ភាពមិនឈ្នះ៤ប្រកួតជាប់គ្នាចុងក្រោយនេះ គឺជាកំណត់ត្រានៃការចាប់ផ្ដើមដ៏អាក្រក់បំផុតមួយរបស់ក្រុមតោខៀវ Chelsea ក្នុងសម័យកាន់កាប់របស់មហាសេដ្ឋី Roman Abramovich។
ការចាញ់ Basel ២-១ នៅលើដីខ្លួនឯងក្នុងថ្ងៃបើកឆាក Champions League, ការចាញ់ Everton ១-០ នៅ Premier League (BPL), ការចាញ់ Bayern Munich នៅ UEFA Super Cup និងការស្មើ Manchester United ០-០ នៅ BPL កាលពីថ្ងៃទី២៧ ខែសីហាកន្លងមក គឺជាលទ្ធផល៤ប្រកួតចុងក្រោយរបស់ក្រុមលោក Jose Mourinho។ លទ្ធផលឈ្នះចុងក្រោយរបស់ក្រុមនេះ គឺទល់នឹង Aston Villa ២-១ នៅ BPL កាលពីថ្ងៃទី២២ ខែសីហា ២០១៣។
Mourinho ស្រែកបញ្ជាកូនក្រុមទាំងតឹងចិត្ត
ការលេង៤ប្រកួតដោយមិនឈ្នះសោះនេះ គឺមិនមានអ្នកណាម្នាក់រំពឹងថាដូច្នេះនោះទេ សម្រាប់ការវិលត្រលប់មកវិញអ្នកអ្នកចាត់ការដែលគេហៅថាជា Special One នោះ។ តើកត្តាអ្វីដែលធ្វើឲ្យតោខៀវដុនដាបបែបនេះ?
អតីតកីឡាករអង់គ្លេស Jamie Redknapp ដែលជាអ្នកវិភាគបាល់ទាត់នៅប៉ុស្តិ៍ Sky Sports ធ្លាប់លើកឡើងថាបញ្ហារបស់ Chelsea គឺដោយសារការទិញកីឡាករដែលធ្វើឲ្យក្រុមមួយនេះមិនមានតុល្យភាពកីឡាករ។
លោក Rafael Benitez ធ្លាប់កត់សម្គាល់ឃើញបែបនេះដែរ ប៉ុន្តែកាលនោះលោកជាគ្រូបង្វឹកបណ្ដោះអាសន្នដែលគ្មានទឹកមាត់ប្រៃ ដូច្នេះមិនមានអ្វីប្រែប្រួលនោះទេ។ ចំណែកការមកដល់របស់ Mourinho ត្រូវបានគេសង្កេតឃើញថាលោកបរាជ័យក្នុងការរកចំណុចខ្សោយពិតប្រាកដរបស់ក្រុម។ អ្នកមើលបាល់ភាគច្រើនប្រហែលជាគិតថាក្រុមនេះហូរហៀទៅដោយខ្សែបម្រើកណ្ដាល ប៉ុន្តែអ្នកវិភាគបានអះអាងថា Chelsea មិនបានពង្រឹងនៅតំបន់កណ្ដាលឲ្យខ្លាំងនោះទេ និយាយឲ្យចំគឺមិនបានទិញកីឡាករបម្រើកណ្ដាលដែលអ្នកចាត់ការប្រើប្រាស់ត្រូវ បើទោះបីជាទិញ Marco van Gingel មួយហើយក៏ពិតមែន។
Marco van Gingel
ត្រលប់ទៅស្ដាប់ការវិភាគរបស់ Jamie Carragher នៅ Sky Sports វិញក៏ស្រដៀងគ្នានេះដែរ។ អតីតកីឡាករ Liverpool រូបនេះបាននិយាយថា៖ “ទោះបីជាអ្នកមានកីឡាករច្រើនយ៉ាងណាក៏ដោយ ប្រសិនបើមិនមានខ្សែប្រយុទ្ធកណ្ដាលកំពូលម្នាក់នោះទេ ក្រុមនឹងបរាជ័យ។ នៅខណៈនេះ គឺប្រៀបដូចជាក្រុមបាត់បង់កីឡាករម្នាក់ទាំងមិនទាន់ចាប់ផ្ដើមប្រកួតអញ្ចឹង”។
អ្វីគួរឲ្យកត់សម្គាល់ គឺលោក Mourinho បរាជ័យក្នុងការទិញ Wayne Rooney ដោយជំនួសវិញនូវខ្សែប្រយុទ្ធជើងចាស់ Samuel Eto’o។ សំនួរមួយបានលើកឡើងថាតើ Chelsea ពិតជាចាំបាច់ត្រូវការ Willian ដែរឬទេ? អ្នកចាត់ការសញ្ជាតិព័រទុយហ្គាល់រូបនេះ បានដណ្ដើមទិញ Willian រហូតទាល់តែឈ្នះ Spurs ប៉ុន្តែក្រោយទិញបានហើយ ក្លិបនេះបានបាត់បង់ Victor Moses និង Romelu Lukaku ទៅឲ្យក្លិបដទៃខ្ចីជើងទៅវិញ។ ការចំណាយលុយរាប់លានដុល្លារដើម្បីបាន Eto’s និង Willian ពី Anzhi Makhachkala គួរតែត្រូវប្រើដើម្បីទិញកីឡាករមកពង្រឹងចំណុចខ្សោយ។
នៅពេលត្រូវបានគេសួរអំពី Willian ក្រោយចាញ់ Basel លោក Mourinho បាននិយាយយ៉ាងខ្លីថា៖ “ខ្ញុំគិតថានេះមិនមែនជាពេលត្រូវនិយាយពីទម្រង់លេងរបស់កីឡាករម្នាក់ៗនោះទេ”។ ចំណែករឿង Eto’o វិញ លោកនិយាយដែរថា៖ “ប្រហែលគាត់ខ្វះភាពមុតស្រួច ប៉ុន្តែនៅពេលដែលអ្នកនៅកន្លែងដែលគ្មានការលើកទឹកចិត្តដល់ទៅ២ឆ្នាំកន្លះ ប្រហែលអ្នកអាចបាត់បង់ភាពដើមរបស់អ្នក (សំដៅលើពេល Eto’o លេងនៅរុស្សី)។ ភាពមុតស្រួច និងបច្ចេកទេសស៊ុតបញ្ចូលទី ប្រហែលជាត្រូវការពេលបន្ថែមទៀត ប៉ុន្តែគាត់គឺជាកីឡាករដ៏អស្ចារ្យម្នាក់”។
Willian
ដោយសារតែប្រឹងធ្វើឲ្យ Eto’o មុតស្រួចឡើងវិញនេះហើយ ទើប Mourinho បានដាក់ Eto’o ឲ្យលេងពេញ ១៨០នាទីក្នុង២ប្រកួត ដែលធ្វើឲ្យខ្សែប្រយុទ្ធ២នាក់ទៀតមិនសូវបានលេង (Ba លេងបានតែ១៤នាទី ឯ Torres លេងបានតែ២១នាទី)។
សរុបមកវិញ ខ្សែប្រយុទ្ធទាំង៣របស់ក្រុមនេះសុទ្ធតែមិនទាន់រកគ្រាប់ទី១របស់ខ្លួនបាន ទាំង Eto’o, Torres និង Ba។ ទាំង៣នាក់អាចស៊ុតចំគោលដៅនៅ BPL តែ៤ដងប៉ុណ្ណោះ ខណៈ Torres មិនទាន់ស៊ុតចំគោលដៅនោះឡើយក្នុង ១២៦នាទីចុងក្រោយ។
Eto’o
អ្វីដែលគ្រប់គ្នាឆ្ងល់មួយទៀត គឺការមិនសូវបានលេងរបស់ Juan Mata។ កីឡាករអេស្ប៉ាញដែលស៊ុតបាន២១គ្រាប់រដូវកាលមុននេះ អាចប្ដូរចូលលេងបាន៣ប្រកួត ដែលចុងក្រោយលេងបាន២៣នាទីពេលប៉ះ Basel។ ក្រុមអ្នកវិភាគកីឡាករ និងក្រុមអ្នកគាំទ្រ សុទ្ធតែបង្ហាញចម្ងល់ថាហេតុអ្វី Mourinho មិនដាក់ Mata ឲ្យលេង។ កីឡាករនាំលេង (playmaker) ដែលអ្នកចាត់ការវ័យ៥០ឆ្នាំនេះទុកចិត្ត គឺ Oscar។
Mata
ខាងក្រោមនេះជាលទ្ធផល៤ប្រកួតចុងក្រោយរបស់ Chelsea ដែលត្រូវបានគេចាត់ទុកថាជាកំណត់ត្រានៃការចាប់ផ្ដើមដ៏អាក្រក់បំផុតមួយក្នុងសម័យរបស់មហាសេដ្ឋីរុស្សី Roman Abramovich ពោលគឺចាប់ពីឆ្នាំ២០០៣ មក។
នេះគ្រាន់តែជាការលើកឡើងខ្លះៗថាតើហេតុអ្វីបានជា Chelsea ធ្លាក់ទម្រង់លេងដល់ថ្នាក់នេះ។ ចុះចំណែកប្រិយមិត្តវិញ យល់យ៉ាងណាដែរ? ចូលរួមចែករំលែកការយល់ឃើញរបស់ប្រិយមិត្តក្នុងប្រអប់ comment ខាងក្រោម៕
សេដ្ឋីប្រេង Abramovich ដើរចេញទាំងមិនសប្បាយចិត្ត
0 comments:
Post a Comment