ឡើងផ្ទះសំណាក់រួមរ័ក្សគ្នាជាច្រើនដង លុះស្អែកឡើងបែរជាស្រែកថាគេចាប់រំលោភ
រាជធានីភ្នំពេញ ៖ កាលពីព្រឹកថ្ងៃទី២១ ខែកញ្ញា ឆ្នាំ២០១៣ តំណាងអយ្យការសាលាដំបូងរាជធានីភ្នំពេញ បានធ្វើការចោទប្រកាន់បុរសម្នាក់ពីបទរំលោភសេពសន្ថវៈ ដែលបានប្រព្រឹត្តទៅកាលពីថ្ងៃទី ២០ ខែកញ្ញា ឆ្នាំ២០១៣ នៅចំណុចផ្ទះសំណាក់មួយកន្លែងស្ថិតនៅម្តុំសំណង់១២។
ប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវតុលាការចោទប្រកាន់ខាងលើនេះមានឈ្មោះ យុន រដ្ឋា ហៅសិដ្ឋ អាយុ៣២ឆ្នាំ ជាអ្នករត់ម៉ូតូឌុប មានស្រុកកំណើតនៅភូមិអន្លង់សេរី ឃុំរំលិច ស្រុកស៊ីធរកណ្តាល ខេត្តព្រៃវែង បច្ចុប្បន្នស្នាក់នៅផ្ទះលេខ១១០ ផ្លូវរទេះភ្លើង សង្កាត់បឹងកក់២ ខណ្ឌទួលគោក ។ ចំណែកនារីរងគ្រោះ អាយុ២២ឆ្នាំ បម្រើការងារជាបុគ្គលិករត់តុនៅភោជនីយដ្ឋានបឹងមាស។
បើតាមកំណត់ហេតុនៃពាក្យបណ្តឹងរបស់ជនរងគ្រោះ បានឲ្យដឹងថា កាលពីថ្ងៃទី២០ ខែកញ្ញា កន្លងទៅនេះ ជនសង្ស័យ បានទូរស័ព្ទទៅបបួលនាងដើរលេង នាងបានយល់ព្រម ព្រោះជាអ្នកធ្លាប់ស្គាល់គ្នា ហើយនាងក៏បបួលមិត្តភក្តិម្នាក់ទៀតទៅជាមួយដែរ។ ពួកគេបាននាំគ្នាទៅផឹកស៊ីនៅភូមិគ្រឹះមួយជិតវត្តសំរោងអណ្តែត តាំងពីព្រឹករហូតដល់ល្ងាច រហូតដល់ស្រវឹងរៀងៗខ្លួន ទើបបែកគ្នា។ ចំណែកនាងត្រូវជនសង្ស័យ ឌុបទៅកាន់ផ្ទះសំណាក់មួយនៅក្បែរផ្សារសំណង់១២។ ពេលទៅដល់ផ្ទះសំណាក់ ជនសង្ស័យ បានលួងលោមនាងចូលដេកនៅទីនោះ ១យប់ ព្រមទាំងធ្វើសកម្មភាពរំលោភនាងបានសម្រេចជាច្រើនដង។
នៅចំពោះមុខអយ្យការ ជនសង្ស័យបានធ្វើការបដិសេធថា រូបគេមិនបានធ្វើសកម្មភាពចាប់រំលោភដូចការចោទប្រកាន់នោះទេ គឺពួកគេទាំង២នាក់បានស្រឡាញ់គ្នា រហូតឈានដល់ការព្រមព្រៀងចូលផ្ទះសំណាក់ដើម្បីរួមរ័ក្សគ្នា ហើយគេក៏បានសន្យាថា នឹងចូលទៅស្តីដណ្តឹងជនរងគ្រោះរៀបការទៅតាមផ្លូវច្បាប់ផងដែរ។
ទាក់ទិននឹងបញ្ហាខាងលើនេះ មជ្ឈដ្ឋានជាច្រើន មានការងឿងឆ្ងល់ថា បើសិនជានារីរងគ្រោះមិនស្ម័គ្រចិត្តព្រមរួមរ័ក្សជាមួយជនសង្ស័យទេ ម៉េចក៏នាងហ៊ានផ្ទះសំណាក់ជាមួយគ្នា? ដែលបញ្ហាទាមទារឲ្យខាងតុលាការ ធ្វើការស្រាវជ្រាវឲ្យច្បាស់លាស់មុននឹងធ្វើការវិនិច្ឆ័យទោស។ បច្ចុប្បន្នជនសង្ស័យត្រូវបានសមត្ថកិច្ចនាំយកទៅឃុំខ្លួនជាបណ្តោះអាសន្ននៅពន្ធនាគារព្រៃស៕
0 comments:
Post a Comment