ្គ play-off តំបន់អឺរ៉ុបយប់មិញនេះ។
Ronaldo អបអរក្រោយស៊ុតបញ្ចូលទី
ក្រៅពីការស៊ុត៣គ្រាប់ដ៏ល្អរបស់ Ronaldo កីឡាករគូប្រជែងជើងខ្លាំង Zlatan Ibrahimovic របស់ស៊ុយអែត ក៏បានបំប៉ោងសំណាញ់ទី២គ្រាប់ផងដែរ ពោលគឺដោយការតែត១គ្រាប់ និងស៊ុតហ្រ្វីឃីក១គ្រាប់។
ជាមួយគ្នានេះដែរ ក្រុមជើងឯកឆ្នាំ១៩៩៨ បារាំង ដែលចាញ់អ៊ុយក្រែន ២-០ កាលពីជើងទី១ បានវាយបកយកឈ្នះវិញ ៣-០ ក្នុងដីខ្លួនឯង ដើម្បីកក់កៅអីទៅប្រេស៊ីលទាំងមិនគួរឲ្យជឿ។ ៣គ្រាប់របស់ក្រុមលោក Didier Deschamps ធ្វើបានដោយកីឡាករ Liverpool, Mamadou Sakho, ខ្សែប្រយុទ្ធ Real Madrid, Karim Benzema និងការធ្វើឲ្យចូលទីខ្លួនឯងដោយកីឡាករអ៊ុយក្រែន Oleg Gusev។
កីឡាករក្រុមបារាំងអបអរក្រោយជ័យជម្នះ
ជ័យជម្នះរបស់បារាំង បានធ្វើឲ្យក្រុមនេះក្លាយជាក្រុមអឺរ៉ុបទី១ដែលអាចវាយបករហូតឡើងទៅ World Cup ក្រោយចាញ់ជើងទី១ដល់ទៅ២-០។ ចំណែកបរាជ័យរបស់អ៊ុយក្រែនវិញ បានធ្វើឲ្យក្រុមនេះបន្តកំណត់ត្រាឈឺចាប់នៅវគ្គ play-off ពោលគឺ ឆ្នាំ១៩៩៨ ចាញ់ក្រូអាត, ២០០២ ចាញ់អាល្លឺម៉ង់, ២០១០ ចាញ់ក្រិក ខណៈ play-off ពាន Euro ឆ្នាំ២០០០ ក៏ចាញ់ដែរ គឺចាញ់ស្លូវើនៀ។
ចំណែកក្រុមនៅអឺរ៉ុប២ទៀតដែលឡើងដែរនោះ គឺ ក្រិក និងក្រូអាត។ លទ្ធផលស្មើ ១-១ នៅដីរ៉ូម៉ានីក្នុងជើងទី២យប់មិញនេះ គឺល្មមគ្រប់គ្រាន់ឲ្យក្រិកជាប់ទៅប្រេស៊ីលក្រោយឈ្នះកាលពីជើងមុន ៣-១ ហើយនោះ។ ចំណែកក្រូអាតដែលស្មើអ៊ីស្លង់ ០-០ ក្នុងជើងទី១វិញ ក៏មានមុខនៅប្រេស៊ីលឆ្នាំក្រោយដែរ ក្រោយស៊ី ២-០ ជើងទី២។
Ronaldo អបអរក្រោយស៊ុតគ្រាប់ទី១
ក្រៅពី៤ក្រុមក្នុងតំបន់អឺរ៉ុបនេះ ក្រុម២ទៀតក្នុងតំបន់អាហ្វ្រិកក៏បានកក់សំបុត្រយន្តហោះទៅប្រេស៊ីលដែរ គឺហ្គាណា និងអាល់ហ្សេរី។ ហ្គាណាបានចាញ់ហ្គាណា ២-១ ក្នុងជើងទី២យប់មិញ ប៉ុន្តែនៅតែជាប់ក្រោយក្រុមនេះស៊ីដល់ទៅ ៦-១ ទៅហើយនោះកាលពីជើងទី១។ ចំណែកអាល់ហ្សេរីវិញ ក៏ជាប់ដែរ ក្រោយឈ្នះប៊ូគីណាហ្វាសូ ១-០ (ជើងទី១ចាញ់ ៣-២ តែឈ្នះដោយសាររូបមន្ត away goal)។
សរុបមកវិញ គិតមកទល់ពេលនេះ ក្រុមជាប់ទៅ World Cup រកឃើញ៣០ក្រុមហើយ នៅសល់តែ២ក្រុមទៀតប៉ុណ្ណោះ។ ២ក្រុមនោះ នឹងដឹងក្រោយការប្រកួត play-off ឆ្លងទ្វីប រវាង នូវែលហ្សេឡង់ និងម៉ិកស៊ីកូ ម៉ោង១រសៀលនេះ (ជើងទី១ ម៉ិកស៊ីកូ ឈ្នះ ៥-១) ខណៈអ៊ុយរុយហ្គាយ ជួប ហ្សកដានី ម៉ោង៦ព្រឹកស្អែក (ជើងទី១ អ៊ុយរុយហ្គាយ ឈ្នះ៥-០)។
ក្រុមទាំង៣០ មានដូចខាងក្រោម៖
| តំបន់ | ប្រទេសដែលជាប់ទៅ World Cup |
| អាស៊ី | ជប៉ុន, កូរ៉េខាងត្បូង, អ៊ីរ៉ង់, អូស្ត្រាលី |
| អឺរ៉ុប | បែលហ្សិក, បូស្នី-ហឺហ្ស៊េហ្គោវីណា, អង់គ្លេស, អាល្លឺម៉ង់, អ៊ីតាលី, ហុល្លង់, ព័រទុយហ្គាល់, រុស្សី, ស្វីស, អេស្ប៉ាញ, ក្រូអាត, បារាំង, ក្រិក |
| អាហ្វ្រិក | កាមេរ៉ូន, ហ្គាណា, កូឌីវ័រ, អាល់ហ្សេរី, នីហ្សេរីយ៉ា |
| អាមេរិកកណ្ដាល, ខាងជើង, ការីប៊ីន (CONCACAF) | កូស្ដារីកា, ហុងឌុយរ៉ាស់, សហរដ្ឋអាមេរិក |
| អាមេរិកខាងត្បូង | អាហ្សង់ទីន, ប្រេស៊ីល (ម្ចាស់ផ្ទះ), កូឡុំប៊ី, អេក្វាឌ័រ, ឈីលី |
តើ២ក្រុមណានឹងឡើងទៅបង្រ្គប់៣២ក្រុមនៅ World Cup 2014?
កីឡាករក្រុមព័រទុយហ្គាល់នាំគ្នាលោតអបអរលើ Ronaldo ក្រោយស៊ុតគ្រាប់ទី៣
Evra ថើបគ្រូបង្វឹក Didier Deschamps ក្រោយចប់ការប្រកួត
វីដេអូហាយឡាយនៃការប្រកួត៖
0 comments:
Post a Comment