Lionel Messi បាននិយាយកោតសរសើរទម្រង់លេងបច្ចុប្បន្នរបស់គូប្រជែង Cristiano Ronaldo នៅក្នុងកិច្ចសម្ភាសន៍មួយពេលទទួលពានស្បែកជើងមាសកាលពីថ្ងៃព្រហស្បតិ៍ម្សិលមិញ។
Messi ទទួលស្បែកជើងមាសក្រោយស៊ុតចូលច្រើនជាងគេនៅក្នុងលីករដូវកាលមុន
ខ្សែប្រយុទ្ធ វ័យ២៦ឆ្នាំរូបនេះ បានទទួលពានរង្វាន់ស្បែកជើងមាសក្នុងនាមជាកីឡាករស៊ុតបញ្ចូលទីច្រើនបំផុតក្នុងលីកកាលពីរដូវកាលមុន (៤៦គ្រាប់) លើសកីឡាករឯទៀតក្នុងលីកតំបន់អឺរ៉ុប។ នៅក្នុងពិធីនោះ Messi បានផ្ដល់ការគោរពដល់គូប្រជែងរួមអាជីព Ronaldo ដោយបាននិយាយប្រាប់កាសែតកីឡារបស់អេស្ប៉ាញ Marca ដូចខាងក្រោមនេះ៖
“ខ្ញុំមិនដឹងថាតើ Cristiano Ronaldo កំពុងឡើងដល់ចំណុចកំពូលរបស់គាត់ឬក៏នៅនោះទេ ប៉ុន្តែគាត់តែងតែស៊ុតបញ្ចូលទីនៅគ្រប់ការប្រកួត ទាំងសម្រាប់ក្លិប និងសម្រាប់ជម្រើសជាតិ។ គាត់អាចធ្វើបានបែបនេះជាច្រើនឆ្នាំមកហើយ ហើយទោះបីជាគាត់កំពុងដល់ចំណុចកំពូល ឬក៏ខ្វះបន្តិចដល់ក៏ដោយ ក៏មិនមានអ្វីខុសគ្នាទេ”។
ការនិយាយសរសើរនេះ គឺចំពេលដែល Ronaldo បានស៊ុតហ៊ែតទ្រីកជួយឲ្យព័រទុយហ្គាល់ឡើងទៅជុំផ្ដាច់ព្រ័ត្រ World Cup ជាលើកទី៤ជាប់គ្នា កាលពីថ្ងៃអង្គារកន្លងទៅ (ចុចអានលម្អិត)។
Ronaldo ស៊ុតចូលទី៤គ្រាប់ក្នុងជំនួប play-off World Cup ទាំង២ជើងទល់នឹងស៊ុយអែត
Messi ដែលមិនអាចចូលលេងបានដល់ទៅ៨សប្ដាហ៍ដោយសាររបួស ក៏បានលើកឡើងពីក្ដីស្រមៃចង់ឈ្នះពាន World Cup នោះដែរ។ ខ្សែប្រយុទ្ធដែលឈ្នះពាន Ballon d’Or ៤ឆ្នាំជាប់គ្នារូបនេះ បានចាត់ទុក ប្រេស៊ីល អាល្លឺម៉ង់ និងអេស្ប៉ាញ ជាគូប្រជែងធំបំផុតសម្រាប់អាហ្សង់ទីននៅ World Cup ខណៈ Real Madrid និង Bayern Munich ជាគូប្រជែងដ៏តានតឹងក្នុងការដណ្ដើមពាន UEFA Champions League។
មិនខុសពីឆ្នាំមុននោះទេ ទាំង Messi និង Ronaldo សុទ្ធតែជាប់ក្នុងបញ្ជីបេក្ខភាពកីឡាករដណ្ដើមពាន Ballon d’Or ឆ្នាំនេះ។ មានមតិជាច្រើនបានធ្វើការប្រៀបធៀបកីឡាករទាំងពីរ ខណៈប្រិយមិត្តរបស់យើងខ្ញុំក៏បានចូលរួមបោះឆ្នោតស្ទង់មតិជាច្រើនផងដែរ ដែលលទ្ធផលគឺ Ronaldo កំពុងនាំមុខគេគិតត្រឹមព្រឹកនេះ (១៦៨៣សំឡេង) តាមពីក្រោយ Messi (៥៩៨សំឡេង), Robin van Persie (២៦១សំឡេង), Mesut Ozil (១៨១សំឡេង), Neymar (១៥៧) និង Franck Ribery (១២៧សំឡេង) (ចុចអានលម្អិតទីនេះ)។
Messi និង Ronaldo គូប្រជែងដ៏ខ្លាំងក្លាក្នុងប៉ុន្មានឆ្នាំចុងក្រោយ
សម្រាប់ប្រិយមិត្តវិញ មានអ្វីចង់និយាយដែរ?
អត្ថបទទាក់ទង៖ “Ronaldo ឬ Messi?”, “Messi ឬ Ronaldo?” សំណួរពេញនិយមក្នុងបាល់ទាត់
0 comments:
Post a Comment