គេពេលស្រឡាញ់គ្នា អ្វីៗក៏ល្អដែរ ហើយម្នាក់ៗសប្បាយចិត្តរហូតទាល់តែចាត់ទុកថាពិភពលោកនេះមានតែគេពីរនាក់។ លុះដល់ពេលបែកគ្នា អ្នកខ្លះចាត់ទុកពិភពលោកនេះថាឯកោបំផុត។ តើពួកគេធ្វើបែបណាទៅដើម្បីរំងាប់ការឈឺចាប់ទាំងនោះ? ខាងក្រោមនេះគឺជាវិធីដែលយុវវ័យជ្រើសរើសយកមកធ្វើបន្ទាប់ពីបែកគ្នា។
យុវតី សុម៉ាវត្តី អតីតនិស្សិតសាកលវិទ្យាល័យវិទ្យាសាស្ត្រសុខាភិបាល បានលើកឡើងថា បាត់បង់ស្នេហាមិនមែនមានន័យថាបាត់បង់អ្វីៗគ្រប់យ៉ាងនោះទេ។ ធ្លាប់មានបទពិសោធន៍បរាជ័យរឿងស្នេហ៍ យុវតីរូបនេះបានប្រាប់ទៀតថា ការប្រើប្រាស់ពេលវេលាឲ្យសប្បាយគឺជារឿងប្រសើរបំផុត។ កញ្ញារូបនេះបានបញ្ជាក់ថា ត្រូវធ្វើចិត្តឲ្យរីករាយ ដូចជា ដើរលេងជាមួយមិត្តភ័ក្ដិ មើលកុន ច្រៀងកម្សាន្ត និងញុំាអាហារឲ្យបានច្រើនៗដើម្បីធ្វើឲ្យជីវិតស្រស់ថ្លា។
យុវជន វន វ័យ២៥ឆ្នាំ ដែលធ្លាប់ខូចចិត្តរឿងស្នេហាកាលពីនៅរៀនវិទ្យាល័យ បានបង្ហើបឲ្យដឹងថា នៅថ្ងៃដំបូងពេលគេបែកគ្នា គឺគេផឹកស្រា។ ក៏ប៉ុន្តែគេដឹងថាវាមិនអាចជួយឲ្យភ្លេចស្នេហារបស់គេបានទេ ដូច្នេះគេក៏សម្រេចរកវិធីផ្សេងដើម្បីបំភ្លេចសង្សារគេដូចជា ប្ដូរទម្លាប់ពីទូរសព្ទ ឬផ្ញើសារទៅគេ មកជាការលេងហ្គេមតាមទូរសព្ទ និងងាកទៅរកការសិក្សាវិញ។
“ពេលនោះខ្ញុំលុបលេខទូរសព្ទគេ លប់សារគេផ្ញើមកទាំងអស់ដើម្បីកុំឲ្យនឹកឃើញរឿងចាស់”។ នេះជាវិធីដំបូងដែល កញ្ញា នី ម៉ី ជ្រើសរើសធ្វើវា។ ម៉ី បានបន្តទៀតថា ត្រូវធ្វើជីវិតឲ្យរវល់នឹងរឿងផ្សេងៗជាច្រើនដូចជា ការរៀនសូត្រ ធ្វើការងារផ្ទះ ជាដើមដើម្បីកុំឲ្យសល់ពេលនឹកឃើញដល់ស្នេហាបែកបាក់នោះទៀត។ បន្ថែមពីនេះទៅទៀតនោះ ត្រូវធ្វើខ្លួនឲ្យទៅជាមនុស្សថ្មីម្នាក់ទៀតដូចជា ការផ្លាស់ប្ដូរ ម៉ូដសក់ ស្ដាយតុបតែងខ្លួន និងសំលៀកបំពាក់ជាដើម។
ចំណែកឯយុវជន ផូ រុន ដែលបែកបាក់ស្នេហាអស់រយៈពេលប្រហែលជាមួយឆ្នាំមកហើយនោះ បានប្រាប់ថា ពេលដែលបែកគ្នាដំបូងគេពិបាកចិត្តខ្លាំងណាស់។ ក៏ប៉ុន្តែ រុន បាននិយាយថា ចេះធ្វើចិត្តឲ្យរឹងមាំគឺជាវិធីមួយដែលអាចបំភ្លេចគេបាន។ “និយាយឲ្យខ្លីទៅកុំគិតពីគេទៀត កុំទៅកន្លែងណាដែលធ្លាប់ទៅពីមុនមក តែអីចឹងនៅនឹកឃើញគេដដែលហ្នឹង។ ខ្ញុំខំប្រឹងធ្វើការងារ ដើរលេងជាមួយមិត្តភ័ក្តិ គ្រួសារ យូរៗភ្លេចគេឯង”។ រុន បាននិយាយបន្ថែម។
បើយោងតាមគេហទំព័រ Wikihow ក៏បានបង្ហាញពីគន្លឹះងាយសម្រាប់អ្នកយកទៅអនុវត្តដើម្បីបំភ្លេចសង្សារ និងស្នេហាបែកបាក់នោះដូចជា៖
-កុំគិតថាខ្លួនអ្នកអស់តម្លៃ។ ត្រូវធ្វើជីវិតឲ្យសប្បាយ និងរីករាយនូវអ្វីដែលអ្នកមាន។
-ជៀសវាងរំឭករឿងចាស់ល្អៗកន្លងមក ព្រោះវាអាចធ្វើឲ្យអ្នកនៅនឹកគេដដែល។
-វាមិនមែនជាថ្ងៃបញ្ចប់នៃអ្វីៗទាំងអស់ទេ។ អ្នកត្រូវគិតរឿងដែលវិជ្ជមានទើបជីវិតអ្នកស្រស់បំព្រង។
-ត្រូវគិតថាមានមិត្តភ័ក្ដិ និងគ្រួសារនៅចាំជួយអ្នកគ្រប់ពេល។
-ចាត់ទុកថាជាបទពិសោធន៍។
ចុះអ្នកវិញ តើនឹងធ្វើអ្វីបន្ទាប់ពីបែកគ្នា?
អត្ថបទ៖ ផល្លា សុម៉ាលីណា
0 comments:
Post a Comment