ក្រោយខកខានយកឈ្នះមេដាយមាសផ្នែកបាល់ទាត់បុរសអស់រយៈពេលជាច្រើនឆ្នាំ ក្រុមជម្រើសជាតិអាយុក្រោម ២៣ ឆ្នាំរបស់ថៃបានបង្កើតកំណត់ត្រាថ្មីដោយយកឈ្នះក្រុមយុវជនឥណ្ឌូណេស៊ីដោយលទ្ធផល ១-០ នៅវគ្គផ្ដាច់ព្រ័ត្រព្រឹត្តិការណ៍ស៊ីហ្គេមលើកទី ២៧ នៅមីយ៉ាន់ម៉ាយប់មិញ។
មួយគ្រាប់ជ័យជម្នះរបស់ថៃរកបានដោយកីឡាករ Sarawat Masuk ដោយទាត់រំលងអ្នកចាំទីឥណ្ឌូណេស៊ី ក្រោយទទួលបានបាល់បោះកាត់ពីកីឡាករឆ្នើម Pokklaw Anan នៅនាទីទី ២១។ មុនឡើងមកកាន់វគ្គផ្ដាច់ព្រ័ត្រនេះថៃក៏បានលត់ឥណ្ឌូណេស៊ីម្ដងដែរនៅវគ្គសន្សំពិន្ទុតាមពូលដោយលទ្ធផល ៤-១។
អាន៖ ដំណឹងល្អមកពីស៊ីហ្គេម ! វ៉ូវីណាម រកមេដាយមាសទី៧ ឱ្យកម្ពុជា
ការឈ្នះមេដាយមាសយប់មិញធ្វើឲ្យថៃបង្កើតកំណត់ត្រាថ្មីឈ្នះមេដាយមាស ១៤ ដងលើវិញ្ញាសារបាល់ទាត់បុរសពីព្រឹត្តិការណ៍ធំថ្នាក់តំបន់នេះ។
ក្រោយឈ្នះការប្រកួតគ្រូបង្វឹកថៃលោក Kiatisak Senamuang និយាយថា “យើងបានប្រឹងប្រែងយ៉ាងខ្លាំង និងបានជ្រើសរើសកីឡាករបានយ៉ាងត្រឹមត្រូវ។ យើងបានជួបជុំហ្វឹកហាត់ជាមួយគ្នាប្រហែលមួយឆ្នាំឯណោះមុនដំណើរឆ្ពោះមកកាន់ព្រឹត្តិការណ៍ស៊ីហ្គេមនេះ”។ អតីតខ្សែប្រយុទ្ធជម្រើសជាតិថៃបន្តថា លោកមានមោទនភាពចំពោះកូនក្រុម និងជាតិរបស់ខ្លួនបំផុត។
ក្រោយការប្រកួតនោះដែរ គ្រូបង្វឹកឥណ្ឌូណេស៊ីលោក Rahmad Darmawan ថា ក្រុមលោកលេងល្អដែរតែគ្មានសំណាង។ គ្រូបង្វឹករូបនេះបញ្ជាក់ដូច្នេះ “ថ្ងៃនេះ យើងលេងមិនអន់នោះទេ ពិសេសនៅតង់ទី ២ យើងគ្រប់គ្រងបាល់បានច្រើនជាង និងមានឱកាសម្ដងជាពីរដង។ តែយើងគ្មានសំណាងក្នុងការបំប៉ោងសំណាញ់ទីរបស់គូប្រកួតទាល់តែសោះ”។
ទស្សនាការវីដេអូហាយឡាយការប្រកួតយប់មិញខាងក្រោម៖
0 comments:
Post a Comment