វាយបំបែកទូរលក់មាសក្នុងផ្សារសាមគ្គី ប្លន់យកគ្រឿងអលង្ការ ត្រូវពលរដ្ឋក្របួចជាប់វាយទ្រោមខ្លួន
សៀមរាប: ពលរដ្ឋ និងក្រុមអាជីវករក្នុងផ្សារសាមគ្គី បានប្រមូលគ្នាស្វាគមន៍ជនសង្ស័យម្នាក់ឡើងសល់តែដង្ហើមចង្រិត ទើបប្រគល់ឲ្យប៉ូលិស បន្ទាប់ពីជននោះ ចូលទៅវាយបំបែកកញ្ចក់ទូរលក់មាសក្នុងផ្សារទាំងព្រឹក ប្លន់យកគ្រឿងអលង្គការបានមួយចំនួន ហើយរត់មិនរួច។
ហេតុការណ៍នេះ បានកើតឡើងនាម៉ោងជាង ៨ ព្រឹកថ្ងៃទី១៤ ខែតុលា ឆ្នាំ២០១៣ នៅក្នុងផ្សារសាមគ្គី ក្រុងសៀមរាប។
ជនសង្ស័យដែលទទួលរងការស្វាគមន៍យ៉ាងចាស់ដៃពីមហាជនក្នុងផ្សារ មានឈ្មោះ ឈុន រ៉ាឌី ភេទប្រុស អាយុ២៣ឆ្នាំ មានស្រុកកំណើតនៅខេត្តបាត់ដំបង មុនចាប់ខ្លួនស្នាក់នៅក្នុងវត្តបូព៌ខេត្តសៀមរាប។ ចំណែកជនរងគ្រោះជាម្ចាស់ទូរមាសមានឈ្មោះ នៅ ចាន់ ភេទប្រុស អាយុ៣៣ឆ្នាំ ទីលំនៅភូមិវិហារចិន សង្កាត់ស្វាយដង្គុំ ក្រុងសៀមរាប។
នាយប៉ុស្តិ៍នគរបាលសង្កាត់ស្លក្រាម លោកអនុសេនីយ៍ទោ ញឹក សុផល បានឲ្យដឹងថា ជនសង្ស័យខាងលើ គឺពិតជាចូលទៅធ្វើសកម្មភាព វាយកញ្ចក់ទូរមាសក្នុងផ្សារសាមគ្គី ប្លន់យកគ្រឿងអលង្ការបានមួយចំនួនមែន។ តែភ្លាមៗនោះអាជីវករ បានសហការជាមួយប៉ូលិស ស្ទាក់ឃាត់ និងដកហូតគ្រឿងអលង្ការបានមួយចំនួនវិញ។ ឯមួយចំនួនទៀតរកមិនឃើញទេ ដោយសាតែក្នុងស្ថានការនោះ មានមនុស្សចោមរោមច្រើន។
លោកបានបន្តថា ជនសង្ស័យបានយកឈើជ្រុងប្រវែងជិតមួយម៉ែត្រ ទៅវាយបំបែកកញ្ចក់ហើយប្លន់យកខ្សែកផ្លាទីន ១ខ្សែ ខ្សែដៃផ្លាទីន១ខ្សែ និងកងដៃផ្លាទីន១០កង។
លោកនាយប៉ុស្តិ៍ ឲ្យដឹងទៀតថា ជនសង្ស័យរូបនេះ មានប្រវត្តិប្រើប្រាស់ និងជួញដូរគ្រឿងញៀន នៅខេត្តបាត់ដំបង ហើយម្តាយឪពុកធ្លាប់បានចាប់ដាក់មណ្ឌលកែប្រែរួចមកហើយដែរ។ តែដោយសាជននេះអះអាង ថា ខ្លួនផ្តាច់គ្រឿងញៀនបានហើយ ទើបអាណាព្យាបាលព្រមដោះលែង។ ក្នុងពេលសាកសួរ ជននេះឆ្លើយយ៉ាងខ្លីថា រូបគេចាកចេញពីផ្ទះគ្មានគោលដៅ ហើយគ្មានប្រាក់ចាយ ដូច្នេះគេសម្រចធ្វើគ្រប់បែបយ៉ាងមិនខ្វល់ថា អ្នកណាចាប់យកទៅណាទេ បើធ្វើបាននោះមានលុយចាយ តែបើគេចាប់បាន គឺមានបាយហូបទោះជា ជាប់គុកក៏ដោយ។
លោកនាយប៉ុស្តិ៍បញ្ជាក់ថា ជននេះបានបញ្ជូនទៅអធិការក្រុង ដើម្បីចាត់ការបន្ត៕
0 comments:
Post a Comment