កម្មវិធីប្រកួតប្រជែងស្នាដៃសិល្បៈខ្មែរក្រោមប្រធានបទ “មុខខ្មែរ” រកឃើញម្ចាស់ទឹកប្រាក់១០០០ដុល្លារ ទាំង៣រង្វាន់ហើយ កាលពីម្សិលមិញ។ នេះជាលើកទីពីរហើយដែលកម្មវិធីនេះត្រូវបានរៀបចំដោយសាកលវិទ្យាល័យភូមិន្ទវិចិត្រសិល្បៈ។
ជយលាភីធំរង្វាន់១០០០ដុល្លារបានទៅលើ កញ្ញា ញ៉ែម សុភាព (ផ្នែកឌីហ្សាញ) លោក ឈូក លីហួរ (ផ្នែកចម្លាក់) និងលោក អ៊ីម ពិសី (ផ្នែកវិចិត្រកម្ម)។
បើតាមព្រឹទ្ធបុរស សូ ចិន្តា នៃសាកលវិទ្យាល័យភូមិន្ទវិចិត្រសិល្បៈ បានប្រាប់ឲ្យដឹងថា កម្មវិធីនេះរៀបចំឡើងដើម្បីលើកទឹកចិត្តដល់យុវវ័យទូទាំងប្រទេសកម្ពុជាចូលរួមបញ្ចេញទេពកោសល្យសិល្បៈ លើផ្នែកវិចិត្រកម្ម ចម្លាក់ និងឌីហ្សាញ។ យ៉ាងណាមិញស្នាដៃដែលបានដាក់ចូលរួមប្រកួតក្នុងឆ្នាំនេះមានចំនួន១៣៧ស្នាដៃ ក្នុងនោះមាន ផ្នែកវិចិត្រកម្ម៦៥ ផ្នែកចម្លាក់១២ និងផ្នែកឌីហ្សាញ៦០។
កញ្ញា ញ៉ែម សុភាព វ័យ២៣ឆ្នាំមកពីសាលាសិល្បៈយ៉ាម៉ាដា ម្ចាស់ជយលាភីឌីហ្សាញមុខខ្មែរប្រណិតជាងគេ បានពន្យល់អត្ថន័យស្នាដៃរបស់ខ្លួនថា គំនូរនេះបង្ហាញពីនារីរបាំម្នាក់ដែលមានសិល្បៈនៅក្នុងខ្លួន ហើយមានទឹកចិត្តដ៏បរិសុទ្ធចំពោះសេចក្ដីស្នេហាដោយគេងនឹកសង្សារបណ្ដូលចិត្ត ហើយស្រមៃបានដៃសង្សារមកកាន់ថ្នាក់ថ្នម។ គំនូរនេះរចនាឡើងដោយមានសន្លឹកសាស្ត្រាស្លឹករឹតរហែកៗជាប់ពីលើផង បញ្ជាក់ថា វាឆ្លងកាត់ជាច្រើនសម័យកាលមកហើយ។ ចំណែកឯគំនូររូបមុខផ្ដេក ជាចំណុចលេចធ្លោមួយផងដែរ ព្រោះស្នាដៃជាច្រើនទៀតសុទ្ធតែគូរចំពីមុខ ឬមុខបែរចំហៀង។
យ៉ាងណាមិញ ម្ចាស់ជយលាភីលេខ១ផ្នែកចម្លាក់ លោក ឈូក លីហួរ ក៏បានពន្យល់ពីចំណុចពិសេសរបស់ស្នាដៃខ្លួនថា នៅពេលមនុស្សឆ្លុះកញ្ចក់ ពួកគេនឹងឃើញមុខខ្លួនឯង គ្មានអ្នកណាប្រសើរជាងខ្លួនឯងទេ នៅពេលនោះ។ និស្សិតឆ្នាំទី៤ នៅសាកលវិទ្យាល័យភូមិន្ទវិចិត្រសិល្បៈ រូបនេះបានបន្តទៀតថា ពួកគេនឹងឃើញនូវគំនិត ក្ដីប្រាថ្នានានា ដូច្នេះមនុស្សត្រូវតែមានសង្ឃឹម តស៊ូក្នុងគំនិត ព្រោះមនុស្សម្នាក់ៗកើតមកជាមួយនឹងភាពបរិសុទ្ធ ដែលតំណាងដោយតួខ្លួនពណ៌ស។
រីឯលោក អ៊ីម ពិសី ដែលឈ្នះលេខ១ខាងវិចិត្រកម្មបានជ្រើសរើសគូរមុខក្មេងស្រីម្នាក់ដែលមានប្រវត្តិជាអ្នកលក់ផ្កាឈូកនៅមុខវាំងយ៉ាងលេចធ្លោក្រោមជក់ចម្រុះពណ៌។ ចំណាយពេលគូសជាង២សប្ដាហ៍ និស្សិតសាកលវិទ្យាល័យភូមិន្ទវិចិត្រសិល្បៈរូបនេះថា គំនូរនោះបានបង្កប់នូវទឹកចិត្តកតញ្ញុតាធម៌របស់កូនស្រីម្នាក់ដែលរស់នៅក្នុងគ្រួសារមានជីវភាពក្រីក្រ ហើយឆ្លៀតពេលទំនេរពីការសិក្សាជួយសម្រាលបន្ទុកគ្រួសារ។ កាន់តែពិសេសជាងនេះទៅទៀតនោះ background រូបភាពគូសជាលក្ខណៈ Line ប្លែកពិសេសជាងគេដែលធ្វើឲ្យគំនូរនេះមើលទៅផុសឡើងយ៉ាងច្បាស់។
ក្រៅពីនេះក៏មានស្នាដៃជាច្រើនទៀត ដែលមានដាក់តាំងបង្ហាញនៅសាលសាកលវិទ្យាល័យភូមិន្ទវិចិត្រសិល្បៈ។ សម្រាប់ជយលាភីលេខ២ទទួលបានទឹកប្រាក់៥០០ដុល្លារ លេខ៣ទទួលបានទឹកប្រាក់៣០០ដុល្លារ និងជយលាភីចុងក្រោយទទួលបានរង្វាន់លើកទឹក។ ក្រុមហ៊ុន Sabay ក៏បានចូលរួមការសហការណ៍ឧបត្ថម្ភដល់កម្មវិធីនេះផងដែរ៕
0 comments:
Post a Comment