លោក បែ មករា អ្នកចាត់ការទូទៅក្រុម ចម្ការកៅស៊ូបឹងកេត កំពុងត្រៀមបញ្ជូនលិខិតស្នើឲ្យសហព័ន្ធកីឡាបាល់ទាត់កម្ពុជាពន្លឿនការដោះស្រាយករណី កីឡាករជម្រើសជាតិ៤នាក់ ដែលត្រូវបានដកចេញយ៉ាងទាន់ហន់ពីក្រុម មុនទៅស៊ីហ្គេមបន្តិច ខណៈចំណោម៤នាក់នោះ ក៏មាន កែវ សុខង៉ន របស់បឹងកេតដែរ។
អ្នកចាត់ការវ័យ៣៤ឆ្នាំថាសហព័ន្ធគួរណាស់តែបង្ហាញលទ្ធផលនៃស៊ើបអង្កេតនិងដោះស្រាយដល់កីឡាករ៤នោះឲ្យបានរហ័សជាងនេះ ព្រោះថាបើនៅតែស្ងាត់ៗទៀតនោះនឹងធ្វើឲ្យជះផលអាក្រក់ខ្លាំងឡើងៗដល់ពួកគេ ក៏ដូចជា កែវ សុខង៉ន សមាជិកស្នូលក្រុមលោកផងដែរ។ លោកថារាល់ថ្ងៃនេះចាប់តាំងពីមានបញ្ហាមក កីឡាករដែលមានបញ្ហាក៏មិនខុសពី កែវ សុខង៉ន គឺគ្មានអារម្មណ៍លេងបាល់ទេ ដោយសារការដោះស្រាយមិនទាន់ឃើញលទ្ធផលអីច្បាស់លាស់សោះ ធ្វើឲ្យកេរ្តិ៍ឈ្មោះនិងប្រជាប្រិយភាពរបស់ពួកគេស្ទើរបាត់បង់អស់ពីអារម្មណ៍អ្នកគាំទ្រទៅហើយ ដោយក្ដីសង្ស័យនានាទៅលើពួកគេ។
អ្នកចាត់ការក្លិបមានមូលដ្ឋាននៅ កំពង់ចាមពន្យល់៖ “ខុសក៏មិនឃើញប្រកាស ត្រូវក៏មិនឃើញ។ ពួកគេសុទ្ធតែជាកីឡាករល្អៗនិងមានឈ្មោះផង យកមកទុកអីចឹងខូចជើងអស់មិនខាន។ ពួកគេគ្មានអារម្មណ៍លេងបាល់ទេបើមិនចេញលទ្ធផលបែបនេះ ហើយបើលេងក៏មុខតែលេងមិនកើតដែរ មុខតែអ្នកមើលជេរប្រទេចថានេះថានោះ ចោលទឹកសុទ្ធដាក់មុខមិនខាន”។
ទុំ សារ៉ាយ (ក្រហម) និង កែវ សុខង៉ន
ប្រភពបន្តថាប្រសិនបើសហព័ន្ធរកឃើញបទល្មើសនិងដំណោះស្រាយណាមួយលើករណីដែលកំពុងស្ថិតក្នុងចំណុចរសើបមួយនេះ គួរឲ្យណាស់តែជួនសេចក្ដីថ្លែងការណ៍ជាសាធារណៈ ដើម្បីលុបលាងភាពអាម៉ាស់និងផ្ដល់មុខមាត់ឲ្យពួកគេវិញ ប្រសិនបើពួកគេគ្មានកំហុស។ ផ្ទុយពីនេះប្រសិនបើពួកគេពិតជាត្រូវបានរកឃើញថាជាប់ពាក់ព័ន្ធនឹងបញ្ហាអវិជ្ជមានណាមួយមែន សហព័ន្ធគួរតែឲ្យដឹងជាសាធារណៈដូចគ្នា នូវទំហំនិងកម្រិតនៃការពិន័យ ហើយក្លិបលោកក៏នឹងដាក់ពិន័យទៅកីឡាករលោកដែលមានកំហុសនោះ បន្ថែមទៀតដែរ។
សាយ ពិសិដ្ឋ
ករណីដែលនិយាយខាងលើនេះ កំពុងជាមន្ទិលក្នុងចង្កោមកីឡាបាល់ទាត់ជាតិ បន្ទាប់ពីកីឡាករ៤រូបរួមមាន កែវ សុខង៉ន របស់បឹងកេតខ្សែការពារ សុក រិទ្ធី របស់ណាហ្គាខប សាយ ពិសិដ្ឋ របស់ប៉ូលិស និង ទុំ សារ៉ាយ របស់ស្វាយរៀងដែលបានប្រកាសឈប់ពីបាល់ទាត់កាលពីថ្មីៗ រួមជាមួយអ្នកចាត់ការទូទៅលោក ឆាង ពិសិដ្ឋ និងមន្ត្រីពាក់ព័ន្ធមួយចំនួនទៀតត្រូវបានដកចេញពីក្រុម U23 ជម្រើសជាតិនៅប៉ុន្មានម៉ោងប៉ុណ្ណោះ មុនក្រុមដែលដឹកដោយលោក Lee Tae Hoon ហោះហើរទៅ មីយ៉ាន់ម៉ា ដើម្បីចូលរួមស៊ីហ្គេម។
សុក រិទ្ធី (លើកជើង)
ការណ៍នេះបានធ្វើឲ្យអ្នកនិយមនិយាយពីកីឡាករបាល់ជាតិខ្មែរងឿងឆ្ងល់មិនតិចទេ ដោយសារហេតុផលផ្សេងៗមិនត្រូវបានសហព័ន្ធកីឡាបាល់ទាត់កម្ពុជាបង្ហើបទៅកាន់បណ្ដាសារព័ត៌មានឲ្យច្បាស់លាស់ទាល់តែសោះ តែខណៈដែលក្រុមកម្ពុជាស្ថិតនៅ មីយ៉ាន់ម៉ា ក្នុងព្រឹត្តិការណ៍ស៊ីហ្គេម ថ្មីៗនេះគេហទំព័រក្រៅស្រុកបានលែបខាយបញ្ហានេះដែរ ហើយបានដាក់ការសង្ស័យថាករណីនេះអាចជាប់ទាក់ទងនឹងការលក់ការប្រកួតឬរៀបចំលទ្ធផលនៅការប្រកួតអន្តរជាតិរបស់ក្រុមកម្ពុជាកន្លងមក។
យ៉ាងណាក្ដីបើតាមការរាយការណ៍លើកាសែតភ្នំពេញប៉ុស្តិ៍ ឯកឧត្ដម សៅ សុខា ប្រធានសហព័ន្ធកីឡាបាល់ទាត់កម្ពុជាបានពន្យល់ហេតុផលយ៉ាងខ្លីលើករណីនេះថា ៖«បើមិនមានរឿងទេ នោះគឺគេមិនដកពួកគេចេញនោះដែរ ហើយរឿងនោះវាអាចប៉ះពាល់ដល់កិត្តិយសប្រទេសជាតិរបស់យើង»៕
អត្ថបទ៖ ប៉ែន សុផាន់ណា
0 comments:
Post a Comment