មានការប៉ះទង្គិចគ្នាដោយហឹង្សា រវាងក្រុមកម្មករ និងប៉ូលីស(មានវីដេអូ)
មានការប៉ះទង្គិចគ្នារវាងក្រុមកម្មកររោងចក្រ SL ដែលព្យាយាមដង្ហែរក្បួនធ្វើដំណើរមកកាន់ផ្ទះរបស់លោកនាយករដ្ឋមន្ត្រីហ៊ុន សែនកាលពីវេលាម៉ោង ៩ព្រឹកថ្ងៃទី ១២ វិច្ឆិការ ២០១៣។
ការប៉ះទង្គិចដោយហឹង្សានេះ បានកើតឡើងខណៈក្រុមកម្មករទាំងអស់ ត្រូវបានរារាំងដោយក្រុមសមត្ថកិច្ចប្រម៉ាណ 300 នាក់នៅចំណុចខាងមុខវត្តស្ទឹងមានជ័យ និងម្តុំស្ពានអាកាសដែលកំពុងសាងសង់។
តាមសេចក្តីរាយការណ៌របស់ VOD បានឲ្យដឹងថា ក្នុងការផ្ទុះហិង្សានោះ កម្លាំងសមត្ថកិច្ច បានប្រើរថយន្តពន្លត់អគ្គិភ័យ បាញ់ទឹកលើកម្មករ។ ជាការតបវិញ កម្មករ បានប្រើដុំថ្ម គប់ទៅលើកម្លាំងសមត្ថកិច្ច។ កម្មករដែលភាគច្រើនជាបុរស បានវាយកម្ទេចរថយន្តប៉ូលិស ដែលចតចោលនៅក្នុងវត្តស្ទឹងមានជ័យ រួចទាញមកដុតចោលនៅលើផ្លូវ។
VOD បានបន្តរៀបរាប់ថា ការតវ៉ារបស់កម្មករ គឺដើម្បីទាមទារឲ្យដកប្រធានរដ្ឋបាលរោងចក្រ លោក មាស សុថា ឲ្យដកកម្លាំងសមត្ថកិច្ចចម្រុះចេញពីបរិវេណរោងចក្រ និងផ្តល់ប្រាក់ឈ្នួលដល់កម្មករអំទ្បុងបាតុកម្មរយៈបីខែជាដើម។ កាលពីថ្ងៃទី២២ ខែតុលា ឆ្នាំ២០១៣ កម្មកររោងចក្រនេះ បានហែក្បួន មកផ្ទះលោកនាយករដ្ឋមន្ត្រី ហ៊ុន សែន សុំអន្តរាគមន៍។ ប៉ុន្តែ ពួកគេត្រូវបានកម្លាំងសមត្ថកិច្ចបង្ក្រាប បណ្តាលឲ្យស្ត្រីមួយចំនួនរងរបួស។
វិទ្យុអាស៊ីសេរីបានចុះផ្សាយថា ក្រុមកម្មករបានដុតរថយន្តប៉ូលិសមួយគ្រឿង និងម៉ូតូ ២គ្រឿង នៅខាងមុខវត្តស្ទឹងមានជ័យ ដោយសារពួកគេខឹងសម្បារនឹងសមត្ថកិច្ចដែលបានយកឡានទឹកមកបាញ់ បង្ក្រាបក្រុមកម្មករ៕
---------
រូបភាព៖ វិទ្យុអាស៊ីសេរី
0 comments:
Post a Comment