ការស៊ើបអង្កេតរឿង បាញ់ប្រជាពលរដ្ឋស្លាប់និងរងរបួស នៅស្ពានអាកាសក្បាលថ្នល់មន្រឺ្តឆ្លើយដាក់គ្នា
រាជធានីភ្នំពេញ ៖ ជិតបីសប្តាហ៍ទៅហើយ តាំងពីមានការបាញ់ប្រហារ មកលើលោក ម៉ៅ សុខចន្ទ ដែលជាកម្មករសំណង់អាយុ ២៩ ឆ្នាំ និងជាឪពុកមានកូន ៤ នាក់ ដែលត្រូវគេបាញ់ចំក្បាល អំឡុងពេលមានការប៉ះទង្គិចនៅស្ពានអាកាស ក្បាលថ្នល់ ក្នុងខណ្ឌមានជ័យ កាលពីថ្ងៃ ទី១៥ ខែ កញ្ញា តែលទ្ធផលស៊ើបអង្កេតរឿង ហាក់នៅទ្រឹង មិនមានអ្វីគួរឲ្យ កត់សម្គាល់នោះទេ ។
ក្រុមគ្រួសាររបស់លោក ម៉ៅ សុខចន្ទ កំពុងរង់ចាំលទ្ធផល នៃការស៊ើបអង្កេត ហើយគេមិនដឹងថា តើអាជ្ញាធរ បានចាត់វិធានការបែបណា ដើម្បីស៊ើបអង្កេត ក្នុងករណីបាញ់សម្លាប់ ជនស្លូតត្រង់ ឬរកឃើញ និងចាប់ខ្លួនអ្នកបាញ់ឬយ៉ាងណាទេ? យ៉ាងណាក៏ដោយ យោងតាមការស៊ើបអង្កេត របស់សមត្ថកិច្ចរដ្ឋាភិបាល ក្នុងករណីស្លាប់ របស់លោក ម៉ៅ សុខចន្ទ បន្តផ្តល់នូវការឆ្លើយតបខុសៗគ្នា។
នៅពេលសួរថា តើមានការខិតខំប្រឹងប្រែង ដើម្បីស្វែងរកជនល្មើស ដែលពាក់ព័ន្ធ ក្នុងការបាញ់សម្លាប់លោក ម៉ៅ សុខចន្ទ ឬយ៉ាងណា? មន្ត្រីជាច្រើន ពុំបាននិយាយអ្វី អំពីករណីនេះទេ ដោយគ្រាន់តែបានដឹងថា គណៈបញ្ជាការសន្តិសុខអចិន្រៃ្តយ៍ សម្រាប់ការបោះឆ្នោត បានពិចារណាបើកការ ស៊ើបអង្កេតពិសេសលើករណី របស់លោក ម៉ៅ សុខចន្ទ។
ទោះបីអាជ្ញាធរមូលដ្ឋាន បានចាត់វិធីសាស្ត្របែបណាក៏ដោយ ក៏ប៉ុន្តែក្រុមសិទិ្ធមនុស្សក្នុងស្រុក ជាច្រើនពុំបានឮអ្វីទេ ហើយគ្រប់គ្នាៗ បានបង្ហាញនូវភាពអស់សង្ឃឹម ពេលដែលអាជ្ញាធរ មានកាតព្វកិច្ច ការពារប្រជាពលរដ្ឋនោះ ពុំទទួលខុសត្រូវអ្វីសោះ។ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា ប៉ុន្មានថ្ងៃបន្ទាប់ពីការបាញ់ប្រហារ មន្ត្រីនិងអាជ្ញាធរពាក់ព័ន្ធ បានលើកឡើងថា ករណីស្លាប់របស់លោក ម៉ៅ សុខចន្ទ ស្ថិតក្រោមការស៊ើបអង្កេត ជាពាក្យដែលមានន័យតិចតួច៕
ប្រភពពី៖ www.ve-news.com
0 comments:
Post a Comment