ក្រុមចាយលុយធំទាំងពីររបស់បារាំងស្មើគ្នា១-១យប់មិញ

ក្រុមចាយលុយធំទាំងពីររបស់បារាំង គឺ Paris Saint Germain និងក្រុម AS Monaco បញ្ចប់ការប្រកួតសប្ដាហ៍ទី៦នៃក្របខ័ណ្ឌ Ligue 1 ដោយមិនចាញ់មិនឈ្នះ ពោលគឺស្មើគ្នា១-១ នៅកីឡដ្ឋាន Parc des Princes យប់មិញ។

ខ្សែប្រយុទ្ធដែលមានតម្លៃផ្ទេរសរុប២៤០លានដុល្លារអាមេរិក(ផ្ទេរក្លិប៥លើកកន្លងមក) Zlatan Ibrahimovic ស៊ុតឱ្យក្រុមការពារតំណែងជើងឯក PSG នាំមុខមុនក្នុងនាទីទី៥ ប៉ុន្តែ១៥នាទីក្រោយមកការនាំមុខនោះត្រូវបានលុបចោលទៅវិញដោយខ្សែប្រយុទ្ធដែល Monaco ទិញពី Atlético Madrid តម្លៃ៨៥លានដុល្លារអាមេរិក Radamel Falcao ដើម្បីរក្សាភាពមិនដែលចាញ់របស់ក្លិបទើបឡើងពីក្របខ័ណ្ឌ Ligue 2 នេះ។

ក្រុមដែលបង្វឹកដោយលោក Laurent Blanc មានឱកាសស៊ុតច្រើនជាង ប៉ុន្តែខ្សែប្រយុទ្ធ Ibrahimovic ខ្ជះខ្ជាយឱកាសជាច្រើនលើកច្រើនសា បណ្ដាលឱ្យមិនអាចរកគ្រាប់បាល់បន្ថែមបាន ស្របពេលក្រុមដែលបង្វឹកដោយលោក Claudio Ranieri ក៏មិនអាចទម្លុះសំណាញ់ទីក្រុមម្ចាស់ផ្ទះបានទៀតដែរ ធ្វើឱ្យគ្រាប់បាល់១-១នៅថេររហូតដល់អាជ្ញាកណ្ដាលបន្លឺសំឡេងកញ្ចែបញ្ចប់ការប្រកួត។