បន្ទាប់ពីអ៊ីតាលី និងហុល្លង់បានកក់កៅអីទៅប្រេស៊ីលតាំងពីខែមុន ពេលនេះក្រុម៣ផ្សេងទៀតក្នុងតំបន់អឺរ៉ុបក៏បានធ្វើឲ្យប្រាកដថាបានទៅ World Cup ឆ្នាំក្រោយជាស្វ័យប្រវត្តិផងដែរ គឺ បែលហ្សិក អាល្លឺម៉ង់ និងស្វីស។
បែលហ្សិកបានជាប់ទៅ World Cup ជាលើកដំបូងគិតចាប់តាំងពីឆ្នាំ២០០២មក ក្រោយយកឈ្នះគូប្រជែង ក្រូអាត ក្នុងពូល A ២-១។ លទ្ធផលឈ្នះនេះបានធ្វើឲ្យបែលហ្សិកឡើងដល់២៥ពិន្ទុ លើសក្រូអាតដល់ទៅ៨ពិន្ទុ ខណៈការប្រកួតសល់តែ១ប្រកួតទៀតប៉ុណ្ណោះ។ ចំណែកក្រូអាតវិញ ក៏មិនទាន់អស់ឱកាសនោះដែរ ដោយយ៉ាងហោចណាស់ក៏បានលេខ២ដែរក្រោយការប្រកួតយប់មិញនេះ ប៉ុន្តែនៅមិនទាន់ប្រាកដថាអាចបង្ហាញខ្លួននាវគ្គ play-off ឬអត់។
បែលហ្សិកអបអរក្រោយជាប់ស្វ័យប្រវត្តិ
ចំណែកអាល្លឺម៉ង់វិញ ក៏បានចូលរួមទៅប្រេស៊ីលជាមួយបែលហ្សិកផងដែរ ក្រោយយកឈ្នះសាធារណរដ្ឋអៀរឡង់ ៣-០។ ជ័យជម្នះនេះបានធ្វើឲ្យអាល្លឺម៉ង់លើសពិន្ទុក្រុមលេខ២ ស៊ុយអែត៥ពិន្ទុ បើទោះបីជាស៊ុយអែតយកឈ្នះអូទ្រីស ២-១ ទទួលបាន៣ពិន្ទុថែមទៀតដែរក៏ដោយ ខណៈការប្រកួតសល់តែម្នាក់១ប្រកួតទៀតប៉ុណ្ណោះ។ យ៉ាងណាក្ដី ស៊ុយអែតក៏បានធ្វើឲ្យប្រាកដថាខ្លួនអាចជាប់លេខ២ជាស្វ័យប្រវត្តិក្នុងពូលនោះដែរ។
ចំណែកស្វីសវិញក៏បានកក់កៅអីទៅ World Cup ជាលើកទី៣ជាប់ៗគ្នាផងដែរ ក្រោយយកឈ្នះអាល់បានី ២-១។ លទ្ធផលឈ្នះនេះ ធ្វើឲ្យស្វីសលើសពិន្ទុអ៊ីស្លង់ (Iceland) ៥ពិន្ទុ ទោះបីអ៊ីស្លង់យកឈ្នះស៊ីប្រ៊ូស ២-០ ក៏ដោយ។ ក្រុមដែលនៅមានសិទ្ធិប្រជែងយកកៅអីលេខ២ គឺអ៊ីស្លង់ និងស្លូវើនៀ។ ចំណែកន័រវែស អាល់បានី និងស៊ីប្រ៊ូសធ្លាក់ស្វ័យប្រវត្តិហើយ។
កីឡាករអាល្លឺម៉ង់អបអរក្រោយស៊ុតបញ្ចូលទី
សរុបមកវិញ នៅតំបន់អឺរ៉ុបដែលមាន១៣កៅអី បានរកឃើញ៥កៅអីហើយ គឺអ៊ីតាលី ហុល្លង់ បែលហ្សិក អាល្លឺម៉ង់ និងស្វីស។ ពូល៤ទៀតនៅមិនទាន់រកឃើញក្រុមលេខ១នៅឡើយទេ ប៉ុន្តែក៏កៀកនឹងរកឃើញដែរ។ ក្នុងនោះ ពូល F រុស្សីបានលើសព័រទុយហ្គាល់ ៣ពិន្ទុ ក្រោយយកឈ្នះលុចហ្សំបួរ ៤-០ ខណៈព័រទុយហ្គាល់បានត្រឹមស្មើអ៊ីស្រាអែល ១-១។ ទោះមិនទាន់មានឈ្មោះជាប់ស្វ័យប្រវត្តិ ប៉ុន្តែរុស្សីមានភាគរយខ្ពស់ណាស់ក្នុងការជាប់ទៅប្រេស៊ីលក្នុងនាមជាក្រុមលេខ១ក្នុងពូល ដោយសារការប្រកួតចុងក្រោយត្រូវប៉ះក្រុមមិនសូវខ្លាំងអាហ្សេបៃហ្សង់។
ចំណែកពូល G វិញ គឺជាពូលដែលតានតឹងជាងគេបំផុត ពោលគឺបូស្នី-ហឺហ្ស៊េហ្គោវីណា និងក្រិក មាន២២ពិន្ទុស្មើគ្នាដោយគ្រាន់តែបូស្នីមានគ្រាប់លើសដាច់ប៉ុណ្ណោះ (+23 និង+៦)។ ការប្រកួតយប់មិញក្រុមទាំង២សុទ្ធតែឈ្នះ ដោយបូស្នី ឈ្នះលិចធិនស្តែន ៤-១ និងក្រិក ឈ្នះស្លូវ៉ាគី ១-០។ ប្រកួតចុងក្រោយ ក្រិកត្រូវប៉ះលិចធិនស្តែន ខណៈបូស្នីប៉ះលីទុយអានី។
កីឡាករស្វីសអបអរក្រោយស៊ុតបញ្ចូលទី
ចំណែកពូល H វិញ អង់គ្លេសនៅបន្តឈរកំពូលតារាង ប៉ុន្តែមិនទាន់ស្រណុកចិត្តនោះទេ ត្បិតលើសក្រុមលេខ២អ៊ុយក្រែនតែ១ពិន្ទុប៉ុណ្ណោះ។ លទ្ធផលយប់មិញ អង់គ្លេស ឈ្នះ ម៉ុងតេណេក្រូ ៤-១ ខណៈអ៊ុយក្រែនក៏ឈ្នះប៉ូឡូញ ១-០ ដើម្បីបន្តដេញប្រកៀកអង់គ្លេស។ ប្រកួតចុងក្រោយនាសប្ដាហ៍ក្រោយ គឺអង់គ្លេស ប៉ះប៉ូឡូញ ខណៈអ៊ុយក្រែន ជួបក្រុមអន់ សាន់ម៉ារីណូ។ បើអង់គ្លេសភ្លាត់ស្នៀតជាមួយប៉ូឡូញ នោះអ៊ុយក្រែននឹងឡើងលេខ១វិញ ត្បិតសាន់ម៉ារីណូ មិនរំពឹងទប់អ៊ុយក្រែនបានឡើយ។
ពូលចុងក្រោយ គឺពូល I ក្រុមអេស្ប៉ាញ នៅតែបន្តឈរលេខ១ ក្រោយយកឈ្នះបេឡារូស ២-១។ ជ័យជម្នះនេះបានធ្វើឲ្យអេស្ប៉ាញ លើសបារាំង ៣ពិន្ទុ ខណៈប្រកួតចុងក្រោយ អេស្ប៉ាញ ជួប ហ្សកហ្ស៊ី រីឯ បារាំង តតាំង ហ្វាំងឡង់។ អេស្ប៉ាញមានភាគរយខ្ពស់ថានឹងអាចឡើងក្នុងនាមជាក្រុមកំពូលតារាង។
លទ្ធផលក្រុមជាប់ស្វ័យប្រវត្តិក្នុងវគ្គជម្រុះក្នុងទ្វីបផ្សេងទៀតយើងខ្ញុំនឹងផ្សាយជូននាពេលបន្ទាប់ទៀតនេះ៕
0 comments:
Post a Comment