ប្ដីប្រពន្ធប្រើផ្គាក់និងត្បូងចបសម្លាប់អ្នកគ្រូញាត់ពាងទឹកត្រូវប្រកាសទោសថ្ងៃ២៦កញ្ញា
បន្ទាយមានជ័យ៖ សវនាការរយៈពេល៣ម៉ោងជំនុំជម្រះរឿងព្រហ្មទណ្ឌឃាតកម្មប្ដីប្រពន្ធ ដែលពាក់ព័ន្ធក្នុងករណីសម្លាប់អ្នកគ្រូបង្រៀនម្នាក់ញាត់ក្នុងពាងទឹកដោយរឿងគំនុំផ្ទាល់ខ្លួន គ្រាន់តែឈ្លោះប្រកែកគ្នារហូតដល់វាយនឹងកាំបិតផ្គាក់ និងត្បូងចបវាយក្បាលអោយស្លាប់រួចហើយញាត់ក្នុងពាងទឹកដើម្បី បំបាត់ភស្តុតាង ត្រូវបានលើកយកមកបើកសវនាការជំនុំជម្រះហើយនឹងប្រកាសទោសនៅថ្ងៃទី២៦ ខែកញ្ញា ឆ្នាំ២០១៣ខាងមុខនេះ។
តាមគេហទំព័រអគ្គស្នងការដ្ឋានគរបាលជាតិក្រសួងមហាផ្ទៃកាលពីថ្ងៃសៅរ៍ម្សិលមិញ នេះបានឲ្យដឹងថា នៅថ្ងៃទី១៩ ខែកញ្ញា ឆ្នាំ២០១៣ លោកអិត សម្ផស្ស ប្រធានក្រុមប្រឹក្សាជំនុំជម្រះ និងលោក សាយ សម្ផស្សសេរី លោកធាម ច័ន្ទពិសិដ្ឋ ក្រុមប្រឹក្សាជំនុំជម្រះ និង លោកស្រីកែវ សុគន្ធារី តំណាងអយ្យការងអមសាលាដំបូងខេត្តបន្ទាយមានជ័យបានសួរដេញដោលទៅលើជនជាប់ចោទទាំង ២នាក់ប្ដីប្រពន្ធដែលបានប្រព្រឹត្តបទល្មើសឃាតកម្មបានសម្លាប់អ្នកគ្រូកាលពីថ្ងៃទី២៨ មករា ២០១៣ មកជម្រះពីបទឃាតកម្ម។
ជនជាប់ចោទទាំង២នាក់ប្តីប្រពន្ធដែលត្រូវបាននគរបាលមូលដ្ឋានចាប់ឃាត់ខ្លួន ប្រព្រឹត្តឃាតកម្មសម្លាប់អ្នកគ្រូបង្រៀនសាលាបឋមសិក្សានៅស្រុកអូរជ្រៅញាត់ពាងទឹកផឹក បន្ទាប់ពីរឿងហេតុកើតឡើងវេលាម៉ោងជាង១០ព្រឹក នៅចំណុចផ្ទះអតីតមេប៉ុស្តិ៍នគរបាលរដ្ឋបាលគុត្តសត ខាងក្រោយ១០០ម៉ែត្រនៃសាលាបឋមសិក្សា និងអនុវិទ្យាល័យគុត្តសត ភូមិ-ឃុំគុត្តសត ស្រុកអូរជ្រៅ ។
ជនជាប់ចោទឈ្មោះ យ៉ាវ ថាវី ភេទស្រី រស់នៅភូមិខាងលើបានសារភាពនៅអង្គសវនាការថា ខ្លួនពិតជាបានឈ្លោះប្រកែកគ្នារឿងជំពាក់លុយបង្ខំអោយអ្នកគ្រូសង លុយតែក៏មានប៉ះសំដីគ្នាក៏ទាញកាំបិតផ្គាក់មកវាយអ្នកគ្រូចំពីក្រោយខ្នងផ្កាប់មុខដួលទៅក្រោមផ្ទះហើយគេក៏ជិះកង់ទៅកន្លែងលក់វិញ ស្រាប់តែជួបមានបុរសម្នាក់សួរនាំរកចងការលុយតែខ្លួនឆ្លើយទៅវិញថា ចងការអ្នកគ្រូចុះ ការស្លាប់របស់អ្នកគ្រូ ឈ្មោះ ឡោ មួយសាយ ហៅគ្រុយ ពិតជាខ្លួនបានប្រព្រឹត្តដោយវ៉ៃនឹងកាំបិតផ្គាក់ខាងខ្នងចំកញ្ចឹងកពិតប្រាកដមែន។
ជនជាប់ចោទជាប្ដីឈ្មោះ សិត សុខុម អាយុ៤២ឆ្នាំ រស់នៅខាងលើបានសារភាពនៅសវនាការថា មុនពេលកើតហេតុនេះឡើងខ្លួនបានអង្គុយលក់ដូរក្នុងសាលារៀន បានប្រពន្ធប្រើទៅអោយទិញថ្នាំពេទ្យនៅក្នុងផ្សារគុត្តសតមកផឹកហើយ ខ្លួនក៏មិនបានដឹងរឿងរ៉ាវកើតឡើងជាមួយប្រពន្ធនិងអ្នកគ្រូឈ្មោះ ឡោ មួយសាយ ហៅគ្រុយ នោះទេ។ ពេលខ្លួនដើរទៅក៏ប្រទះឃើញសកម្មភាពប្រពន្ធបានវាយអោយអ្នកគ្រូរបួស ជិតដាច់ខ្យល់គេក៏បន្ថែមឲ្យស្លាប់តែម្តង រួចឲ្យនាយក លោកគ្រូនិងអ្នកភូមិព្រមទាំងសិស្សនាំគ្នាទៅមើល ឃើញថាអ្នកគ្រូបានស្លាប់ទៅហើយ តែនៅក្ដៅៗដែលទំនងជាកើតឡើងមុននេះជាងកន្លះម៉ោងជនរងគ្រោះសុំចេញពីបង្រៀនមុនម៉ោងបន្តិច។ បន្ទាប់មកនគរបាលចម្រុះពីប៉ុស្តិ៍រដ្ឋបាលឃុំគុត្តសត ពីស្រុកអូរជ្រៅនិងពី ការិយាល័យកណ្ដាលនគរបាលព្រហ្មទណ្ឌនៃស្នងការដ្ឋានខេត្តបានចុះពិនិត្យ ឃើញថាជនរងគ្រោះរងរបួសខ្ទេចក្បាលពីក្រោយនិងកញ្ចឹងក ដោយរងនឹងវត្ថុរឹង។ ជនរងគ្រោះត្រូវគេវាយសម្លាប់មុនរួចលើកសពដាក់ក្នុងពាងទឹកជាក្រោយ ។
លោក អិត សម្ផស្ស ក្រុមប្រឹក្សាជម្រះ និងលោក ធាម ច័ន្ទពិសិដ្ឋ និងលោក សាយ សម្ផស្សសេរី បានសួរដេញដោលជនជាប់ចោទទាំង២ប្ដីប្រពន្ធរឿងហេតុការណ៍កើតឡើង មុនដំបូងជនជាប់ចោទជាប្រពន្ធក៏បានឆ្លើយសារភាពថា មុនពេលដែលកើតហេតុខ្លួននឹងអ្នកគ្រូបានជួបគ្នាឈ្លោះប្រកែកគ្នា ពីបញ្ហារឿងលុយជំពាក់ក៏មានការប្រតាយប្រតប់គ្នាខ្លួនក៏បានទាញ កាំបិតមកវ៉ៃអ្នកគ្រូពីក្រោយខ្នងអោយដួលផ្កាប់មុខពិតប្រាកដមែនបំណង គឺចង់អោយគាត់ស្លាប់បាត់បំណុលរឿងលុយកាក់។ ចំណែកប្ដីឈ្មោះ សិត សុខុម បានឆ្លើយនៅមុខសមត្ថកិច្ចប៉ូលីសក៏ដូចជាឆ្លើយនៅសវនាការថា ខ្លួនពិតជាបានប្រព្រឹត្តបទល្មើសដោយយកត្បូងចបវាយវពីមុខពីក្រោយអោយ ដួងលសន្លប់ រួចលើកអ្នកគ្រូញាត់ពាងទឹកខ្លួនកាន់ដើមទ្រូងប្រពន្ធកាន់ជើង ដើម្បីបំបាត់ភ័ស្តុតាងដែលសម្លាប់ ហើយខ្លួនក៏ធ្វើជាមិនដឹងរឿងហេតុកើតឡើងក្រោយមកទើបសមត្ថកិច្ច ចាប់ខ្លួនដោយមានភស្តុតាងប្រលាក់ឈាម និងភស្តុតាងកាំបិតនិងចបដែលបាន ទុកនៅក្នុងផ្ទះ។
តំណាងអយ្យការបានសន្និដ្ឋាន និងចោទប្រកាន់ទៅលើជនជាប់ចោទ ១.ឈ្មោះ សិត សុខុម និងឈ្មោះ យ៉ាវ ថាវី ពីបទឃាតកម្មដែលបានរួមគំនិតគ្នាសម្លាប់អ្នកគ្រូត្រូវជាម្ដាយមីងដោយកាំបិតផ្គាក់ និងត្បូងចបវាយក្បាលអោយដាច់ដង្ហើមស្លាប់រួចគេចាប់ញាត់ក្នុងពាងទឹក។ ជនជាប់ចោទទាំង២នាក់នេះ លោក ប្រធានក្រុមប្រឹក្សាប្រកាសសាលក្រមនៅថ្ងៃទី២៦ កញ្ញា ២០១៣ខាងមុខនេះ រឿងនេះគឺពិតជាដូចគេនិយាយថាឈាមស្រែកស្បែកហៅមែន៕
0 comments:
Post a Comment