ទេពកុមារ ជាហ្គេមស្នាដៃកូនខ្មែរមួយទៀត ដែលទើបតែដាក់ឲ្យដំណើរការ ដោយយកលំនាំតាមហ្គេម Temple Run ដ៏ពេញនិយម។ ទោះបីហ្គេមខ្មែរមួយនេះ យក Concept តាមហ្គេមបរទេសពិតមែន ប៉ុន្តែវាបានឆ្លុះបញ្ចាំងពីអត្តសញ្ញាណខ្មែរតាមរយៈសំលៀកបំពាក់របស់តួអង្គ ជាមួយការរចនារូបភាពទេសភាពវាលស្រែជនបទ ជាពិសេសរូបប្រាសាទបុរាណជាដួងព្រលឹងនិងជាមោទនភាពជាតិខ្មែរ។
លោក ហៀង ស៊ូហាន នាយកគ្រប់គ្រងវិទ្យាស្ថានស៊ី ហ្គេក និងជាអ្នកដឹកនាំផលិតហ្គេម ទេពកុមារ បានឲ្យដឹងថា ការផលិតហ្គេមនេះ លោកបានចំណាយពេលជិត ៦ ខែ និងមានសមាជិកក្រុមការងារជាង ២០ នាក់ ដើម្បីបញ្ចប់គម្រោងនេះដោយជោគជ័យ។
លោកថា ទេពកុមារ ជាហ្គេមស្នាដៃដំបូងរបស់លោក ហើយដែលប្រិយមិត្តអាចលេងបានដោយស៊េរីនៅលើប្រព័ន្ធដំណើការណ៍ Android។
ជុំវិញការផលិតហ្គេមដោយយកលំនាំតាម Temple Run លោកបញ្ជាក់ថា នេះគ្រាន់តែជាគម្រោងសាកល្បងមួយ ដើម្បីឲ្យនិស្សិតអាចសិក្សាស្វែងយល់ក្នុងការផលិតហ្គេម ខណៈដែលពួកគេកំពុងសិក្សាជំនាញផលិតហ្គេមមួយនេះ។ លោកថា បើសិនជាមានការគាំទ្រ និងមានធនធានគ្រប់គ្រាន់លោកនឹងបង្កើនហ្គេមថ្មី ដែលជាស្នាដៃផ្ទាល់សម្រាប់ដាក់ឲ្យលេងកម្សាន្ត។
ទេពកុមារ ជាប្រភេទហ្គេមកម្សាន្ត ដែលតម្រូវឲ្យអ្នកកម្សាន្តរត់ឆ្លងកាត់ឧបសគ្គជាច្រើន ដោយមានវគ្គកម្សាន្តជាច្រើនដូចជាក្នុងព្រៃ, តាមវាលស្រែ និងក្នុងប្រាសាទជាដើម ដោយអ្នកកម្សាន្តអាចជ្រើសរើសតួអង្គពីរមានតួទេពកុមារស្រី និងតួទេពកុមារប្រុស។
យ៉ាងណា លោក សូហៀង បានបញ្ជាក់ថា ទេពកុមារនៅមិនទាន់ធ្វើបានល្អមួយរយភាគរយនោះទេ។ យ៉ាងណា លោកនឹងខិតខំកែប្រែចំណុចខ្វះខាតបន្ថែមទៀតជាបន្តបន្ទាប់នៅពេលខាងមុខ។
អត្ថបទ៖ ប៊ុណ្ណារ៉ា
0 comments:
Post a Comment