ក្រុមជើងឯកចាស់ ម៉ិកស៊ីកូ នឹងត្រូវប៉ះជើងឯកបីសម័យ នីហ្សេរីយ៉ា នាវគ្គផ្ដាច់ព្រ័ត្រពានរង្វាន់បាល់ទាត់ពិភពលោកអាយុក្រោម១៧ឆ្នាំ (FIFA U-17 World Cup) ឆ្នាំ២០១៣ នៅប្រទេសអារ៉ាប់រួម ក្រោយឈ្នះគូប្រកួតរៀងខ្លួននាវគ្គផ្ដាច់ព្រ័ត្រយប់មិញនេះ។
កីឡាករ Taiwo Awoniyi ក្រោយស៊ុតបញ្ចូលទីឲ្យនីហ្សេរីយ៉ា
កីឡាករម៉ិកស៊ីកូ អបអរក្រោយស៊ុតបញ្ចូលទី
ម៉ិកស៊ីកូ បានបំបាក់អាហ្សង់ទីនដែលមានគ្នា៩នាក់ ៣-០ ដើម្បីមានឱកាសឡើងការពារតំណែងជើងឯករបស់ខ្លួន។ Ivan Ochoa បានជួយឲ្យក្រុមជើងឯក២សម័យមួយនេះនាំមុខមុនតាំងពី៥នាទីដើមតង់ទី១ មុនបន្ថែមគ្រាប់ទី២របស់ខ្លួននៅនាទី២១។ អាហ្សង់ទីនដែលបានបង្ហាញទម្រង់លេងដ៏ល្អនាការប្រកួតឆ្នាំនេះ បានព្យាយាមវាយសម្រុកតាមស្មើ ប៉ុន្តែមិនអាចធ្វើបាននោះទេ ថែមទាំងត្រូវបាត់បង់សមាជិកម្នាក់ទៀតផងនៅនាទី៣១ ក្រោយ Joaquin Ibanez ទទួលកាតក្រហម។
ខ្វះ៤នាទីចង់ការប្រកួត ម៉ិកស៊ីកូ បានបន្ថែមគ្រាប់ទី៣ ដោយកីឡាករបម្រុង Marco Granados ខណៈអាហ្សង់ទីនត្រូវចប់ការប្រកួតដោយសល់គ្នាត្រឹម៩នាទី ក្រោយអ្នកចាំទី Augusto Batalla ត្រូវបណ្ដេញចេញនៅនាទី៩០។
ចំណែកក្រុម នីហ្សេរីយ៉ា វិញ ក៏បានឈ្នះស៊ុយអែត ៣-០ ដូចគ្នាដែរ។ Taiwo Awoniyi បានជួយឲ្យក្រុមខ្លាំងមកពីអាហ្រ្វិកនាំមុខមុននៅនាទី២១ ដែលជាគ្រាប់ទី៣របស់គេក្នុង២ប្រកួត។ លទ្ធផល ១-០ បានរក្សាដល់១០នាទីចុងក្រោយ ទើបមានការប្រែប្រួល ក្រោយ Samuel Okon បន្ថែមគ្រាប់ទី២ នៅនាទី៨០ និង Chidera Ezeh ដាក់គ្រាប់ទី៣នៅនាទី៨១ ឲ្យនីហ្សេរីយ៉ា ឡើងប៉ះគូប្រជែងចាស់ ម៉ិកស៊ីកូ។
អ្នកគាំទ្រក្រុមនីហ្សេរីយ៉ាកាន់ពានសិប្បនិមិត្តយប់មិញនេះ
នីហ្សេរីយ៉ា និងម៉ិកស៊ីកូ ធ្លាប់ជួបគ្នាកាលពីវគ្គសន្សំពិន្ទុពូល F ដែលពេលនោះ នីហ្សេរីយ៉ា បានយកឈ្នះក្នុងលទ្ធផល ៦-១។ យ៉ាងណាក្ដី ការជួបគ្នាជាថ្មីនាវគ្គផ្ដាច់ព្រ័ត្រ ទំនងជាមិនស៊ីគ្នាច្រើនដូចកាលជួបវគ្គបើកឆាកនោះទេ។ ការប្រកួតផ្ដាច់ព្រ័ត្រនឹងត្រូវធ្វើឡើងនៅថ្ងៃសុក្រ ទី៨ ខែវិច្ឆិកា ខាងមុខនេះ វេលាម៉ោង ១១យប់ ឯការប្រកួតដណ្ដើមចំណាត់ថ្នាក់លេខ៣ ធ្វើនៅថ្ងៃដូចគ្នានោះ តែនៅម៉ោង៨យប់។
ប្រិយមិត្តសាកទាយលមើល៍ ថាតើ ម៉ិកស៊ីកូ ឬ នីហ្សេរីយ៉ា ជាអ្នកលើកពាន U-17 World Cup ឆ្នាំនេះ? កាលស្ទង់មតិមុនវគ្គពាក់កណ្ដាលផ្ដាច់ព្រ័ត្រ មានអ្នកទាយថា អាហ្សង់ទីនលើកពានច្រើនជាងគេ (២៥៦សំឡេង) តាមពីក្រោយដោយ ម៉ិកស៊ីកូ (១៣១សំឡេង), នីហ្សេរីយ៉ា (៤៩សំឡេង) និងស៊ុយអែត (២២សំឡេង)។ តែឥលូវសល់តែ២ក្រុមប៉ុណ្ណោះ សាកម្ដងទៀតទៅមើល៍ ក្រុមណាសំឡេងច្រើនជាង?
0 comments:
Post a Comment