គម្រោងពង្រីកបន្ថែមទំហំប្រលានយន្តហោះខ្នាតអន្តរជាតិចំនួនពីររបស់កម្ពុជា គឺអាកាសយានដ្ឋានអន្តរជាតិភ្នំពេញ និង សៀមរាប ត្រូវបានប្រកាសឡើងកាលពីថ្ងៃទី ៦ វិច្ឆិកា ម្សិលមិញ ដោយត្រៀមកញ្ចប់ទឹកប្រាក់ចំណាយប្រមាណ ៨៧លានដុល្លារអាមេរិក។
ក្រុមហ៊ុនសាងសង់ម៉ាឡេស៊ី Muhibbah Engineering (M) Bhd បានចាប់ដៃជាមួយក្រុមហ៊ុនបារាំង Societe Concessionnaire de L’Aeroport ចុះហត្ថលេខាលើកិច្ចសន្យាចំនួនពីរដើម្បីសាងសង់ និងពង្រីកបន្ថែមប្រលានយន្តហោះលំដាប់អន្តរជាតិនៅកម្ពុជា ប៉ុន្តែគម្រោងនេះ មិនបានបញ្ជាក់ពីទំហំផ្ទៃដី ដែលត្រូវពង្រីកលើប្រលានទាំងពីរនេះទេ។
អាន៖ កន្លែងណាទាក់ទាញបំផុតនៅភ្នំពេញ?
យន្តហោះVIP នៅអាកាសយានដ្ឋានអន្តរជាតិភ្នំពេញ
គម្រោងពង្រីកផ្ទៃដី និងសាងសង់អគារបន្ថែមនេះ ធ្វើឡើងបន្ទាប់ពីបរិមាណភ្ញៀវទេសចរណ៍អន្តរជាតិមានកំណើនយ៉ាងគំហុកប៉ុន្មានឆ្នាំចុងក្រោយនេះ។ ជាក់ស្ដែង បើយោងតាមរបាយការណ៍របស់ក្រសួងទេសចរណ៍កម្ពុជា កាលពីឆ្នាំ ២០១២ បានបង្ហាញថា ក្រសួងនេះ អាចរកចំណូលមិនតិចជាង ២,២ពាន់លានដុល្លារអាមេរិកទេ ពីភ្ញៀវទេសចរណ៍ប្រហែល ៣លាន ៥៨ម៉ឺននាក់។ រដ្ឋមន្ត្រីក្រសួងទេសចរណ៍ ឯកឧត្ដម ថោង ខុន បានបង្ហាញក្ដីរំពឹងទុកថា ឆ្នាំ ២០១៣នេះ អ្នកទេសចរណ៍នឹងបន្តមកទស្សនាកម្ពុជា មិនក្រោម ៤លាននាក់ឡើយ។
អាន៖ វៀតណាមត្រៀមជាង ៨ពាន់លានដុល្លារសង់ ប្រលានយន្តហោះថ្មី៤
សារព័ត៌មាន ដឺស្ដារ របស់ម៉ាឡេស៊ី ដដែលបានបញ្ជាក់ឲ្យដឹងថា គិតចាប់ពីថ្ងៃចុះហត្ថលេខាព្រមព្រៀង កាលពីម្សិលមិញតទៅ ក្រុមហ៊ុនដៃគូទទួលបន្ទុកសាងសង់ទាំងពីរខាងលើព្យាករណ៍ថា គម្រោងនេះនឹងបញ្ចប់រួចរាល់ជាស្ថាពរត្រឹមចុងឆ្នាំ ២០១៥ ដោយត្រូវពេលវេលាប្រហែលជា ២៨ខែ (២ឆ្នាំ ៤ខែ) សម្រាប់អាកាសយានដ្ឋានភ្នំពេញអន្តរជាតិ និង ២៣ខែ (ខ្វះ១ខែ ២ឆ្នាំ) សម្រាប់គម្រោងពង្រីកអាកាសយានដ្ឋានសៀមរាបអន្តរជាតិ។
អាន៖ ៥ប្រទេសមានសេដ្ឋកិច្ចលូតលឿនបំផុតក្នុងលោក
រាជរដ្ឋាភិបាលបានផ្ដល់សិទ្ធិដល់ក្រុមហ៊ុនបារាំង SCA (៧០%) និងក្រុមហ៊ុនម៉ាឡេស៊ី Muhibbah Masteron Cambodia (៣០%) គ្រប់គ្រង អាកាសយានដ្ឋានចំនួន៣ រួមមានអន្តរជាតិភ្នំពេញ សៀមរាប និងអាកាសយានដ្ឋានក្នុងស្រុក ក្រុងព្រះសីហនុ រយៈពេល ២៥ឆ្នាំ តាំងពីឆ្នាំ ១៩៩៥មក៕
0 comments:
Post a Comment