សមត្ថកិច្ចចាប់ឃាត់ខ្លួនជនជាតិវៀតណាម២នាក់ពីបទប្រើប្រាស់គ្រឿងញៀន
ខេត្ដកណ្ដាល ៖ ជនជាតិវៀតណាម ២នាក់ ត្រូវបានកម្លាំងសមត្ថកិច្ចចាប់ឃាត់ខ្លួន កាលពីវេលាម៉ោង១២និង១៥នាទី ថ្ងៃទី២០ ខែកញ្ញា ឆ្នាំ២០១៣ នៅចំណុចផ្លូវជាតិលេខ២១បេ ស្ថិតក្នុងភូមិកោះទៀវ(ខ) ឃុំសំពៅពូន ស្រុកកោះធំ ដោយសង្ស័យជាប់ពាក់ព័ន្ធនឹងករណីចែកចាយ និងប្រើប្រាស់ថ្នាំញៀន។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យទាំង២នាក់ខាងលើនេះ មានឈ្មោះ បេនា រ៉ឹក អាយុ២៣ឆ្នាំ ជាជនជាតិវៀតណាម មានទីលំនៅភូមិព្រៃធំ ឃុំសំពៅពូន ស្រុកកោះធំ និងម្នាក់ទៀតមានឈ្មោះ ង្វៀន យ៉ាងឡឺយ អាយុ២៣ឆ្នាំ ជនជាតិវៀតណាម។ អ្នកទាំង២ មានទីលំនៅក្នុងភូមិ-ឃុំ ជាមួយគ្នា។
ប្រភពដដែលបានបន្តឲ្យដឹងទៀតថា មុនពេលកើតហេតុ ខណៈដែលសមត្ថកិច្ច កំពុងដើរល្បាតតាមដងផ្លូវ ក៏ស្រាប់តែប្រទះឃើញជនសង្ស័យទាំង២នាក់ជិះម៉ូតូម៉ាកសង់កូរ៉េ ពណ៌ក្រហមមួយគ្រឿង ពាក់ស្លាកលេខភ្នំពេញ 1A0-9643 ធ្វើដំណើរនៅតាមបណ្តោយផ្លូវជាតិលេខ២១បេ។ ដោយមានការសង្ស័យ សមត្ថកិច្ចក៏បានឃាត់ខ្លួនដើម្បីឆែកឆេរ ពេលនោះក៏រកឃើញថ្នាំញៀនប្រភេទម៉ាទឹកកមួយកញ្ចប់តូច ដែលជនសង្ស័យបោះចោលនៅក្បែរម៉ូតូ ។
នៅចំពោះ មុខសមត្ថកិច្ចជនសង្ស័យទាំង២នាក់បានសារភាពថា ថ្នាំញៀននេះពិតជារបស់ពួកខ្លួនមែន ដោយពួកគេទើបតែទិញពីបុរសម្នាក់នៅក្នុងភូមិកោះទៀវ(ខ) ក្នុង តម្លៃ១០ម៉ឺនដុង ហើយថ្នាំញៀននេះគឺពួកគេទិញមកសម្រាប់ប្រើប្រាស់ខ្លួនឯង មិនមែនយកមកចែកចាយអ្វីនោះទេ។ បច្ចុប្បន្នជនសង្ស័យទាំង២នាក់ រួមនិងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការទៅតាមនីតិវិធីច្បាប់៕
0 comments:
Post a Comment