កីឡាប៉េតង់ ដែលជាកីឡាមានសក្ដានុពលរបស់កម្ពុជាបច្ចុប្បន្ន ដោយទើបតែនាំមេដាយជាច្រើនទាំង មាស ប្រាក់ សំរឹទ្ធ មកពីឆាកអន្តរជាតិកាលពីចុងខែតុលាកន្លងទៅ ត្រូវបានប្រទេសសិង្ហបុរី ជាមិត្ត មកសុំរៀនសូត្រជាមួយ ដើម្បីត្រៀមខ្លួនក្នុងពេលធ្វើជាម្ចាស់ផ្ទះស៊ីហ្គេម ឆ្នាំ ២០១៥ ខាងមុខ។
លោក ឯម ហៀង នៅកណ្ដាល
យោងតាមលោក ឯម ហៀង អគ្គលេខាធិការរងសហព័ន្ធកីឡាប៊ូលនិងប៉េតង់កម្ពុជា បានប្រាប់ថា ខាងប្រធានសហព័ន្ធកីឡាប៉េតង់សិង្ហបុរី បានមកពិភាក្សាជាមួយសហព័ន្ធប៉េតង់កម្ពុជា កាលពីថ្ងៃទី ១២ វិច្ឆិកា កន្លង ដើម្បីបញ្ជូនយុវជនរបស់ប្រទេសគេមករៀនសូត្រជាមួយ ដោយមានទាំងប្រាក់ឧបត្ថម្ភដល់គ្រូបង្វឹកខ្មែរមួយចំនួនទៀតផង។
ខាងភាគីសិង្ហបុរី នឹងបញ្ជូនកីឡាកររបស់ខ្លួនមកហ្វឹកហាត់នៅកម្ពុជាអំឡុងខែ កុម្ភៈ ឬ មិនា ឆ្នាំ ២០១៤ ខាងមុខ ដោយចេញថ្លៃស្នាក់នៅ ហូបចុក ដល់សិស្សរបស់គេ។ ” ដំបូងឡើយគេគ្រោងឱ្យសិស្សគេទៅហ្វឹកហាត់នៅថៃទេ ប៉ុន្តែគេបានប្ដូរមកជ្រើសយកកម្ពុជាវិញដោយសារឃើញថាខ្មែរយើងខ្លាំងដូចថៃដែរ ណាមួយយើងទើបឈ្នះមេដាយមាស ពិភពលោក និង មេដាយជាច្រើនក្នុងការប្រកួតជ្រើសរើសជើងឯកអាស៊ី កាលពីពេលថ្មីៗ។ ម៉្យាងទៀតគេថាខ្មែរយើងស្មោះត្រង់ជាង”។ លោក ឯម ហៀង បញ្ជាក់។
អត្ថបទពាក់ព័ន្ធ៖ ប៉េតង់ នាំមេដាយមាសនិងសំរឹទ្ធមកពីប្រទេសបារាំង ជូនជាតិក្នុងរដូវភ្ជំបិណ្ឌ
កន្លងមកកាលពីសីហ្គេម ២០០១ ប្រទេសម៉ាឡេស៊ី ធ្លាប់ទទូចចង់ឱ្យគ្រូបង្វឹកខ្មែរទៅបង្ហាត់ដល់សិស្សគេ ដោយផ្ដល់ប្រាក់ខែ ជាង ១០០០ ដុល្លារអាមេរិក ប៉ុន្តែត្រូវខាងកម្ពុជាបដិសេធន៍។ ក្រោយមកទៀត ក្នុងឆ្នាំ ២០០៥ ក្នុងនាមជាម្ចាស់ផ្ទះ ស៊ីហ្គេម ហ្វីលីពីន បានសុំអញ្ជើញគ្រូបង្វឹកខ្មែរ ឱ្យទៅបង្ហាត់កីឡាករ ម្ដង ហើយចំពេលគ្រូរបស់កម្ពុជាទៅប្រជុំនៅហ្វីលីពីន ផងក៏សម្រេចទទួលបង្ហាត់តែម្ដងទៅ៕
0 comments:
Post a Comment