ក្នុងជំនួបមិត្តភាពសាកជើងយប់មិញនៅលើទឹកដីដែលខ្លួនលើកពាន World Cup ឆ្នាំ២០១០ ក្រុមជម្រើសជាតិលំដាប់ទី១ពិភពលោក អេស្ប៉ាញ រងបរាជ័យ ១-០ ក្រោមថ្វីជើងម្ចាស់ផ្ទះ អាហ្វ្រិកខាងត្បូង ខណៈក្រុមតោកំណាចអង់គ្លេសធ្វើឱ្យអ្នកគាំទ្រខកចិត្តជាលើកទី២ជាប់ៗគ្នាជាលើកដំបូងនៅ Wembley តាំងពីឆ្នាំ១៩៩៣មក ដោយចាញ់ អាល្លឺម៉ង់ ១-០ ស្របពេល ជប៉ុន ផ្ដួល ម្ចាស់ផ្ទះ បែលហ្ស៊ិក ៣-២។
លោក Vincent Del Bosque គ្រូបង្វឹកក្រុមគោជល់អេស្ប៉ាញ ដាក់កីឡាករជម្រើស១១នាក់ដំបូងសឹងតែពេញជើងទៅហើយយប់មិញ តែមិនអាចធ្វើអ្វីលើម្ចាស់ផ្ទះ អាហ្វ្រិកខាងត្បូងបានសោះ។ ផ្ទុយទៅវិញ ការឆ្កឹះរំលងដៃអ្នកចាំទី Iker Casillas ពីសំណាក់ខ្សែប្រយុទ្ធ Bernard Parker ក្នុងនាទីទី៥៦ គ្រប់គ្រាន់សម្រាប់ឱ្យ អាហ្វ្រិកខាងត្បូង ឆក់យកជ័យជម្នះនៅចំពោះមុនអ្នកទស្សនាផ្ទាល់ប្រហែល៤ម៉ឺននាក់។
បន្ទាប់ពីចាញ់ ឈីលី ២-០ កាលពីថ្ងៃសុក្រសប្ដាហ៍មុន អង់គ្លេស បន្តចាញ់ជាលើកទី២ជាប់គ្នានៅលើទឹកដីខ្លួនឯង ដោយត្រូវ អាល្លឺម៉ង់ ផ្ដួល ១-០។ គ្រាប់បាល់មួយគ្រាប់នេះកើតឡើងដោយការតែតបញ្ចូលទីរបស់ខ្សែការពារ Per Mertesacker ក្នុងនាទីទី៣៩។
យប់មិញនេះដែរ ក្រុមខ្លាំងរបស់អាស៊ី ជប៉ុន បានធ្វើរឿងអស្ចារ្យមួយទៀតបន្ទាប់ពីស្មើនៅដី ហុល្លង់ ២-២ សប្ដាហ៍មុន ដោយបំបាក់ម្ចាស់ផ្ទះ បែលហ្សិក ដែលសម្បូរទៅដោយកីឡាករលេងនៅ Barclays Premier League ក្នុងលទ្ធផល ៣-២។ Kevin Miralas របស់ក្លិប Everton ស៊ុតឱ្យ បែលហ្ស៊ិក ដែលមានឈ្មោះទៅលេង World Cup ជាលើកដំបូងតាំងពីក្រោយឆ្នាំ២០០២ នាំមុខក្នុងនាទីទី១៥។ តែបន្ទាប់ពីនោះមក គឺជាវេនរបស់ ជប៉ុន ម្ដង ពោល ខ្សែប្រយុទ្ធ Yōichirō Kakitani ខ្សែបម្រើប្រយុទ្ធ Keisuke Honda និង Shinji Okazaki រកបានមួយគ្រាប់ម្នាក់ក្នុងនាទីទី៣៧,៥៣និង៦៣ឱ្យ ជប៉ុន នាំមុខ៣-១វិញ។ ឈានដល់នាទីទី៧៩ ខ្សែការពារ Toby Alderweireld វាយបកឱ្យ បែលហ្ស៊ិក តាមពីក្រោយ ២-៣ ហើយគ្រាប់បាល់នេះនៅថេររហូតអាជ្ញាកណ្ដាលផ្លុំកញ្ចែបញ្ចប់ការប្រកួត។
ហុល្លង់ ស្មើ ០-០ ទល់នឹង កូឡុំប៊ី ខណៈកីឡាករ Jermaine Lens ទទួលកាតក្រហមតាំងពីនាទីទី៣៥
Tim Cahill រកជ័យជម្នះ១-០ ឱ្យ អូស្ត្រាលី លើ កូស្តារីកា
0 comments:
Post a Comment