តារាសម្ដែងល្បីឈ្មោះ អ្នកនាង សារ៉ាយ សក្ខណា យំបណ្ដើរ និយាយទាំងអួលដើមកបណ្ដើរក្នុងពិធីមង្គលការរបស់ខ្លួនយប់មិញនៅកោះពេជ្រ ដោយអារម្មណ៍ត្រេកអរពេក។
សារ៉ាយ សក្ខណា និយាយទាំងអួលដើមកទៅកាន់ឪពុកម្ដាយយប់មិញ
គ្រាន់តែពិធីការិនី កញ្ញា ដួង ហ្សូរីដា ចោទសួរទៅកាន់កូនក្រមុំថា មានពាក្យពេចន៍អ្វីនិយាយទៅកាន់ ប៉ា ម៉ាក់បង្កើត ប៉ាម៉ាក់ក្មេក ក៏ដូចជាភ្ញៀវកិត្តិយសជាច្រើន ដែលបានចូលរួម អ្នកនាង សារ៉ាយ សក្ខណា ចាប់ផ្ដើមស្រក់ទឹកភ្នែក ពោលពាក្យអ្វីលែងចេញ។
តារារូបនេះលុតជង្គង់ឱបជើងម្ដាយ និយាយទាំងអួលដើមកថា៖ “កូនគ្មានអ្វីតបស្នងសងគុណទៅដល់លោកទាំងពីរទេ មានតែម្រាមដៃដប់ សំពះអរគុណដល់លោកទាំងពីរ ដែលបានចិញ្ចឹមបីបាច់កូនមកដល់សព្វថ្ងៃ”។
ជាមួយគ្នានេះដែរ តារាសម្ដែងធ្លាប់ឈ្នះពានពីកម្មវិធីអាណាចក្រតារាផ្នែក តារាថ្មីលេចធ្លោ នាពេលកន្លងមក ក៏បានថ្លែងអំណរគុណដល់ភ្ញៀវកិត្តិយសដែលបានអញ្ជើញចូលរួមក្នុងពិធីមង្គលការរបស់ខ្លួនផងដែរ។
ពិធីមង្គលការរបស់ សារ៉ាយ សក្ខណា និងស្វាមី ដែលជាអាណិកជនមកពីអាមេរិក នៅមជ្ឈមណ្ឌលសន្និបាត និងពិព័រណ៍កោះពេជ្រយប់ទទួលបានការអញ្ជើញចូលរួមជាច្រើនកុះករពីសំណាក់មិត្តសិល្បករ សិល្បការិនី៕
អត្ថបទ៖ អ៊ីង សុឡា
0 comments:
Post a Comment