កីឡាករបារាំង ដើមកំណើតឡាវ Billy Ketkeophomphone ដែលកំពុងលេងនៅក្លិបក្នុងលីកលំដាប់ទី២របស់បារាំង (Ligue 2) Tours FC បានបង្ហាញចេតនាចង់ជួយក្រុមជម្រើសជាតិឡាវរបស់ខ្លួននៅស៊ីហ្គេម នាប្រទេសមីយ៉ាន់ម៉ាចុងឆ្នាំនេះ។
Billy Ketkeophomphone
ខ្សែប្រយុទ្ធដែលធ្លាប់លេងឲ្យក្លិបចំនួន៥ផ្សេងគ្នាតាំងពីក្នុងឈុតយុវជនរហូតដល់ឈុតធំរូបនេះ ទើបតែមានវ័យ២៣ឆ្នាំប៉ុណ្ណោះ ដែលមានន័យថាមិនទាន់ហួសអាយុកំណត់នៅស៊ីហ្គេមនៅឡើយទេ។ ដោយសារតែបែបនេះហើយទើប Billy បានចេញមកប្រកាសថាចង់វិលមកជួយក្រុមជម្រើសជាតិដើមកំណើតរបស់ខ្លួនវិញ នៅក្នុងពានរង្វាន់ប្រចាំតំបន់អាស៊ីអាគ្នេយ៍មួយនេះ ប្រសិនបើត្រូវបានគ្រូបង្វឹកកោះហៅមែននោះ។
Billy បាននិយាយថា៖ “ខ្ញុំពិតជាចង់លេងឲ្យក្រុមជម្រើសជាតិឡាវណាស់ ជាពិសេសគឺនៅ SEA Games ចុងឆ្នាំនេះ។ វានឹងល្អប្រសិនបើខ្ញុំអាចបង្ហាញសមត្ថភាពសម្រាប់ប្រជាជនឡាវ និងគ្រួសាររបស់ខ្ញុំ។ ខ្ញុំចង់ឲ្យពួកគេរីករាយ”។
អតីតយុវជនក្លិប Racing Paris, INF Clairefontaine និង Strasbourg រូបនេះ បានបង្ហាញទម្រង់លេងគួរឲ្យកត់សម្គាល់នៅក្លិប Tours FC ក្នុងរដូវកាលថ្មីនេះ ដោយអាចស៊ុតបញ្ចូលទីបាន៤គ្រាប់ក្នុង៥ប្រកួត ដែលធ្វើឲ្យរូបគេកំពុងឈរនៅលើគេក្នុងតារាងអ្នកស៊ុតបញ្ចូលទីសម្រាប់ក្លិប ហើយក៏បានជួយឲ្យក្លិបនេះឡើងឈរលេខ៣ក្នុងតារាង Ligue 2 ថែមទៀតផង។ អ្វីជាពិសេសគឺថ្មីៗនេះ មានព័ត៌មានបញ្ជាក់ថា Billy ទទួលបានប្រាក់ដល់ទៅ២លានអឺរ៉ូ ឬប្រហែល៨០លានបាត ក្នុងកិច្ចសន្យា២ឆ្នាំនៅក្លិបនេះ។
Billy (ខៀវ)
Billy Ketkeophomphone បានចាប់ផ្ដើមលេងបាល់ក្នុងឈុតយុវជននៃក្លិប Racing Club de France ឬ Racing Paris មុនចូលលេងឲ្យសាលាបាល់ទាត់ INF Clairefontaine នៅឆ្នាំ២០០៦។ មួយឆ្នាំបន្ទាប់ ពោលគឺឆ្នាំ២០០៧ រូបគេបានផ្លាស់ទៅលេងឲ្យក្លិប Strasbourg ទាំងឈុតយុវជន និងឈុតធំ (២០០៩) មុនផ្លាស់ទៅក្លិប FC Sion របស់ស្វីស នៅឆ្នាំ២០១១ មុនផ្លាស់មកបារាំងវិញនៅឆ្នាំ២០១២ ក្នុងក្លិប Tours FC រហូតដល់ពេលនេះតែម្ដង។
ចាំមើលមើល៍ ថាតើកីឡាករលេងនៅបារាំងតែមានចិត្តចង់ជួយជម្រើសជាតិដើមកំណើតខ្លួនរូបនេះ អាចត្រូវបានកោះហៅចូលជម្រើសជាតិដូចការប្រាថ្នាបានដែរឬទេ? បើបានមែន តើរូបគេនឹងជួយឡាវបានកម្រិតណាដែរ?
ចង់ដឹង Billy មានសមត្ថភាព និងជំនាញយ៉ាងណានោះ សូមចុចទីនេះដើម្បីមើលវីដេអូ
ប្រែសម្រួល៖ សុខ សុវត្ថិ
ប្រភព៖ goal thailand
0 comments:
Post a Comment