ស្របពេលសហព័ន្ធកីឡាបាល់ទាត់ បែលហ្ស៊ិក អាល់បានី ទួរគី អង់គ្លេស និង ស៊ែប ចង់បានខ្សែបម្រើស្លាបវ័យក្មេង Adnan Januzaj ទៅលេងឱ្យជម្រើសជាតិរបស់ពួកគេរៀងៗខ្លួន នៅពេលនេះ ក្រូអាត ចូលខ្លួនជាបេក្ខភាពទី៦ក្នុងការប្រជែងយកកីឡាកររបស់ក្រុម Manchester United ម្នាក់នេះទៅជួយជាតិរបស់ខ្លួន។
អត្ថបទ៖ ស្គាល់ Adnan Januzaj ប៉ុនណា?
សហព័ន្ធកីឡាបាល់ទាត់ក្រូអាតកំពុងលៃលកពេលដើម្បីធ្វើដំណើរមកនិយាយជាមួយ Januzaj អំពីរឿងលេងជម្រើសជាតិ ខណៈកីឡាករវ័យ១៨ឆ្នាំរូបនេះមានជម្រើសជាច្រើននៅក្នុងដៃ។
ទោះបីជាកើតនៅលើទឹកដីប្រទេស បែលហ្ស៊ិក ក៏ពិតមែន ប៉ុន្តែកីឡាករដែលមានម្ដាយឪពុកជនជាតិអាល់បានី-ក្រូអាត រូបនេះធ្លាប់បានបដិសេធការកោះហៅចូលក្រុមជម្រើសជាតិបែលហ្ស៊ិក ច្រើនដងរួចមកហើយ។ បច្ចុប្បន្ននេះ គ្រូបង្វឹកក្រុមជម្រើសជាតិបែលហ្ស៊ិកដែលមានកៅអីទៅលេងជុំផ្ដាច់ព្រ័ត្រ World Cup 2014 នៅប្រេស៊ីល ដោយស្វ័យប្រវត្តិហើយនោះ មិនទាន់បោះបង់ក្ដីសង្ឃឹមនៅឡើយទេ និងឱ្យដឹងជាសាធារណៈថានឹងមកជជែកជាមួយកីឡាកររូបនេះនៅទីក្រុង Manchester ក្នុងចេតនាឱ្យអតីតយុវជនថ្នាលរបស់ក្លិប Anderlecht ពិចារណាសាជាថ្មី។
អត្ថបទ៖ Wilshere អត់គាំទ្រឱ្យអង់គ្លេសយក Januzaj ចូលជម្រើសជាតិទេ
តាមរយៈឪពុកម្ដាយរបស់ខ្លួនដែលកើតនៅកូសូវ៉ូ Januzaj អាចលេងឱ្យ អាល់បានី ស៊ែប ឬ ទួរគី ប្រសិនបើគេចង់ ខណៈ អង់គ្លេស ក៏គេអាចលេងឱ្យបានដែរក្នុងពេលប៉ុន្មានឆ្នាំខាងមុខ តាមរយៈច្បាប់របស់សហព័ន្ធកីឡាបាល់ទាត់ពិភពលោក (FIFA) ដែលចែងថាកីឡាករសញ្ជាតិដើមដទៃដែលកើតនៅទីនោះ ត្រូវរស់នៅលើទឹកដីនៃប្រទេសថ្មីយ៉ាងតិច៥ឆ្នាំមុននឹងអាចទទួលបានសិទ្ធិចូលលេងបាល់ទាត់ឱ្យក្រុមជម្រើសជាតិនៃប្រទេសថ្មីនោះបាន។
អត្ថបទ៖ Barca ត្រៀមប្រមាញ់យក Januzaj ពី Man Utd
ឥឡូវនេះ បន្ទាប់ពីឃើញទេពកោសល្យដែល Januzaj បានបង្ហាញក្នុងរដូវកាលនេះ ជាពិសេសការស៊ុតបញ្ចូលទី២គ្រាប់ម្នាក់ឯង ឱ្យ Man Utd វាយបកយកឈ្នះម្ចាស់ផ្ទះ Sunderland ២-១ ក្នុងក្របខ័ណ្ឌ Premier League ថ្មីៗនេះ សហព័ន្ធកីឡាបាល់ទាត់ក្រូអាតក៏បានបោះជំហានចូលមកក្នុងបញ្ហានេះដែរ។ គ្រូបង្វឹក U21 ក្រូអាត ម្នាក់ឱ្យដឹងថា៖ “មិត្តភ័ក្ដិខ្ញុំម្នាក់នៅអាល់បានីប្រាប់ខ្ញុំថាម្ដាយរបស់ Adnan មានដើមកំណើតក្រូអាត ដូច្នេះយើងចាប់អារម្មណ៍គេខ្លាំងមែនទែន។ តែយើងក៏ដឹងដែរថាយើងមានការប្រជែងច្រើនចំពោះកីឡាករដ៏មានសក្ដានុពលម្នាក់នេះ។ យើងមិនទាន់បាននិយាយជាមួយគេនៅឡើយទេ ប៉ុន្តែយើងកំពុងរៀបគម្រោងដើម្បីជជែកជាមួយកីឡាករវ័យក្មេងម្នាក់នេះ”។
ទោះជាយ៉ាងណាក្ដី សាមីកីឡាករនៅមិនទាន់សម្រេចចិត្តនៅឡើយទេ ស្របពេលក្លិបបិសាចក្រហមបញ្ជាក់ថា Januzaj ផ្ដោតការយកចិត្តទុកដាក់ប្រឹងប្រែងឱ្យជាប់ក្នុងជម្រើស១១នាក់ដំបូងរបស់លោក David Moyes ឱ្យបានទៀងទាត់ជាមុនសិន ទើបគិតរឿងជម្រើសជាតិតាមក្រោយ៕
0 comments:
Post a Comment