ថ្មីៗនេះលេចមុខអ្នកប្រដាល់អតីតជើងខ្លាំងមួយរូបកាលពីជាង ១០ ឆ្នាំមុនគឺ ធន់ សុភា ក្នុងឯកសណ្ឋានជាសន្តិសុខ នៅក្លិបកម្សាន្តរាត្រី មួយកន្លែងក្បែរក្រសួងទេសចរណ៍ចាស់ ក្នុងរាជធានីភ្នំពេញ ធ្វើឲ្យក្រុមអ្នកតាមដានប្រដាល់ភ្ញាក់ផ្អើល ហើយគិតថាក្រែង ធន់ សុភា មានអាជីពបន្ថែមថ្មី ឬយ៉ាងណា?
ធន់ សុភា កាលធ្វើជាសន្ដិសុខនៅក្លិបកម្សាន្ត
ទាក់ទិននឹងបញ្ហានេះ សាមី ខ្លួនបានប្រាប់យើងខ្ញុំថា គាត់មិនបានប្រកបអាជីពជា សន្តិសុខ នៅក្លិបនោះទេ។ ប៉ុន្ដែយូៗ ម្ដងៗ បុរសវ័យ ៣២ ឆ្នាំរូបនេះតែងតែឆ្លៀតទៅជួយការងារ មិត្តដែលជាមេសន្តិសុខនៅក្លិបកម្សាន្តមួយនោះ។ ធន់ សុភា បន្ថែមថា៖ “ខ្ញុំមិនសូវមានពេលធ្វើការការងារនៅទីនោះទេ (ក្លិបកម្សាន្តរាត្រី) ព្រោះខ្ញុំជាប់បង្ហាត់សិស្សផង និង ធ្វើជាអាជ្ញាកណ្ដាលនៅសង្វៀនតាមប៉ុស្ដិ៍ទូរទស្សន៍មួយចំនួនផង”។
សព្វថ្ងៃ បុរសដែលធ្លាប់ផ្ដួលគូប្រកួតឱ្យសន្លប់នៅលើសង្វៀនជាង ១០០ ដងរូបនេះ ជាជំនួយការគ្រូបង្ហាត់ប្រដាល់ ឈិត សារឹម គ្រូបង្វឹកប្រចាំក្លិបប្រដាល់ក្រសួងការពារជាតិ ដែលមានកូនសិស្សហ្វឹកហាត់រួមគ្នាប្រមាណជា ៣០ ទៅ ៤០ នាក់។
ធន់ សុភា ចំណាយពេលចាប់ពីថ្ងៃច័ន្ទ ដល់ ព្រហស្បតិ៍ រៀងរាល់សប្ដាហ៍ ពេលព្រឹកម៉ោង ៦ ដល់ ៨ ព្រឹក និង ម៉ោង ២ : ៣០ នាទីថ្ងៃត្រង់ ដល់ ៥ ល្ងាច ដើម្បីបង្ហាត់ក្មេងជំនាន់ក្រោយ ក្រោមបង្គាប់។ ចំណែកថ្ងៃសុក្រ ដល់ អាទិត្យ វិញ ធន់ សុភា ធ្វើជាអាជ្ញាកណ្ដាលប្រចាំសង្វៀនប្រដាល់តាមស្ថានីយទូរទស្សន៍មួយចំនួនដូចជា My TV, បាយ័ន និង ប៉ុស្តិ៍លេខ ៥ ជាដើម។
ត្រួសៗ អតីតអ្នកប្រដាល់មានកំណើតនៅ អ្នកលឿង ធ្លាប់ដណ្ដើមបានខ្សែក្រវាត់ធំក្នុងស្រុកមួយចំនួនដូចជា ខ្សែក្រវាត់ភេសជ្ជៈ ឡូម៉ា នៅប៉ុស្តិ៍លេខ៣ នាឆ្នាំ២០០០ ឆ្នាំ ហើយនេះជាខ្សែក្រវាត់ដំបូងដែលគេទទួលបាន។ ក្រោយមកទៀតនៅឆ្នាំ ២០០៣ ដណ្ដើមបានឈ្នះខ្សែក្រវាត់ស៊ីម៉ង់ដំរី នៅប៉ុស្តិ៍លេខ៥ និង ខ្សែក្រវាត់នៅប៉ុស្តិ៍ស៊ីធីអិន ក្រោយយកឈ្នះជើងខ្លាំងជាច្រើននាក់រួមមាន វ៉ន វីវ៉ា និងមាស ចន្ថា ជាដើម។
ព័ត៌មានលំអិតបន្ថែមពី ធន់ សុភា សូមចុចទីនេះ…
អត្ថបទ៖ ម៉ឺន រស្មី
0 comments:
Post a Comment