ក្លិបជើងឯកទ្វីបអឺរ៉ុប Bayern Munich បានឡើងទៅចាំគូប្រកួតមុននៅវគ្គផ្ដាច់ព្រ័ត្រ FIFA Club World Cup ឆ្នាំ២០១៣ ក្រោយយកឈ្នះក្រុមជើងឯកអាស៊ី Guangzhou Evergrande ៣-០។
ក្រុមកីឡាករ Bayern Munich (ស) អបអរក្រោយស៊ុតបញ្ចូលទី
៣គ្រាប់របស់ក្រុមយក្សអាល្លឺម៉ង់ដែលស៊ីលើក្រុមយក្សរបស់ចិននេះ គឺធ្វើបានក្នុងចន្លោះពេលត្រឹម៧នាទីប៉ុណ្ណោះ។ បេក្ខភាពដណ្ដើមពាន FIFA Ballon d’Or 2013, Franck Ribery បានទម្លុះសំណាញ់ទីរបស់អ្នកចាំទី Zeng Cheng នៅនាទី៤០ មុនពេលកីឡាករអន្តរជាតិក្រូអាត Mario Mandzukic បន្ថែមគ្រាប់ទី២នៅ៤នាទីបន្ទាប់ ដោយការតែតបាល់ដែលលើកដោយ Thiago Alcantara។
ឈានចូលតង់ទី២បានតែ២នាទី ពោលគឺនៅនាទី៤៧ Mario Gotze បានស៊ុតគ្រាប់ទី៣ឲ្យក្រុមលោក Pep Guardiola ទម្លាក់ក្រុមលោក Marcello Lippi យ៉ាងងាយស្រួល។ បន្ថែមលើ៣គ្រាប់នេះ Gotze, Ribery និង Xherdan Shaqiri សុទ្ធតែមានឱកាសបន្ថែមគ្រាប់បាល់ ប៉ុន្តែបានត្រឹមបុកបង្គោលទីប៉ុណ្ណោះ។
ជ័យជម្នះនេះ នឹងធ្វើឲ្យក្រុមជើងឯក UEFA Champions League មួយនេះ ត្រូវជួបក្រុមដែលឈ្នះរវាងជើងឯកអាមេរិកខាងត្បូង Atletico Mineiro និងជើងឯកប្រទេសម្ចាស់ផ្ទះម៉ារ៉ុក Raja Casablanca ដែលត្រូវជួបគ្នានៅម៉ោង ២:៤៥នាទីយប់រំលងអាធ្រាត្រយប់នេះ៕
Ribery ក្រោយស៊ុតបញ្ចូលទីគ្រាប់បើកឆាក
Mario Mandzukic តែតបញ្ចូលទីគ្រាប់ទី២ឲ្យ Bayern Munich
Gotze អបអរក្រោយស៊ុតគ្រាប់ចុងក្រោយ
វីដេអូហាយឡាយនៃការប្រកួត៖
0 comments:
Post a Comment